يمعودين …لو تروحون تچيكون وتفحصون عيونكم لو تبطلون تشربون الچاي، ترى الشغلة صارت كلش ماصخة وما بيها معنى ، هذا الخوط بصف الإستكان نريد تبطلوه، ترى عيب علينا.
هسة ماكو داعي للخوط…ليش ما تشربون الچاي بلا شكر !! الشغلة حيل صحية أكثر من صحة وعافية وزيرة الصحة إللي هي بوحدها ماخذة عافية كل المرضى بمستشفيات العراق، وفوگاها صارت وزير الصحة والبيئة…إستلم خوش إصلاح…بدال ما چانت ماسكة وزارة وحدة صارت ماسكة وزارتين دمج، إي على حجمها تريبل إكس !
بداعة إللي عنده عدكم داع، وبكرامة المكرمين وبعمامة ذولاك إللي ظلهم الوارف يشتغل حتى لو بالليل عبالك شادين گلوب هالوجيني، أسألكم سؤال بلا ترك ولا رحمة : منو أكثر عيب بلاع الخير لو بلاعة الـــ ع ــــ ير ! مو خلصتو كل خير البلد وبلعتوه، أشو مو عيب ولا الشغلة تهدد قيم وتقاليد وأخلاق ومقدسات الشعب العراقي ! بس الشغلة من تصير بيها مص وبوس وجاجيكيات ودرنفيسيات تصير الشغلة تمس وتهدد قيم ومقدسات وأخلاقيات الشعب العراقي ! ولكم ما أعرف شنو لأن كل شتيمة أصغر منكم…هو أنتو بقيتوا أخلاق بالوطن ! حسبتوا حساب وطلع چذاب على رأي محمد الشامي ؟ ولكم أنتو لا حساب ولا عتاب… وما عدكم حيا حضوري للوطن ولا لأي شي بالوطن…هو ليش بقى شي ! هذا الوطن إللي إنترس من الترسية أمثالكم ولد الترس (راجع قاموس اللهجة البغدادية لتعرف معنى الترس) …الوطن إنترس ذكريات سودة بسودة سعيكم وأعمالكم، ولكم ما تستحون أحسن إنجاز إلكم هو توسيع مقبرة وادي السلام ؟؟؟ هنيالك علي العمية الدفان على هاي الحكومة ! وإفتتاح ملحق الطب العدلي لإستلام عدد أكبر من الجثث المجهولة !! إي عفية عليكم توقفنا نستورد الجثث من الهند والنيبال لكليات الطب…هسة عدنا إنتاج محلي، ومو بعيد بدرس التشريح يجي طالب طبية ويشيل الشرشف ويبدي بالدرس وهناك يصيح… ” أخوي..هم زين لگيتيك..صار إلنا ست أشهر ندور عليك “…ويصير الدرس حفلة …لأن لگى أخوه بكرامة أستاذ التشريح إللي طلابه يصيحوه مولاي ! سلوات .
هسة كل هذا الخريط والهوسات وجيب الليف ودي الليف طلعت المشكلة والخلل بالمواقع السكسية !! تذكرت بأيام الحملة الإيمانية لعبدالله المؤمن صار البوس ممنوع عالشاشة، وصرنا نشوف الرجال من يريد ويقترب من حبيبته حتى يبوسها تجي له نتلة كهربائية ويبتعد خمسة أمتار ، والولد إللي چانوا مراهقين بفترة
الحملة الإيمانية كبروا وعبالهم البوسة هي هيج، واحد يلزم إيد إبنية ويقترب من شفايفها وبعدين يوخر ويدگم دكمته ليش ما يعرف ! بس لازم يدگم..هاي من مسلتزمات البوس بحسب ما شاف بالتلفزيون…صرنا نشوف حسين فهمي في فلم ” بريق عينيك” يقترب يبوس مديحة كامل وتجي له نتلة ينشمر ولا شمرة شورة العباس. ولكم هسة أنتو شنو فرقكم عن ذاك تاجر النعلان إللي صال وجال بالكلاوات ! مو أنتو على أساس غير شكل ، أشو نفس الخرية لا وفوگاها خرية تتجدد كل يوم مو مثل ذاك، خرية وحدة ظلت طول العمر تعودنا عليها وعلى ريحتها وشكلها وحتى طعمها حتى زوال الأسباب.
ولكم الغشمة …هسة الكل مفتحين ببرامج الأنترنت والكل يگدرون ينزلون أي شي يريدوه من الأنترنت…كلها يومين وتشوفون كل المواقع إنفتحت ببركة برامج فتح المواقع المحظورة…كثر الله من أمثالها، هاي الله قدركم عليه !! بعد أطنعش سنة من البحث والتدقيق والتمسلت إللي وصل حد الكونفوشيوسية وحتى خلينا المارد بالقمقم وتالي طلعت مشاكلنا في الكهرباء والماي وكل البوگ والرشاوى والسرقات وداعش وكتائب الموت كلها من ورا السكس ! ولكم لعد أنتو شلون جيتوا للدنيا ؟ شنو بابا جاب قاشوگة وچب بيها وبعدين گال لماما أخذي هاي القاشوگة ودخلي للحمام وديريها في مهبلك الشريف ؟ يجوز ليش لا…من هذا كلكم طلعتوا خرية ، ولاد التواليتات والمرافق الصحية والمراحيض ودورة المياه ودبليو سي…من خرة بالحظ من ولاد دبليو سي إلى ولا بي إم دبليو !!! شلون حظ مال الگحاب.
أقسم بكل شي أحبه…هاي المواقع إللي أنتو تسموها ( إباحية) فائدتها أكثر وأكبر من كل خطبكم وكلماتكم وشعاراتكم، هاي المواقع بيها جمال، بيها مشاعر، بس لا يطلع لي واحد ويگول مواقع شهوة حيوانية ! لان راح أگول له ولك حيوان أبن الحيوان، لعد أبوك چان حيوان من نام وي ماما وچب برحم ماما ولقح بويضة ومن هاي البويضة الحيوانية جيت أنت…صار معلوم ! مواقع بعيدة عن الطائفية والمحاصصة والحزبية، لان ما أعرف إنتماء أي وحدة من ممثلات البورنو ولا ممثلي البورنو، أصلاً شي يهمني أعرف شنو من يا عمام، المهم واحد يتفرج ويتونس، مو مثلكم، كلكم إنتماءات مريضة وكلكم لا تنتمون إلى دائرة الوطن…فالوطن مجموعة خالية بحسب ما تعلمنا في درس الرياضيات الصف الثالث الإبتدائي…ينتمي ولا ينتمي…مجموعة خالية..
ملخص الحچي…إن شاء الله كلكم تنصابون بالشكر وتضطرون تشربون چاي بلا شكر…حتى ماكو بعد خوط بصف الإستكان!
