السيد / حجي زبلول صاحب شركة (مزبلة التاريخ)  – ذات صلاحية مطلقة
تحية مزبلة
اعتقد هسة إحنا نستحق أن نملك وياك أسهم في شركتك المحترمة، لأن إحنا أكبر متعامل وياك من سنوات ما أعرف اشوكت بدت، صدگني أستاذ أبو الزبل ترى آني من أول يوم رحت للمدرسة قريت على باب المدرسة الإبتدائية (الرجعية إلى مزبلة التاريخ) وعلى حايط التواليت مال المدرسة (العملاء إلى مزبلة التاريخ)، واستمرينا بأرسال حاويات الزبالة نوبات خلال أسبوع كذا حاوية، ونوبات محضرين الزبل بس ننتظر أمر إداري للتخليص الگمركي لوازم براءة الذمة ! ذمتنا إحنا مو ذمة الزبالة. منو ما يعجبنا نخليه بتنكة الزبل ونكتب عليه: إلى مزبلة التاريخ، ويجون جماعتك ويشيلون. بس الظاهر الفساد وصل لحد عندك..أشو يا زبل ندزه فرد شهر لو سنة  يجينا كاشخ ومبدل ومغير اسمه، بس وداعتك من ريحتهم نعرفهم، نعرف هذا الزبل وهاي الريحة دزيناه إلى شركة مزبلة التاريخ وأستلمنا وصل إستلام وإيداع من جماعتك، أرجوك شوف إلنا شنو السالفة !
حجي زبلول
إحنا نفهم إن الزبل مواسم، تماما مثل ما هو الحب مواسم، ونعرف إن في موسم الإنتخابات يصير لود على شركتك، فالله يخليك أشوية نريد همة تضبط جماعتك والفساد إللي عندك، ما بينا حيل ولا ظلت في العمر مساحة أو مجال مال ندز زبل ونستلمه بعد چم اسبوع، ترى هيچ راح تزعّل أكبر متعامل وي شركتك وراح تخسر سمعة الشركة كشركة تساهم في تنقية الدول من الزبالة السياسية.
ولأن إحنا صار سنين ياما سنين نتعامل وي الزبالة السياسية فصارت عدنا خبرة، أي واحد يوگف يمنا نعرفه من ريحته، صدگني يا حجي زبل صارت عدنا حاسة شم أقوى من الچلب ومن هاي تسمع يگولون عيشتنا عيشة چلاب، هاي قصدهم صرنا نعرف من الريحة، مو قصدهم ظروف حياتنا مثل ظروف حياة الچلاب، لأن تعرف وأنت حجي زبلول هسة أكو چلاب تعيش فنادق خمسة نجوم في نيويورك وفيينا، ويگولون حتى في العراق بس ما أعرف وين !
أخوي صاحب شركة مزبلة التاريخ
أبوس إيدك استخدم حاويات بيها قبغ والله يخليك لا تعين في شركتك أي واحد من جماعة شايل القبغ المعممين ، ما أعرف ليش شالوا القبغ، ومن يوم ما شالوا القبغ إحنا حالتنا خياسة لأن كل الصراصر طلعت وصارت أفندية ، وإحنا نحترم سرية مكانك وما تريدنا نعرف وين ترمي الزبالة ، بس ترى إحنا الفار دا يلعب بعبنا ودا نحس إنت تاخذ الزبالة من عدنا وتنطيها لغير ناس  بس غسل وتشحيم وترجعها إلنا، من هاي نريد نشوف إمكانياتك و نسوي زيارة ميدانية وي الوجبة الجاية إللي راح ندزها لشركتك، راح نصعد بسيارة الزبل لحد شركتك وأرجوك لا تزعل بس إللي نشوفه من الزبالات تارسة كل مكان تنطينا إشارة إلى أن كفاءة شركة مزبلة التاريخ يرادلها مراجعة.
وبعدين يا حجي زبلول، بما إن إحنا زبائن دائميين عندك، فلازم تسمع شكاوانا وملاحظاتنا خاصة أنت شركة معتمدة عالميا وعندك شهادة إدارة النوعية ، يعني لازم تسمع رأي الزبائن وتسوي مسح دوري أو سنوي لمعرفة رضا الزبائن والعملاء عن أداء شركتك، دز إلنا إستمارات بيها أستبيان كل ثلاثة أشهر وإحنا نجاوب مثل : عزيزي المواطن هل تخلصتَ تماما من الزبالة السياسة؟؟؟ هل عاودت الزبالة الظهور عندك بعد إرسالها إلى مزبلة التاريخ ؟ هل تصلك روائح مزبلة التاريخ؟؟؟ هل عمليات مزبلة التاريخ تؤثر على البيئة السياسية عندك (سلباً أو إيجاباً) ؟؟ يعني من هاي الإسئلة الفستوقية مال ناس فهمانين، حتى لو تشتغل بالزبل!
ولعلمك حجي زبل، ترى هسة الناس برة گاموا يسوون كهرباء من الزبل، وإحنا نگدر نسوي وياك مقاولة، ندزلك زبالاتنا وتسويها كهرباء ونصدرها، بس أخاف تصير كهرباء أم الريحة، اول ما تفتح الگلوب تشم ريحة زبل وفساد، لازم بالأول نضمن ماكو ريحة فساد وبعدين نگدر نخطي هاي الخطوة، بس فكر بيها، ترى خوش صفقة خاصة إحنا الزبالة عدنا ما تخلص والكهرباء دا نريد نخليها بالسطولة ذخراً للأجيال القادمة حتى يترحمون علينا .
ومثل ما بديت رسالتي، ولأن السنة على نهايتها، أرجو أن لا تنسانا من أرباح شركتك، ترى لو مو إحنا شركتك ما تشتغل، وإذا ما ترضينا بنسبة أرباح عالية، راح نوگــّف إرسال شحناتنا القادمة إليك، وراح نهدد بأن نصير خوش أوادم وبعد ماكو أحد نخلي على گصته طمبغة (مزبلة التاريخ) ، وإذا إحنا نصير خوش أوادم ترى التاريخ يگوم يبرج من النظافة، وأعتقد (شركة مزبلة التاريخ) راح تصير متحف لأنواع الزبالة التي كانت موجودة عدنا، بس لازم الدخول فقط للناس إللي ما عدهم حساسية من ريحة الزبل وخاصة إذا معتق…وتاريخي..بعد ضربة تاريخية بالگصة…لو بالكرسي !
[email protected]