يا ربّي إلا تجيب إلنا واحد أصلع وتنطيه كل أموراتنا ويتحكم بينا، مو إنت تعرف أن الگرعة تتباهى بشعر بت أختها والنوب أصلع وعندك الحساب، يا ريت لو يقبل يتباهى بزلف أخوه، لا هذا يتباهى بگذلة إبن الجيران وحجم خاصوينه !
أربع وعشرين ساعة نسمع ونقرا گال إيران وعمل إيران (إيران مذكر والدليل الإسم إللي يشبه شي مذكر وفوگاه إثنين مو واحد) ! وإيران گعد وي أشتون وإيران نجح في المفاوضات النووية ودگ دنبك لأسبوع لأن إيران نجح في تخصيب اليورانيوم وحتى تخصيب الحكومة العراقية وجعلها حامل بأجنة مشوهة دائما وبقوانين بشعة بس إيران يشوفها قوانين تخبل لان هو والد هاي القوانين اما حكومتنا فعالية نصيف في عينها نوال زغبي !
البلد محترگ ومهتوگ هتگ من كل جهة حتى من صغار العشائر إللي كل واحد جايب له (شيخ) عشيرة كان يتمنى فرد يوم يمصمص له عظماية وهسة جاي صاير براسنا (شيخ) يهربد ولابس رولكس ويصيّف بلبنان، مو بس يمصمص عظماية لا والله ويمصمص عنجصاية وعنباية وبكيفكم شنو قصدي بالعنجاص والعنب ! ومع هذا، ما عدنا غير إيران نجح وإيران صمم وإيران فاز، ومو بعيد نادي النجف راح يشحن مشجعين ومن ميزانية العراق حتى يروحون لريو دي جانيرو ويشجعون منتخب العراق..العفو أقصد منتخب إيران في نهائيات كاس العالم 2014. وتتذكرون كتبت للعراقيين تبريكات من منتخب إيران صعد لكأس العالم ، ومو مهم ما صعد منتخب يونس محمود لكأس العالم لأن منتخبنا الثاني موجود منتخب مهديفيكا وكاظميان وگلگليان ونيكو…نام بالعافية بس لا تنسى تمسح المسائل زين وبعدين نام !
عشر سنوات (ما أريد أكتب إيداعش حتى لا تصير دعاية للدواعيش) والمسؤولين الصلعين مالتنا ما عملوا شي حتى نظل نتباهى بأبن الجار والجار الجنب، شلون تريدون نسوي مجمع بتروكيمياويات ؟؟ مو إذا نسوي لعد شلون نگدر نتباهى ونگول إيران عنده مجمع بتروكيمياويات متطور ومنتجات بتروكيمياوية متطورة؟ عشر سنوات والمسؤولين الصلعين مالتنا ما گدروا ينتجون تاير بمواصفات عالمية يقاوم الظروف الطسوية في الشوارع العراقية، والسبب حتى نظل نگول التايرات الإيرانية ممتازة! عشر سنوات ما گدرنا نجيب ميدالية أولمبية ! بس من ياخذ رضائي ما أعرف مرتضائي ميدالية ذهبية برفع الأثقال لو بالمصارعة نظل نهوس ونگول : والعباس هيهات منا الذلة !
عشر سنوات ما گدرنا نسوي فلم واحد بمستوى فلم (الطلاق) الإيراني إللي أخذ جائزة أوسكار لأن شلون تريدون نسوي فلم وننافس إيران ؟؟ ترى صدگ ماكو حيا حضوري ومستحى وإحترام، شلون العين تعلى على الحاجب إلا إذا تنامون بالمگلوب. كل هاي السنوات ما عدنا شي غير نتباهى بشعر إيران: شوفوا اليوم شلون شعر حلو أبو گذيلة، وشوفوا اليوم شنو نوع الشامبو والجل، وشوفوا اليوم شلون گصة وتسريحة حلوة، ومتعبين نفسنا حتى نجيب أحسن أنواع الحلاقين حتى إيران يطلع حلو وي شعره !
هم زين عدنا شي نفتخر بيه وهم زين إيران دولة جارة إلنا حتى من نتباهى ما حد يگول ” وإنت ليش حامي حمامك” ، نعمة وفضيلة ورحمة من الرحمن الرحيم. بشرفكم لو الله مسوي لكم حدود وي الصومال كنت تگدرون تعترضون؟؟ ولكم يا جاحدين سكتوا هسة لا الله يشيل هاي النعمة والجيرة الفاضلة من يمكم – گولوا آمين !
يا رب
أدعوك دعاء مال واحد كله ذنوب من راسه وحتى ساسه وبكيفك عاد تقبل لو لا بس آني راح أسوي إللي عليّ…يللا أبدي ..أوكي؟ خوش !
يا رب:
اللهم الله يخليك شوف إلنا چارة بإللي نشوفه
وكافي عاد كل هذا الدلال لإيران عوفه
إحنا عدنا الحسين والكرار ومسجد كوفة (أخبّ من أتلوگ)
وعدنا ياقو وجورج وأسحاق وراحيل و نوفة
نريد عذابك على إيران وكل واحد بيهم يشيّب من خوفه
ونريد يعوفونا بحالنا وبحال مدننا المقصوفة
وإنطينا خلگ حتى كل واحد يرتب صفوفه
وساعدنا حتى واحدنا يصفي فايلات رفوفه ( هاي هيچ وي القافية)
يا رب طلع إلنا شعر في رؤوسنا المنتوفة
حتى أصلعنا ما يتباهى بشعر إيران ولا زلوفه
وآخر دعوانا أن الحمد لله رب العالمين إللي نتمنى يرضى عنا يوم الحساب ونرى وجهه الكريم ونشوفه.
داوم بالصلاة حسب المنهج مال آذان الظهر !
[email protected]
