وبعد وبعد وبعد….كل علات الدنيا براسنا..من البواسير والتضييق والتصغير والتكبير والتبييض والتفقيس والتفريخ والتلزيگ والترگيع…النوب شغلة جديدة طلعت بينا.
من أسبوع أو من خمس سنوات مدا أتذكر صرت ما أتحمل أسمع اي خبر، ولا أقرأ اي خبر حتى لو كان خبر أعتزال ميسي أو ظهور عزة الدوري في غابات مدغشقر ، مااااااااا اريد أي خبر حتى لو يگول الخبر أن العراق دا يصدرحبوب كهرباء…تحس نفسك تعبان وما عندك شحن…تروح تبلع لك بدال الپاراسيتول حبايتين كهرباء ويصعد الشحن…لو تذوّب حبايتين بگلاص ماي وتديره على سويچ الكهرباء المطفي يرجع لك الكهرباء لمدة ست ساعة (كل حباية تنطيك كهرباء لثلاث ساعات – مجرب رواه أبن الفولتية).
ولان الوضعية عاوية گلت لازم أعرف السبب… وشنو السبب وليش مدا اتحمل اي خبر…والله طلعت من الطشت إللي چنت گاعد بيه حتى ألم نفسي زين ورحت على طبيب أعصاب أعرفه من چان جندي ضابط مجند ! لأن شغلة الأعصاب مثل العرض ، والستر حلو بهيچ مسائل رياضية ولازم واحد من الثقات وما ياخذ بالحديث الضعيف ! دگيت الباب ودخلت…شافني وفزززززز وأرتبك…گال لي خوفتني عبالي مرتي وكبستني…وشفت رأساً غلق الجلاكسي مالته وجر السحاب…يجوز كان فاتح موقع مجلس النواب ؟؟؟ هذا سر ما عرفته ولا راح اعرفه !
وبعد الموسيقى التصويرية للترحيب النفاقي على مقام ” الله بالخير”…گال لي : ها خيرك ؟
گتله الشغلة واحد ثنين وثلاثة…شوفي لي چارة أريد اسمع أخبار البلد السعيد … لأن الواحد بلا أخبار مثل الجريدة المامطبوعة…صفحات مصفطة…گال لي : إنجطل ! أنجطلت !
وبعد الفحص گال لي ألبس قميصك والفانيلة …للعلم بس نزعت القميص والفانيلة مو عبالكم الشغلة مثل شغلة البواسير !! وگعد وجر له جيگارة عبالك بالگهوة…ونفخها بوجهي بدون ما يگول لي تفضل…گال : يابة انت شغلتك وي العواهن !!!
شنوووووووو؟؟ فيروس لو بكتيريا لو إلتهاب ؟
گال: هاي حالة تجي وي الديمقراطية من تكثر الاخبار والتصريحات ، تطلع لك عواهن داخل أذاناتك ويگوم كل خبر يمر على عواهنك قبل ما يوصل لأعصاب الدماغ ، فيتحول الخبر من الكلام العادي إلى الكلام على العواهن !
وأضاف سيادته قائلاً:
من كثر ما سامع أخبار من غير ما تعرف مصادرها …وكل خبر على عواهنه…جايتك متلازمة العواهن !! وهسة ما أگدر اعالجك لان أي علاج ما يفيد وي وجود الديمقراطية وأنت تعرف إحنا بلد ديمقراطي والكلام متوفر والاخبار شتريد موجودة!
وطلعت من عنده وحسيت كلامه كله خريط…عواهن شنو وتسواهن شنو وعلاهن منو هي ! وهناك شفت رجال مشورب لابس أفندي وكاشخ واگف بزاوية ومتنكب سلاحه الشخصي ولازمه ودا يبول بيه !..صحت عليه…يمعود سلاحك كله طالع برة وصاير شوفة سبيل للناس…أشوية روح ليغاد وأخذ راحتك وبول مثل ما تريد! باوع عليّ وگال: عمي لا تخربط بالحچي انت ياهو مالتك لو هوت ميل مالتك !!… لا تگول كلام على عواهنه ! وأستمر بمشاهدة نافورته الشخصية بكل بهجة وأستمتاع ويسوي زخارف عالحايط !
هناك عرفت أن آني صدگ مصاب بمرض العواهن…والمصيبة إذا واحد ينصاب بالعواهن يبين عليه والدليل هذا الأفندي رأساً عرف بي مصاب بالعواهن ودا أگول كلام على عواهني !…گلت يجوز صدفة…مشيت وهناك شفت واحد أبو كرش بتي شيرت أحمر لازگ على بطنه لابس بنطرون عريض وبنص الشارع مد أيده بين رجليه داخل بنطرونه وسنتر قلاقيله و عبالك ما خذ راحته بغرفته الخاصة ! صحت عليه : عمي رحمة على درب الهوى ومديحة كامل أشوية أحترم الناس والشارع !!!
حسيت راح يطلع شي من حزامه وشلعت لا يطلع مثل جماعة الويلاد وحاط مسدس صفح…بس سمعته صيح علي ّ : امشي لك أبو الهستبري…صاير مثقف براسي…و أحترام شارع؟..أمشي أبو الاحترام…كل من قرا له سطرين جاي يتفلسف براسي ويطلق كلام على عواهنه !
لاااا …والنعل رحت بالزلگ. لعد مو صدفة…آني مصاب بالعواهن…خلاص..وهاي متلازمة مرضيةSyndrome …شي يجر شي …يمعودين خلوني أوصل للبيت قبل ما تجي الحالة الثانية ويجوز يصير بي فقدان ذاكرة لو أتفل على عواهني لو يجوز حتى راح أسوي على عواهني. أوگف تاكسي…وأصعد…أشو السايق يحچي على عواهنه : هاي مو راحة اعرفها وإذا تريد أجيبها إلك……هذا الگوگو مال هالطرف صديقي…أعرفه…كل اسبوع يدزلي قائمة ..الكهرباء هالأيام أحسن لأن صلحوا المجاري..! أها…عمي أضرررررب…شكلك موظف وراح يجيكم راتب إضافي عيدية عالعيد ! هاي كلها فيكات أنتخابية…ولعلمك إحنا داخلين بحيلنا في الإنتخابات الجاية !
گتله: منو أنتو؟؟؟ سواق التاكسي ؟
گال لي: لا إحنا راح سواق البلد وراح نسوق البلد !!! عبالك دا أطلق الكلام على عواهنه !!! صدگ مطفي !
گتله : نازل يمعود…اشو كل شي صار عواهن!
نزلت…أشوف پوسترات مليانة كلام على عواهنه…شعارات…. شعار لحزب على عواهنه…صورة واحد كلش اعرفه…بس هاي أول مرة أعرف كلامه كله على عواهنه !
وأول ما وصلت البيت…رحت على المطبخ…أم الجهال دا تطبخ باميا…من غير ما تباوع علي : ها خيرك شنو گال الطبيب ؟
گلت : قبل الطبيب….سمعت راح يوزعون راتب إضافي عالعيد ؟؟
فتحت عينها مثل البومة… وأول مرة أسمعها تعرف تعفط …طيييييططططططط…وراه ضحكة رقيعة : عزززززززاااااااا گمت تخربط وتطلق إشاعات وكلام على عواهنه !
[email protected]
