أي ليش لا….متحف في السليمانية ..هذا إللي شاغل بال الخاتونة العراق السيدة هيرو (ثلاث مرات كتبت الإسم وإيدي راحت على الحرف إللي يم حرف الهاء في الكيبورد العربي بالغلط مو قصدي)، صح هم ما عدهم مشاكل في دولة جلعوط الطارزاني (حاصل جمع ودمج الرئيسين) بعد ما شدوا فلتر على دولتهم لطرح كل فضلات ومشاكل محافظاتهم علينا وعلى باقي الامة العراقية الغشيمة..بس مع ذلك ترى شغلة متحف بالسليمانية إشوية واگفة عبالك سيارة تاتا كل تايراتها بنچر إللي تصير مكان لتكاثر الچلاب السعيدة بحياتها الكلبية لأن تدري بنفسها إنها چلاب…مو مثل حالتنا…نعيش عيشة چلاب ونزعل إذا واحد گاللنا چلاب وحاسبين نفسنا أوادم من نسل بابا أدم.
وآني صح عربنجي بس أحب المتاحف…وأدري إن كل أمة أو شعب يخلي بالمتحف تاريخه ..وأكيد جماعة جلعوط الطارزاني راح يسوون نفس الشي في متحف السليمانية…راح يخلون نماذج من برقيات الخيانة إللي چانت بين مام جلو – ذا هاسبند أوف مادام هيرو – إلى المقبور خميني أيام حرب ثمان سنوات (نستخدم هاي التسمية حتى لا حد يتهمنا بالأزلامية أو الطائفية) ..وراح يتبرع مام جلو بأرشيفه الخاص لمجرزة باشتاتان ويجيب صور حصرية للرفاق إللي قتلهم.. وراح يجيب همين صور حصرية لجنابه الضخم گبل ما يصير ضخامة الريس وي على حسن المجيد وعزة الدوري…ويجيب أرشيف تاريخ قلعة دزة…ولمعلومات إللي يحبون التاريخ واللغات، فان تسمية (قلعة دزة) إجت لأن چانت مكان اللصوص وقطاع الطرق ومجرمي الجبل و (دزة) معناها اللص بحسب ما تعلمت من اللغة الكردية أيام ماوت وحاج عمران وبنجوين.
أما كاكا مسعود المبادراني فراح يخلي الصورة الأشهر له وهو دا يبوس چتاف المهيب الركن أبو الازلام قبل ساعات من (آب المتوكل على الله)..ولو أكو جماعة عدهم صورة دا يبوس غير أماكن من جسم أبو الازلام نزولاً إلى البوت القهوائي الشهير إللي چان يميز الأزلام.. وراح يخلي الشهادة التاريخية إللي نطاها إله أبو الرفس هاشمي رفسنجاني من گال لو مو وگفة كاكا ويانا بالحرب مچنا نگدر نقاوم سنة، لو يخلون شلون سرقوا تاريخ الحضارة الميدية ونسبوها لنفسهم رغم أن بكل ما بقيت من أثار الحضارة الميدية ما بيها ولا چلمة كردي أو كوردي او كردستاني أو سيستاني ، مثل ما سرقوا تاريخ قلعة أربيل وحطوا فوگاها العلم الهندي بس أكو خطأ بالتصميم لأن أكو شمس صفرة بالنص والشمس الموجودة بالعلم الهندي هي شمس برتقالية.
أو يخلون نماذج من الحضارة الفرعونية لأن مثل ما مكتوب في كتاب نزار بابان (كردستان جنة الله وعذاب أمة) إن نفر تيتي چانت كردية ..ويجوز هي الأصل في إكتشاف كلمة (نفر) من نطلب كباب… ، بشرفي حرت شلون عرف هذا الباباني إن نفرتيتي چانت كردية لا ويعرف أسم أبوها الكردي همين….يعني بالأيام الجاية راح نسمع أن الأسكندرية تقع ضمن الأراضي الكردستانية المتنازعة عليها بين أربيل وجنوب السودان ما دامت نفر تيتي طلعت كردية (وبالكتاب حتى عبدالباسط عبدالصمد كردي مع العلم هو من صعيد مصر). ولو أشوية ما نطگ من الضحك وننفجر مثل الطوبة راح نقرا في نفس الكتاب مال نزار بابان إن النبي نوح إبن آدم من صعد للسفينة في الطوفان أخذ وياه الأكراد وأن الاكراد هم إللي بنوا الحضارة بعد الطوفان…مع العلم إن نوح أخذ وياه حيوانات بالسفينة بحسب ما درسنا بالإبتدائية والقرآن دا يگول نفس الشي… و قصة الطوفان مذكورة بتفاصيل أكثر في ملحمة گلگامش العظيمة…وماكو أي إشارة إلى وجود أي نفر كردي في سفينة أتونابشتم (نوح في ملحمة گلگامش بحسب طه باقر العظيم) ولا قارين وجود نفر أو نص نفر (بحسب تعابير كباب أربيل) كردي في كل تاريخ الحضارة الفرعونية من أخناتون حتى الفرعون الاخير حسني مبارك عليه لعنة الگدعان والعراقيين إلى يوم الخزي المبين فريق في النار وفريق ينتظر يروح للنار.
ولأن المجرم أرشد ياسين – مرافق أبو الازلام إللي باگ كل النماذج الأصلية من متحف بغداد چان كلش صديق مسعود المبادراني فاكيد نطاه چم قطعة وراح يعرضون هاي القطع في متحف السليمانية، وي القطع إللي تسربت وإنشحنت وتفرهدت من متحف بغداد يوم تسعة نيسان 2003 بإتجاه شمال العراق.
وطبعا…راح يكون بهالمتحف جناح خاص للعوائل…العفو مو سرحت وي كباب السليمانية…أقصد جناح خاص لحلبچة…بس يا ريت لو يخلون نسخة من المكالمة اللاسلكية اللي إلتقطت بين أبو الازلام وعلي الكيمياي وإللي على اساسها تحملت القيادة العراقية تهمة إرتكاب مجزرة حلبچة…خلي يطلعون التسجيل بدون أي حذف حتى نعرف طبيعة ومصدر المادة الكيمياوية إللي أستخدمت، وليش صور الضحايا عبالك واحد مركبهم بهاي الوضعيات بعد الموت وخاصة صورة كاكا حمه الشهيرة إللي دا يحمل طفل زغير وإللي صارت ثيمة ورمز لحلبچة…هاي الامور تعبر على ناس ما قارين التحقيقات الجنائية الدولية لو مو عدهم خبرة بالطب ولا بالسلاح الكيمياوي، ولا بطبيعة أرض وجغرافية حلبچة.
وطبعاً الخطوة الجاية في البرلمان العراقي هي المصادقة على قانون يعتبر كل من ينكر مجزرة حلبچة مجرم تماما مثل القانون الفرنسي بحق مجرزة الارمن ومثل قانون إنكار الهولوكست اليهودي…وراح تشوفون هذا اليوم وعود تذكروني…وآني راح أصير أول مجرم بحسب هذا القانون المنتظر…عجل الله فرجه القريب وي الإمام المنتظر والإمام المفقود موسى الصدر.
دا تشوفون شلون متحف عرمرم راح يصير…متحف كوكتيل بفواكه محمضة وخايسة وجايفة…بس عموما…بالاخير راح يصير خوش مكان نروح ونشبع ضحك…لان أكيد يصير متحف مال خوش نكات !
[email protected]
