إني المواطن حبيب العربنجي جئتكم بعريضتي هذه راجياً منكم معرفة ما نحن فيه من لعبان نفس، لذلك، أعتذر إذا تقرون هذه العريضة وأنتو توكم متزقنبين بالعافية، فحالتنا يا ولد الزواع، قطرة منها تعتبر سلاح بايولوجي من كثر ما بيها فساد وأمراض بدنية ومعنوية وإجتماعية وحتى فيزياوية .
فنحن نعيش في مجتمع مهتوك هتك، ماكو فرق بين البطانة والوجه من كثر الهتك والفتگ وإعادة الهتك مرات ومرات، إلى درجة ما عاد فيها مكان لأي رگعة ، مثل الچوپ القديم مليان پنچر، ، ندفع للپنچرچي فلوس الرگعة وماكو متر إلا ربع نمشي بالچوپ وهناك پنچر فوگ الپنچر، وراح تتفضلون تسألون ليش ما نصير چوپلس ونفض شغلة الپنچر، يمعودين حتى الچوپلس گام يعفط ويفسي بوجهنا، غير إحنا ما نريد ننقل لكم كل شي.
إليكم في المعسكرين الأفقي والعمودي
مدارسنا صايرة سباق يا مدرسة تحقق أكبر نسبة من الطلاب يگعدون بالگاع، ويا مدرسة تحقق الرقم القياسي بچم طالب گاعدين على رحلة وحدة، وما نعرف وين صارت حملة بناء ألف وأربمعمئة مدرسة ، بس نعرف الفلوس وين صارت وبجيب منو، من نعلة على الشريف بيكم، ولكم شعراية بكس أي گحبة أشرف من أشرفكم، إذا سنافر أو شناكل، كلكم مشمولين وإن لم تنتموا.مستشفياتنا، صايرة منتجعات سياحية للجريدية والصراصر، ولكم أكو أي مستشفى بالعالم ينقلون المريض من غرفة العمليات إلى القاووش مروراً بپارك السيارات !! ولكم ولد الزواع أكو مستشفى بالعالم يخلون جثث أطفال رضع محروگين بكراتين ماي فارغة حالهم حال الزبل !! ولكم تدرون شنو يعني الرضيع بالنسبة لأمه وأبوه ؟ حمل تسعة أشهر بلياليها وصبرها ، وحلم الأم بوليدها وكركرته، وعيون الأب وهو منتظر الفرحة، وتالي يحترگ الرضيع بسبب إهمالكم، وتعاملون الجثة مثل الزبل ! وتطلعون بكل حيل صدر وتگولون مو خطأ مستشفى، بل كهرباء !!! والخاتونة سوت منية علينا وهددت بإستقالتها !!! عالأساس فرد قندرة عتيگة من تستقيل تنلاص ! صح يمكن راح تنلاص على الجريدية والصراصر ولصوص الأدوية وأطباء بيع الأعضاء البشرية. قبل چان محد يريد قسم التشريح، هسة الكل يتعاركون على التشريح لأن خوش قسم، لغف فلوس.
دوائرنا إللي بيها مراجعات ومعاملات، تدرون لو لا !! أي المراجعة صارت من جوة المبردة، هاي جديدة، ويا ريت لو واترپمپ المبردة ضارب چطل على الماي وصايرة المبردة تنتل، حتى المراجع تكون هاي آخر مراجعة ومعاملة بحياته، أول ما يدنج، تجيه النتلة من المبردة… ولكم ولد البلغم گوة گوة خليتو الناس تندج راسها، وقبل، بالزمانات، چانت المراجعة بدائرة تجنيد الرصافة بپارك السعدون، من الشباك بالطابق الثاني عالبرة، وأكو يم الشباك عمود كهرباء أشوية نازل علحايط ، چنا نتراكض نصعد على العمود مثل الشوادي، وإللي چان عنده كرش، معاملته ما توصل للشباك، شوفوا الفرق بينكم وبين ذيچ الأيام !! وشوفوا الفرق بين الطابق الثاني وبين جوة المبردة .
