واحد يصير ياباني يراد له حظ !
بس واحد ياباني وعالم بالكيمياء وفائز بنوبل بالكيمياء فهذا صدك مو بس بخت ، هذا واحد يراد يشد تيربو حظ وبعده ما يلحگ ، تماماً مثل ” وما يلقاها إلا ذو حظ عظيم ” أو بالتعبير العراقي ” ما يلگاها إلا واحد نغل” لأن التوفيج عد العراقي لازم يجي وي النغولة، من هذا العراقي يگول لواحد أموره عدلة وناجح والله موفجه بالذكاء ” فرد واحد نغل” في إصرار يليق بالعراقي في كره كل شيء له علاقة بالنجاح والذكاء والعمل والإبتكار إلى درجة أن العراقي يستخدم كلمة (إخترع) للتعبير عن الفزة والخوف… راجع المثل العراقي الميتافيزيقي ” شاف ما شاف شاف كوكو أمه وأخترع” طبعاً مو المقصود إخترع لباس لأمه، بل المقصود فز وخاف من شاف كوكو !
المهم ، عمنا الياباني السيد بدون عمامة سودة ولو هو مقدم طلب بس أسمه بعده بالسرة، أي، العم روجي نويوري خطية ياباني، وفوگاه عالم بالكيمياء وفائز بنوبل وعنده معهد للأبحاث العلمية في اليابان ..يعني لو يمسك مايكروفون ويتريع الناس راح يگولون عليه ” حتى بتريوعته استاذ ويطلع ريحة تخبل” وحتى لو گال لبن أربيل أسود الناس تصفگ له ويگولون هو دا يشوف أحسن من عدنا، بس العم يوجي ما يعرف يتصرف ولا يستفاد من علمه ، خطية ياباني وما يعرف شغله، طلب من فريق عمل لأبحاث الخلايا الجذعية التابع للمعهد مالته يسوون مؤتمر صحفي ، حضر هو المؤتمر ووگف على الإستيج ومسك المايكروفون وگال آني آسف !! إي آسف لأن فريق الخلايا الجذعية نشر تقرير غير دقيق بيه أخطاء علمية !!! وأنحنى للحضور بطريقة إنحناء إلا أشوية يبوس قنادرهم في طيحان حظ يليق بالياباني ، بس زين باليابان يلبسون جواريب ما تطلع ريحة، يابة على شنو تعتذر!!..التقرير إنشر والعالم صفگوا للفريق والمعهد إللي أنت رئيسه !! لا هذا ياباني غير شكل ، أعتذر وظل منحني للحضور حتى سامحوه وطلبوا منه يستعدل…طاح حظه يرادله معايشة عد ربعنا حتى يتعلم الصلافة وحتى يتعلم يلبس وجه الچينكو حتى ما يخجل ولا يستحي، والمصيبة أن العم يوري مو هو إللي أخطأ ولا هو إختصاصه الخلايا الجذعية بس شنسوي، لواگة يابانية گال بلكن هاي المرة ينطوني جائزة نوبل للسلام لو للصدق ، ولو آني كعراقي آصيل أبو بكر سالم أرشحه لجائزة ” شلك بيها” العالمية اللي هي أهم من جائزة نوبل وتصدرها مؤسسة ( الشعليانيزم) العراقية الرصينة إللي عدها مقرات فرعية في حوش وطارمة كل بيت عراقي.
والمسؤول العراقي…هيبة وعلى گولة أحمد الخليل الكردي أيام كرد وعرب برايا “جبل يا هذا العراق العراق العرااااااااق ما تهزه العاصفة”.. يسوي الغلط ويغلط بالقول والفعل  ويگول حرامات ليش ما صرت مسؤول من زمان چنت أسوي غلط أكثر وأكثر، إنما الأعمال بالأغلاط وإنما لكل مسؤول ما غلط ، كلما أغلاطه وأخطائه أكثر وأكبر راح يصير أهم والناس راح يگولون هذا يغلط لأن دا يشتغل !!! من طاح حظ الناس إي والله !
الأخطاء والأغلاط صارت ثقافة بهذا البلد، من تصير عدنا مشاريع لو خطط، نخلي هامش الصح والبقية غلط، عكس العالم، هامش الخطأ شي صغير والبقية صح !! إحنا حياتنا غلط، عيشتنا غلط، تعاملاتنا كلها غلط، من هذا يحكمنا الغلط والجاي بفعل غلط وبأسلوب غلط ويتعامل معانا على أساس غلط في غلط، نغلط ونستغلط ونغالط ونتغالط ، إللي يغلط يتعلم، بس عدنا إللي يغلط يگول هاي مو خوش غلطة خلي أحاول بلكن أغلط أحسن ! ومع هذا، ما فرد يوم طلع حاكم أخذ من خاطر المحكوم، والمحكوم ما فرد يوم حاول يشوف الأمور بغير طريقة حتى يعرف إن هو في ساحة كللللللش چبيرة من الغلط، وإللي يعيش بنص الغلط، يستلذ الغلط ويحترمه ويحبه ، ما فرد يوم حاول الهروب من هاي الساحة، الهروب منها ما يتطلب جناح للطيران بس يحتاج الإعلان بأن الغلط صار ما ينجرع، وهذا يبدا من الإحساس، بس إذا الإحساس داخل حالة الغيبوبة المصطنعة بسبب إستنشاق الغلط وهو غاز أقوى من البنج والتخدير، فهاي الحالة تتطلب مسح كامل لكل شي موجود ، وهو قرار صعب، بس مطلوب لترك ثقافة الغلط وإحترام الغلط !
إحنا عدنا إللي يضيع بنالتي في مباراة النهائية على كأس رئيس العشيرة نگول خيرها بغيرها، لا…ماكو خير بالضياع، اللحظة ما تتكرر، ماكو غيرها ولا راح تجي نفس الحالة حتى نگول راح نحاول ما نضيعها، وهاي مشكلة، نستسهل الفشل وبدال ما نقر بالفشل نگول…خيرها بغيرها.
مقهور جداً على العم روجي نويوري لأن ياباني! هذا لو عدنا چنا ندخله في صفحات كتب التاريخ ، كلما نفتح من التاريخ صفحة، نضحك ونگول طاح حظ اللواگة والفطارة، ونخلده بالتاريخ ونسولفه من جيل إلى جيل بس هذا الخايب الله صدگ مطيح حظه…فوگ ما هو ياباني…عالم بالكيمياء وفايز بنوبل وعنده معهد علوم…فوگ كل هذا…محترم…شلون طيحان حظ ! لو عدنا…چنا نگول له ” گوم ولك أبو الهگلگ…إبن الهستبري، مسوي نفسك شريف هوندا علينا، ولك كلك بطرگ ياماها وسوني، عوفك من سوالف گريندايزر، روح شوف الناس شلون عايشة، الناس صارت تبيع صبغ قنادر على أساس ماسكارا، وتبيع كيوي على أساس بطاطا مال أسكيمو..” .
بس الفرق واضح جدا بين (الياباني)..وبين : (يابا آني) جيت وتعبان أريد أنام !
سكووووووووووت…لا حد يزعجني
[email protected]