إي عفية، هيچ نريدكم، ما يهمكم أي شي. بكل هيبة تليق بأكذوبة (العراقي ما يقبل الذل)، وبخرافة (العراقي ما يصبر على الضيم)، طلع إلنا الناهق الرسمي للحكومة العراقية وگال أن الحكومة إكتشفت ..إي إكتشفت فقدان 30 مليار دولار رقماً وثلاثين مليار دولار كتابة من إحتياطي بنك المركزي العراقي.
خوش إكتشاف مو بالله !!، بس إللي مخليني أضرب دقلات من الدوخة ان الخردة أختفت من العراق من عشرين سنة وأكثر لعد هاي الخردة من وين جتي حتى تضيع بهالسهولة؟؟ وأدري أن جيب الخردة إللي من چنا زغار نتباهى بيه أيام العيد من نوگف گدام باب البيت ونخرخش الجيب همين أختفى من موديلات البناطير العراقية من ربع قرن أو اكثر إلا إذا حكومتنا الرشيدة دا تخيط مثل هذا الموديل وتوزعه للوزراء والمسؤولين حفاظاً على التراث العراقي، لان مال تفقد الحكومة ثلاثين مليار دولار امريكي ما تحصل إلا إذا چانت خردة وبالجيب وما حست الحكومة بالخردة وهي ترگص بعرس الواوية.
ثلاثين مليار دولار أمريكي، وشوفوا الكلمة المستخدمة بالتصريح (فقدان)..يعني لا أحد يسأل عليه لأن أنفقد ، وأعتقد أن الحكومة الرشيدة نزلت إعلان الفقدان في جريدة الصباح وسبتايتل على قناة العراقية (فقدان: فقدت الحكومة العراقية مبلغ 30 مليار دولار أمريكي، وبالعافية على من يعثر عليه) حتى تبري ذمتها، وهي شلون ذمة عليها ولا ذمة حسنة ملص او فطومة مستگعدة داود اللمبچي.
وقبل عشرة أيام، طلع تقرير أمريكي يگول أن 800 مليون دولار رقماً وثمانمائة مليون دولار كتابة تتهرب من العراق أسبوعيا إلى مصارف خارجية، إي أسبوعيا، بنفس الوقت إللي هدمت فيه وزارة محمد تميم (وزارة التربية) 700 مدرسة بالعراق على أساس قديمة وما گدرت تبنيها إلى درجة وصل عدد الطلاب في بعض الصفوف إلى 57 طالب، كل أربعة يشتركون برحلة، وهسة راح يطلع محمد تميم ويگول عدنا رحلات مكومة بالمخازن وما حد يجي يستلمها وأگول ولك مصخم هو وين اكو صفوف لو مساحات لو مدارس حتى يستلمون الرحلات؟؟ ليش المدارس بس رحلات ؟؟ روح عمي بالعافية عليك إنت وحسنين معلة كوميشن طبع المنهاج المدرسي ببيروت وكلاوات مقاولات بناء المدارس إللي كلها دخلت بجيب حسنين حتى يجيب ميريام فارس لنادي الصيد.
إدري 30 مليار إنفقد من البنك، لعد وين چانت دائرة الرقابة المالية كل هاي الفترة ؟؟ لو هم سباع بس على الغشمة مدراء المخازن؟؟ لو وين هيئة النزاحة لو هي بس شاطرة بنزح خياسات بالوعات السياسة وما عليها من أموال العراق!!
وين أعضاء اللجنة المالية في مجلس النوام العراقي لو هم بس چهرات تتعارك گدام التلفزيون؟؟ 30 مليار دولار مو مال يوم ولا شهر ولا سنة، هاي عملية منهجية ومتراكمة، يعني مو مال يجي هسة واحد ويريد يضربنا دبة ويگول (فقدان) لان كلمة فقدان تعني راحت وإنفقدت مرة وحدة مو على مراحل وسنوات!! وإذا نعرف أن إيران تطلب تعويضات بمائة واطنعش مليار دولار فهذا يعني أن هي حصلت تقريبا على ربع التعويضات رسميا بحسب التصريح الحكومي العراقي، عدا عن 800 مليون دولار شهريا هذا في حال أن الفلوس راحت لإيران مو بجيب هذا أو ذاك، والحالتين أكلان هوا .
يابة فتحوا آذانكم زين للكلمات إللي گامت الحكومة تستخدمها بالفترة الآخيرة، وأعتقد أن الحكومة دزت چم واحد لدراسة أساليب الكلام والإعلام والتصريحات وهذولة هسة رجعوا وگاموا يبيعون بضاعتهم على رؤوس الغشمة. كلمة (فقدان) ما نريدها في وصف الفساد المالي، هاي الكلمة يجوز نقبلها في حالة ضياع قندرة من كيشوانية الكاظم، مو ضياع 30 مليار دولار.
وبعدين أكو شغلة أخرى، هيئة النزاحة دزت كتاب رسمي إلى السفارة العراقية بموسكو تطلب أسماء الوفد المفاوض والمرافق لرئيس الحكومة في زيارته لموسكو وعقد صفقة السلاح الوهمي!! يعني يخش بعقلكم أن رئيس الوفد (السيد رئيس الوزراء) ما يدري منو وياه بالوفد لو بالطيارة!! يمعودين هذا مفتح بالسبحة ويعرف السندلوس من الكهرب ومن اليسر وهو مغمض والنوب تريدوني أصدگ ما يعرف أسماء الوفد إللي وياه؟؟ وبعدين مو الضابط اللوچة  – ضابط التوجيه السياسي أيام قائد الأزلام – محمد العسكري هو نفسه إللي طلع على قناة العراقية وگام يغرد بمستوى المفاوضات ذات الحرفية العالية وي موسكو بنفس يوم الخبر مال توقيع العقد بين بوتين والمالكي؟؟ بشرفي دايخ عبالكم بابا أخذني للمراجيح ونساني بالفريرة ساعتين وخمس دقايق. يعني من وين أجيب السالفة دا أشوفها إحنا قشامر ومغفلين وكل واحد بينا راسه فري سايز ياهو يجي ويلبسنا كلاو مطاطي يرهم وي كل المناسبات والظروف الجوية والسياسية وحفلة ختان بمناسبة عيد الغدير (هسة يگولون هذا شجابه بالنص؟؟ أگول نفس الشي إللي خلا واحد ملا بجامع  بسامراء يصير وزير العلوم والتكنولوجيا ببغداد).
وقريبا..راح يطلع بيان حكومي رسمي..بفقدان قندرة العراق، وبالنتيجة العراق ما راح يگدر يمشي في البناء، لأن نعرف طريق البناء كله مليان مسامير والحافي ما يگدر يمشي فوگ المسامير إلا إذا ماكل چكليته، أو يجوز الجماعة دا يبنون لزگ بالتفلة وماكو مسامير، بس حتى لو بالتلفة، العراق ما راح يگدر يمشي حافي لأن راح يروح بدرب الزلگ..لان التفلة تزحلگ.
[email protected]