محافظاتنا، ولكم يا محافظة، ما بيها حفاظ على أي شي غير جيوب أعضاء مجلس المحافظة، المحافظات صارت بيناتها نزاعات حدودية مثل النجف والأنبار على النخيب ومنفذ عرعر، وأشوية أشوية، ماكو واحد يندفن بغير مدينته، لشتنا منا وبينا، ما نخلي جيفة أي ميت تندفن بغير مدينته، مجالس المحافظات صارت تحكم وتقرر وتنسق، وتعال شوف، حتى الزيارات الرسمية يسوون ويروحون عبالكم كل رئيس مجلس محافظة هو رئيس، ومن توصل الشغلة للدفع والفلوس، تعالوا يا جماعة المركز ترى ما عدنا فلوس ويصير البچي بالقنادر. المحافظ صار هو يقرر الأحكام العرفية ومنع التجول والعطلة بكيفه، كل محافظ عنده جدول خاص بالعطلات تتناسب مع الدورة الشهرية للزوجة المحترمة، حفظها الله ووسع فرجها  ( بكيفكم تقرون بالفتحة على الراء أو السكون).الجيش، صار حاله حال عصابة بيل بو، ما نعرف منو بحال منو، عبالكم فرقة سيرك مو جيش، كل واحد لابس شكل، بيريات مختلفة ألونا وأشكالها وأحجامها، ولكم أكو أي جيش بالعالم بيه رتبة إمام ركن ؟ أكو جيش بالعالم يطلع واحد لابس طربوش وجبة ولحية شبر والجنود يصيحوله سيدي !! وبعدين، أكو بأي جيش بالعالم واحد رتبته مقدم قوات خاصة مظلي…إنتبه على المظلي، طولة مية وثمانية وستين سنتم ووزنه مئة  كيلو ومحيط خصره ستة وأربعين إنج ؟ هذه حتى طائرة طوبوليف ما تقبل تشيله .
وأكو واحد بكل دول العالم يطير أفيالة بگدكم ؟ السما أنترست أفيالة ومنظمة الطيران المدني ICAO تترجاكم توقفون عمليات إطلاق أفيالة للجو لأن ده تشكل خطورة على سلامة الطيران المدني ، وهسة حدائق الحيوانات بالعالم شادة أفيالتها بزناجير حتى لا تطير، لا تاركينا بحال ولا تاركين دول العالم بحالها ، يمعودين صايرين إذا واحد بينا شال أيده يتمصر من گاعد من النوم ممكن يسحب له خرطوم من السگف.وأكو دولة بالعالم تختفي بيها ثمان مئة مليار دولار بعشر سنوات ؟ أدري هي شعر بنات لو دولارات حتى تختفي ! وأكو مشروع الفلكة الوطنية يتكلف خمسين مليون دولار وتالي تطلع فلكة بگد صينية الچاي ؟ وأكو دولة بأي مكان بيها مستشفى بثلاثة مليارات دولار؟؟ ويا ريت لو شفنا المستشفى، لا بس سمعنا أكو هيچ مشروع، والفلوس همين صارت شعر بنات وأختفت.
ولكم أكو دولة العشيرة بيها أقوى من القانون !! العشيرة هي إللي تگود القضاء (همين تريدون تقون بالشدة على الواو أو الضمة…بكيف اللاعوب). ويوم إللي يطلع أي قانون لازم بالأول رئيس العشيرة يبصم عليه، لأن إذا ما بصم راح يبصق عليه !
وأكو أشياء أخرى سخيفة ما تستحق أكتبها بعريضتي هذه، مثل الماي همين ماكو، وإذا أكو يجي حاله حال السبتتنك، والكهرباء، مشكلة دارفور إنحلت والكهرباء بعدها، والهويات المزورة، والجوازات الدبلوماسية إللي إذا نحسبها نطلع إحنا بالمرتبة الاولى بالعالم في عدد الدبلوماسيين وأبو الدبلومسية مالتنا ينتج طلاسم لغوية ويهدد ، ويگولون هو الوحيد إللي يعرف إعراب ” الله بالخير ” ! وننتظر يمكن بالجولة القادمة راح نسمع تهديد إذا ما نسكت  ترى يطلع وحش فيگا تفووو تفووو ليحمي التجربة.ختاماً… لا أنتظر منكم أي رد فعل لما جاء في هذه العريضة ، لأن ما راح أخلي بيها طابع رسمي، بصراحة ما أعرف أي طابع يناسب حالتنا او يرمز إلنا حتى أدگه بهاي العريضة.واحد بشر سابقاً…وحالياً شليلة وضايع راسها
حبيب آل عربنجة
من أمام مزبلة الأمنيات