دووووووووووق فليد….وهناك چانت أم الجهال تگعدني برومانسيتها العراقية : قرززززززلقط…وجع
وچان  أسالها : د تشوفيني ؟ گالت بكل حنية وهمس : ولك شبيك..گوم گوم بلا خرابيط الزقنبوط مالتك.
وطبعاً سمعت الكلام بكل أخلاق عالية تليق بعزة نفس العراقي   وگمت…يابة شنهي ما شنهي…أفتحي لنا الپردة الگلگلي خلي نشوف شكو بالعالم . طبعاً آني نفذت الأمر لأن فتح الپردة على أبو البيت. المهم، فتحت الپردة وهناك شفت ناس طالعين مظاهرة شايلين لافتات علمية، هاي أول مرة أشوف مظاهرة علمية، صدگ چذب…خرة باليابان  ، ولكم مظاهرة علمية حتى كامل الدباغ ما گالها ولا مرة طلعت ببرنامج طلائع في المسيرة…ولبست النظارة چعب الإستكان، حتى أشوف زين وأقرا زين..
يابة طلعوا الجماعة يريدون يسوون زيارات للمريخ وترانزيت عد الگمر حتى يشوفون تطور المشاريع الفضائية إللي صار إلنا عشر سنوات دنسويها ونصرف عليها  بدون أي هوسة إعلامية ، لأن بصراحة المعايير الإعلامية بالفضاء مو مثل الهوسة الإعلامية مال الگاع وخاصة السؤال العضنطريطي ” شنو رأيك بالقرارات الحكيمة لمجلس قيادة الثورة  – هاي قديماً – وهسة شنو رأيك بالقرارات الحكيمة لمجلس قيادة المحافظة ؟؟ مو هسة لكل محافظة مجلس قيادة ثورة خاص بيها، ذيچ الثورات الطايح حظها إللي سوت من واحد ما أعرف أسمه أثير لو أثيل لأن عنده مشكلة بالراء ولزمة الچفچير قائد ثورة نينوى ، ثورة جابت إلنا الدعشنة ، لو مجلس قيادة ثورة الرمادي بقيادة الجنرال رافع الرافعي إللي رفع وبعدين إحتار وين يحطه لأن أنقطع الإتصال وي القرضاوي،  …وما لگى مكان يحطه غير بطيز لگن أو طيز وطن…أيهما اقرب للحالة العراقية الزاهية.
وبنص هاي المظاهرة العلمية أشوف دخلوا جماعة شايلين صخرة عجيبة غريبة، ما شايف مثلها لا بشعر المتنبي ولا البحتري…شجاب الصخرة عالشعر هو نفس السبب إللي كل مرة يخلي البطة تلعب شناو….. خليني أسمع زين أشوف شنو سالوفة هاي الصخرة : ولكم آني أخو هيكارو…هاي صخرة القائد عبعوب أبو الدروب، شعارات تنديد علمية لأن وكالة ناسا تريدها و أكدت أن هاي الصخرة هي صخرة فضائية صارلها عشر سنوات الوكالة تدور عليها بعد ما إنفصلت من كوكب كيبلر ، وشلون وصلت عد عبعوب!! طبعاً تعرف الجواب من تسأل نفسك شلون وزير التعليم العالي في بلد مهتوك هتك –  وأكو كلمة
على نفس الوزن ممكن تستخدمها تنطيك المعنى ألأدق…أساعدك بيها..تبدي نفس الحرف وتنتهي بنفس الحرفين  – إي شلون بهيچ بلد  توصل ثروة وزير التعليم العالي  لسطعش مليار دولار أمريكي…بنفس الوقت ماكو مختبرات بالجامعات العراقية لأسباب إقتصادية؟ ! لعد ثروة وزير التجارة إشگد…حقك والله تسأل هذا السؤال…لأن إذا وزارة ما بيها تجارة ولا إستيراد والوزير گدر يلم سطعش مليار دولار، لعد لو وزارة التجارة أو الدفاع مليانة  عقود شلون ؟؟؟ ها أشوف صفنت !!! وراك حية …شلون عين.
