من حق الحكومة أن تفتخر بإنجازها الوطني وحصول العراق على المرتبة الاولى على مستوى الطوبة الأرضية والمريخ بحسب التقارير إللي إجت من المريخ وتؤكد هذا الإنجاز ، أصلا وكالة ناسا تگول أن فكرة نزول أول مركبة على المريخ چانت لتكذيب خبر الإنجاز العراقي، بس خاب فأل الأعداء…والله أكبري وليخسأ الخاسئون .
فالحكومة العراقية وبأستخدام دليلها الدستور الفيدرالي المناطقي حولت العراق من دولة تتعارك وي نفسها وتخلق أعدائها ، ومن دولة ثورية تلفت خزينة العراق ومليارات العراق لكينيث كاوندا وساموا ميشيل وجبهة إنقاذ بعوضة الملاريا  من الإنقراض، إلى دولة تخبل، ريلاكس، دولة سياحية بعدد نجوم ما تنحسب إلى درجة أن نجوم السما ما كفت فأخذوا النجوم من العَلـَم. دولة بس تريد تتونس، دولة من كثر أفراحها وأعيادها ما گامت تكفيها أيام العطل فگامت تنتج عطلات وتبدع بيها وبموديلات جديدة للعطلات تناسب كل ذوق وديانة وعقيدة وطائفة ومحافظة، وتناسب الأموات والأحياء السكنية ومختار العصر ومختار المحلة.
العراق صار وكالة سياحية للعطلات، تريد عطلة وتاخذ عائلتك وتتونس ما لك غير العراق. خذ شتريد من عطلات..عطلة دينية، روح لمكاتب وكالة العراق في النجف وكربلاء وأخذ لك كوشر عطلات إلعب براحتك. تريد عطلة إدارية عندك محافظة بغداد وبابل والديوانية والسماوة وو..ووو….و..، روح لوكالة العراق للعطلات بأي محافظة بيها مجلس إدارة أخو خيته ويعرف شلون يدلل أبناء المحافظة وراح تحصل على أنواع إجازات فانتاستيك وأوريجينال. تريد عطلة مدرسية، أوووووووووووو أرخص أنواع العطلات، روح إلى وكالة العراق للعطلات بأي مديرية تربية وبأي جامعة وراح تحصل على أسبوعين عطلة وياه هدية خمسة أيام مع عدم إحتساب سنة رسوب.
 تريد عطلة قومية، روح أربيل والسليمانية وشوف لك مجموعة من العطلات القومية مع هدية كراس شعارات مجانا مترجم إلى اللغة البشتونية. تريد عطلة سياسية بسيطة، روح مكتب وكالة العراق للعطلات بأي مقر حزبي وراح تحصل على موديلات عطلات تتناسب وي كل قندرة، قبغلي لو قيطان، فلات لو كعب عالي، بوت لو صندل مع درزن جواريب ما تطلع ريحة بعز الصيف وماكو كهرباء.
تريد عطلات أمنية، ماكو احسن منها، أنواع ونكهات مختلفة بحسب مكونات الحالة الأمنية، شتريد، مجاميع أرهابية، لو أيتام أزلام، لو هروب من سجن تكريت، لو دخول ستين سيارة مفخخة إلى بغداد، لو نعال مفخخ بالكيشوانية لو عركة على لفة فلافل في كافتيريا مجلس النواب بين الأعرجي والملا لأن أبو الكافتيريا تلوگ للاعرجي وحاط له عنبة زايدة باللفة وما خلا أي عنبة بلفة الملا.
تريد عطلات برلمانية، همين تدلل، روح لمكتب العراق للعطلات بباب إستعلامات مجلس النواب، أخذلك عطلة حج، عطلة يوم الچفچير، عطلة وفاة أبو بريص، عطلة أنفلونزا النواب، عطلة شهرية للنائمات دون خمس وأربعين سنة…عندك قائمة طويلة بس أشر وراح تصل على عرض خاص للعطلات قابلة للتمديد بحسب بيان إيراني أو سعودي أو تركي.
بعد شتريدون يا عراقيين يا إللي ما تخافون لا الله ولا أميركا ولا بابا خامنئي ، شتريدون بعد كل هذا الإنجاز السياحي (السياسي سابقاً). أشو كل السياسيين صاروا سياحيين، وكل من كان يشتغل بالسياسة صار يفتهم بالسياحة ودليل سياحي يعرف يتكلم بكل لغات العالم، بداية من  دول الجوار الحبابين جدا، اللهم إدم علينا هذه الجيرة الطيبة إللي نشكرك عليها والحمد لك ما خليتنا لا وي سويسرا الباغية ولا وي النمسا المتغطرسة (لفهم معنى المتغطرس..راجع أدبيات الأزلام – المؤتمر القطري الخامس).
صرنا دولة سياحية، مدا نلحگ عالعطلات، اشو عطلاتنا كلها نسبة إشغال مئة بالمئة والناس دا تنتظر عطلة على وايتنگ لست. وصار كل رئيس حزب سياسي صاحب مكتب سياحي يوزع عطلات براحته، وصار كل محافظ صاحب مكتب سياحي يفصل عطلات محافظته بحسب مزاج حزبه مثل ما صار بكركوك، الدكتور نجم الدين كردستاني مو عراقي، ولازم ينفذ أوامر كردستان مو أوامر الحكومة ، أعلن عطلة بكركوك بسبب أعتراض الكردستاني على قوات دجلة العراقية مثل ما سمعنا بالاخبار ومثل ما كتبت لي قارئة من كركوك، وباچر راح يطلع إلنا محافظ الموصل وينطي عطلة لمدة أسبوع بسبب المؤامرة على حجم كبة الموصل، وعطلة بالنجف إحتجاجا على حكم مباراة نادي النجف وكربلاء في المبارة الخيرية إللي إنتهت بفوز نادي كربلاء بضربات الهريسة الترجيحية مثل ما كتب قارىء چان حاضر اللعبة وحلف بألف جدر قيمة أن الحكم چان كلش متحيز لكربلاء.
إخواني العربنجية الكرام البررة
أريد تشجيعكم لان راح أقدم اوراقي (عربنجيون بلا حدود) إلى مفوضية الإنتخابات حتى ينطوني موافقة أفتح مكتب سياحي، وأعلن رحلة سياحية إلى آثار دولة چان أسمها العراق….هذا إذا أهل الخير تركونا چم حجارة بلكن نقشمر نفسنا بيها، ونگول هذه آثار العراق.
[email protected]