خلصت الأنتخابات وخلصت بلبلتها , وهسة الواحد بينة كَاعد و يفرفر بأذانة وبعيونة وبالريموت على كل شاردة وواردة عن النتائج والتزوير , وصعد فلان ونزل علان , المهم هسة خلصت كل الضغوط على المواطن النفسية والأمنية والاقتصادية والأجتماعية وركزلي هنا على الأجتماعية لأن الأنتخابات أثرت على أداء كل مواطن عراقي حتى ضمن أطار الحياة الزوجية , على كلٍ هسة لازم يرجع كل شي بمكانة , يعني تنشال كل المشاكل الي حصلت قبل الانتخابات , ومن أهم وابرز هاي المشاكل قضية الانبار والفلوجة , وهذا الموضوع لازم ينحل وباسرع وقت , لأن بعد ما نريد بعد ولد خايبات يلحكون أخوتهم من الطرفين , لأجل عيون مجموعة من الهتلية والسرسرية , وهالايام كاعدين نسمع خوش اخبار عن اتفاق بين سرسرية الطرفين لحل القضية بمجموعة من الاتفاقات الي بالاول والاخير راح تصب بمصلحة ولد الخايبات من أهل الانبار ومن ابناء جيشنا الباسل , المهم تفاصيل الاتفاق ما معلومة بس أكو أتفاق وأكو حل للقضية ولكن السرسرية من الطرفين يحاولون ياخذون وقت للسيناريو الي يصب بمصلحة الطرفين حتى لحد يشك بالموضوع , ما يدرون الناس كلهة افتهمت السالفة وعرفت مسألة أمراء الحروب والمصالح والدماء , وعرفت منو يتاجر بدم الناس ومنو الي لازم يجي وكت ويتحاسب ,
المهم أحنة عدنة بهذا الموضوع أنو ما يبقون يجرون بظهورهم علينة ويدكون ثكل ناس تنفي وناس تستنكر وناس تجر بالطول وناس تجر بالعرض ويابة فلان ما يأييد و يابة علان ما يبارك هذا الاتفاق , أكو أتفاق ومبرم وأنتهى الموضوع كلمن ياخذ فليساتة ويسكت و استعجلوا بالموضوع لأن دم الناس مو لعبة بيد وين ماكو أرعن ,