وهناك.. شفت موكب الحيتان شايلين كلهم لافتة ” أمة الفساد  واحدة ذات شهية خالدة ” لأن مصالحهم وحدة ما تصير إثنين  بقيادة صالح مطلگ الفساد ، أشكال غريبة، كل حوت يگدر يبلع السما ودرب التبانة، هو يبلع الدرب ويعوف إلنا التبن، يعني صدگ حيتان مو أرضية، بحياتي ما شايف هيچ حيتان حتى بدرس الوطنية إللي چان يجينا المدرس ويثرم نص گونية بصل معفن براسنا ولازم نصدگ كل شي ميد إن إراك، وتالي طلع حتى التفلة لازم نستوردها من برة، نجيب واحد يتفل علينا وننطيه فلوس ونگول له ” دفع الله ما كان أعظم ”  !  وطبعاً موكب الحيتان مو مشاية، هذا موكب صدگ فضائي بدون شقى ،
شوفوا، صالح الفساد عنده واحد وعشرين سيارة جي إم سودة لان هو حوت كبير، زعنفة بمكان والراس بمكان، أصلاً بس الذيل يراد له سبع سيارات  جي إم، وعلى هذا التفصال البقية الباقية من ما أعرف شنو لأن هذولة ما إلهم تسمية، شتگول عليهم يرهم، خرة بالحظ، شلون كل شي يرهم عليهم تفصال، خو أكو واحد بيهم راح ياخذ دور وحش الطاوة لأن بكل شي گاعد وزن، تخليه عالداخلية يخبل، على النقل، يمشي، على التخطيط، يخطط بالمسطرة ، على المالية، إيده زبد….وأكو إحتمال المرة الجاية راح يصير باباغنوج لان بابا كبر وتعب ويريد يرتاح  خو غنوج ما يظل وحده..
عيوني أنتو…ترى بكل مكان أكو بوگ وفساد، يعني مو عبالكم أربيل ما بيها، بس ترى أكو بوگ وأكو بوگ. أكو يبوگون تسعين بالمية ويخلون عشرة بالمية للغشمة، ترى الغشمة وداعتكم خوش ناس ويرضون، بس أكو جماعة من يبوگون ينسون الحساب ويصيرون ولد عم لجهنم، بس يصيحون هل من مزيد …يابة هسة طبقوا علينا سيناريو فلم يوسف…سبع سنين إلكم وسبع سنين إلنا، وإحنا من يمنا نطيناكم أربع سنوات بخشيش نثرية عالميز، وهسة نريد سبع سنوات مالتنا، ما بيها شي وتدللون.  ترى إحنا صحاب وي الفضاء من يوم ما چنا ننام بالسطح ونتكلم ونسولف وي النجوم الرائعات إللي چانت تملا
سمانا، كل عراقي يعرف أسم أي نجمة بالسما، هذه سبع البنات، وذيچ الميزان، وذيچ الزهرة، وهذيچ السهيل، إحنا چنا ننام والسما لحافنا، تعرف كل أسرار نومتنا، وشوفوا أكثر من ثلاثة أرباع العراقيين لو تحسب تاريخ ميلادهم وي تسعة أشهر حمل راح تشوفهم ماما وبابا سووها تحت أنظار السما بليلة صيفية حلوة، والسما ما تخون بس هذولة أهل الفضاء ترى حتى السما طاردتهم، وإحنا فطــّر، قبلناهم لجوء وسيناهم أوادم وقوط ورباط  وهسة إجى الوكت نطلعهم واحد واحد،أو وحدة وحدة حرية..ثورة ثورة إشتراكية، وراح إنطيكم راس الشليلة…خلونا نبدأ من المفوضية العليا للإنتخابات…لأن هذولة أشو بعد
كل إنتخابات يختفون.. ونسمع دخول وجبة جديدة من  العراقيين لنادي المليارات…ما أريد أجيب أي أسم…بس سيماهم في قندرتهم من أثر الماركات الغالية  ، وفي التاتو والنفخ للعنصر النسوي .
وإستمرت المظاهرة وكل ساعة لافتة شكل، خو مرت لافتة مكتوب عليها ” الشمس شمسي والفضاء فضائي” عرفت هذولة جماعة ” حزب المطي وياك يا قائد البغلة  ”  ولافتة تطالب السير ريشتارد برنسون أبو رحلة الفضاء السياحية مال شركة فيرجن بأن يعوف الفضاء إلنا لأن ما يفيد، أي تجاوز على حقوقنا بالفضاء عواقبه وخيمة…هيچ مكتوب باللافتة ويم كلمة ” وخيمة ” مرسومة خيمة. !
صارت الدنيا ليل، وراح أجيب الربابة مالتي وأدگ العتابة…وآني دا أدگ ” يا ذيب ليش تعوي” رفعت راسي للسما، شفت الگمر صار أحمر (ما أگول البدر لأسباب سياسية خاف يزعل العامري ويرجع الطيارة مالتنا من المريخ)…عرفت أن الحوت الكبير في كوكب الفساد زعلان كلش ، وراح يجون فزعة يوفو وي الوحش بوگة بوگة ، عفت الربابة، وصعدت بالعربانة أروح يم عمي گامبي، إللي يعرف منو جاب هذولة ..والله الموفج حتى على كوكب عطارد…بالتزكية..