يمعودين على كيفكم، أكو هواية أمور مقززة أكثر من شوفة صرصر يگمز إلى ماعون شوربة عدس، شبيكم گالبين الدنيا إللي هي أساساً مگلوبة على روسنا، شنو عمركم ما شايفين صراصر! سويتوها بلا ملح عبالكم كلكم گاضين أمسياتكم الصيفية تحضرون حفلات الموسيقى بفيينا، ولكم إحنا كلنا متربايين وي الصراصر، وخيرنا چان يلعب وي الخنفسانة لأن تقاوم الدفرات أكثر من الصرصر… عزا…. ولكم وداعة پف پاف أنتو مو وجه نعمة.ولكم ظهور الصراصر الگمازة إشارة ربانية ونعمة من ربكم إن ساعة الخلاص قريبة، يا دوب چم دقيقة بحسب توقيت الله، بس لا تنسى عزيزي المتابع الكريم إن توقيت الله غير توقيتنا، لأن يوماً عند ربك مثل خمسين ألف سنة مما تعدون ! وعندك الحساب من أگول چم دقيقة بحسب توقيت الله.
الحشرات الگمازة والنطاطة إشارة ربانية تجي قبل كل خلاص شلع قلع، شوفوا وي فرعون، ربك دز الگمل ، وبعدين الجراد، وبعدين الضفادع، وهذني كلها تگمز وتنط، إييييييييييييييي لعد شلون، وراها إجى موسى وصار نبي حتى يخلص بني إسرائيل من عذاب فرعون وجنود فرعون، وراح طر البحر شگين في مشهد سينمائي رائع وموسيقى تصويرية مذهلة. وهسة إحنا واگعين تحت عذاب البرطمان ومجلس الدواب، يعني همين محتاجين للخلاص، وظهور الصراصر الگمازة إشارة إلى أن رسائلنا وصلت للسما آخيراً، طبعاً ما چانت توصل من قبل لأن إيميل بوكس مال السما چان مليان، فيرجع إلنا الإيميل مع عبارة حاول بعدين، والظاهر إن الجماعة فوگ مسحوا الإيميلات الزايدة وإللي ما بيها معنى، مثل إيميل نريد كهربا… هذا إيميل رأساً للسپام لأن بلا معنى، أو إيميل نريد ماي ينشرب، هيج إيميلات بس تاخذ مساحة بالميل بوكس وبلا معنى، فالجماعة هسة خالين برنامج ما يستلمون هيچ إيميلات، فوصل إيميلنا إللي كاتبين بيه نريد إصلاح شلع قلع، وجتي إشارة قبول الإيميل وقرايته، وهاي الإشارة هي ظهور الصراصر الگمازة ، في إنتظار إتخاذ الإجراء الشلعي القلعي اللازم لإنجاز الإصلاح الذي دعا إليه الشالوع القالوع.ولا تستغرب عزيزي المتابع ، لأن أكو أمور متشابهة ومشابهة وشبيهة بيننا وبين بني إسرائيل مع إختلاف العقل طبعاً، لأن هم شعب الله المختار بدون أي مناقشة، وإحنا شعب الله المخ طار بكل مناقشة، هم چانوا تحت عذاب فرعون وهامان وجنودهما، وإحنا تحت عذاب البرطمان وقوانينه العجيبة ، موسى إجى شايل شعار الإصلاح وخلاص بني إسرائيل من العذاب، والشالوع القالوع جاي بالإصلاح لأن صار خلاف إشكالي حبيبي على الحصة إللي يستلمها من جماعته فهددهم بالشلع والقلع.وهسة راح تسأل عزيزي المتابع الكريم، شنو علاقة الگمزة بالإصلاح في الحالتين ، يعني بظهور الگمل والجراد والضفادع، وهسة بظهور الصراصر؟عزيزي السائل الكريم…الإصلاح ما يفيد بالتدريج، لأن الفساد مثل السرطان إذا بالتدريج الخلية السرطانية تكبر وتصير قاتلة، فلازم گمزة شلعية قلعية، وحتى الشغلة ما تطول، وهاي همين إشارة إلى قبول أن بعض الناس بالحالتين قبل الگمزة الشلعية وبعدها يظلون همّ همّ بلا أي تأثير لأن يكونون جوة الگمزة، وربك يگول لك لازم تقبل بهالشي بحسب مبدأ (تطبق الشروط والأحكام) في تطبيق الإجراءات الشلعية، وحتى بوكت فرعون، نشوف زوجة فرعون چانت مدومنة عالراسين، عاشت حياة العز والقصور والأكل الملوكي وي فرعون، وبعدين طلعت چانت تلعب على فرعون وهي مؤمنة بالإصلاح، ومن صارت الگمزة الإصلاحية مال موسى، صارت زوجة فرعون تحت الگمزة وكل شي ما صار بيها وكسبت اللعبة .وهسة بحالتنا نفس الشي، ربك دز الصراصر الگمازة حتى يگول إنت يا إللي تريد الإصلاح، ترى أكو ناس يظلون تحت گمزة الشلع والقلع، كل شي ما يصير بيهم (ق. گ ) و ( ب. گ ) يعني قبل وبعد الگمزة، وعندك أمثلة مهمة جداً وما صاحبكم الإيرلندي عنكم ببعيد ، كلها خطوتين وگاعد بلندن ويفتر بالهليكوبتر الخاص مالته، ما يخالف تقبل بروح رياضية عالية وإرفع راسك أنت غشيم بس لا تطخ المبردة، لأن آخر إختراعات الدوائر مالتنا المراجعة من شباك جوة المبردة !
شفت عزيزي المتابع الكريم، إن ظهور الصراصر الگمازة نعمة وإشارة قبول لازم نفرح بيها مو تلعب نفسنا، وإذا تريدون تغيير أكبر يعني شلع قلع رفع منع ، فلازم تتحملون ظهور أبو بريص في تشريب الباميا ، او حتى بالعلج، هناك وتعض على راس أبو بريص وأنت تعلج ! لازم تتحمل من أجل مستقبل زاهر.
كل من قسمته ، إحنا نبي الإصلاح مالتنا السيد الشالوع القالوع علامته الصرصر.
