في مقطع من مسرحية نسيت أسمها في زحمة المتلاطمات والمتعاقبات والمتواليات وحتى الزاحفات، أكو فرقة طربگة مال عرس، تجيهم مكالمة عالتلفون الأرضي أيام كان التلفون أبو القرص وكان الخط الأرضي هو الروح والرية وبسبسات الليل وأسباب الآذية وزعل البنات ، نسمع صوت بالمكالمة يطلبون الفرقة لعرس شعبي، فيگوم أبو الفرقة يتفلسف بالطلبات ويضرب بالعالي مثل أبو المعالي إللي تالي طلع العالي مالته حفرة ! ، المهم، مدير الفرقة يتصور لازم يحچي بالتماهي والإرهاصات وينبغي وطراز المرحلة والتداخل المعنوي في اللاوعي فيطلب ” باقلاء بالدهُنِ مع بيضتان طق ! وقليلٌ من البُطنُق…” ويأخذه الواهس فيكمل “… مع الرارنق !” عباله الرارنج همين لازم بالقاف على أساس من أهل المدينة مو يگلب الباقلاء إلى باجلا، فيجيه الرد بالتلفون والصوت كل الجمهور يسمعوه : قبررررررررررر ! أبو الرارنق !
هسة جماعتنا حالهم حال هذا أبو فرقة الدنبك والزنبلك، فالجماعة عبالهم أي شي ممكن يجيبون خلية وتحله، شتريد تدلل جيب مشكلتك ولا تشيل هم ولا جالي بابا غنوج، الحكومة الرشيدة تطلع لك خلية أزمة مچودرة ومقبغة وبعدها بكاغدها وتنطيها مشكلتك وتعيش ، راح تنساها بس هي المشكلة ما راح تنساك، ، أي مشكلة لا تقلق، عدنا خلايا تاكل المشاكل أكل عبالك تيزاب (وممكن بالطاء همين ) ، أي مشكلة بس نخلي يمها خلية أزمة…يا ستار…دقائق والمشكلة تذوب، والتيزاب يبقى، هاي الخلايا من تتشكل بعد هاي الله كاتبها علينا، تخصيصات ومكافآت للخلية حتى تكبر وسيارات تاهو وغلق شوارع حتى تشتغل براحتها، وتگوم الخلية تبلع وماكو شي يطلع منها حالها حال بالوعة، وفي رواية ثانية بلاعة..أيهما أقرب للشتيمة إللي تريحك.
الشغلة صارت مال الكشخة، إلى درجة إللي يسمون أنفسهم المسؤولين يسوون أزمات ومشاكل وبعدين يشكلون خلية أزمة ويكرزون جب شمسي قمر ويكشخون براسنا، حالهم حال إجتماع قمة، وتعالوا شبعوا ضحك على طاري إجتماع قمة، من نگول على لقاء بين الرئيس الصومالي والرئيس الجيبوتي إجتماع قمة، لأن أول مرة الناس سمعت وقرت بالجرايد تعبير ” قمة ” كانت لأجتماع بين جون كنيدي وخروتشوف في أربعة حزيران سنة واحد وستين وتسعمائة وألف في فيينا، ثنين صدگ قمة، كينيدي بأسلوبه المتحمس وإندفاعه الشبابي وخورتشوف قمة في الإستفزاز والمناورة، هيچ تصير قمة، مو تجيب لي موحافظ فاشل يجتمع مع واحد حتى هو ما يعرف شنو شغله ونگول إجتماع قمة، وداعتي الغالية هاي إجتماع قمامة مو إجتماع قمة.
يابة
إحنا قرينا بدرس الأحياء أن أكو كائنات أحادية الخلية من كيفها تشتغل وتتكاثر، بس لا هاي خلايا الأزمة هي من هاي الكائنات، لأن شلون ما أشوف بيها كل مواصفات كائنات أحادية الخلية، تتكاثر بكيفها، شوف ، خلية أزمة النفط، خلية أزمة الكهرباء، خلية مجزرة سبايكر، خلية أزمة بواسير الحجي، خلية تضييق الكسكوس مال أم فلانة خفاظاً على سلامة موقفها الفراشي والزواجي وإدخال البهجة للزوج ، بس آني ما مدوخني غير خلية أزمة لذاك الرجال إللي طلب تخصيصات لتبييض منطقة كسكوس حرمه الشريفة، هسة ليش أكو أحد غيرك يشوفها وتستحي من لون المنطقة الغامق ! ترى الشغلة يرادلها گعدة عرب وباشوات وحتى كاكاوات لأن الگعدة ما تصير إذا مو كاكاوات بالنص، مثل الأكلة ما ترهم ولا لها طعم بدون لبن أربيل…ماستاو أربيل خوش ماستاو. كل يوم عدنا خلية، خو أكو خلية إسمها خلية إدارة خلية الأزمة ! مو هي الخلية بوحدها ما تعرف تشتغل ولازم أكو خلية تگودها ( شاطرين بالگوادة) وتضبط أموراتها، يعني من الآخير، تصير عدنا سبحة أم المية واحد مثل مال مام جلو (مشتاقين) …سبحة مال خلايا وبيها شاهول عبالكم خازوق، بس فنك تعرف هذا الشاهول بيد منو !
بس لو نجي ناخذ أي خلية من هاي خلايا الأزمة، ونخليها جوة الميكروسكوب ( مرة طلع مسؤول كلش چبير يمكن قياس ثلاثة وأربعين وقبغلي وگال نفحص الميكروبات بالتلسكوب ) المهم، نخلي الخلية جوة الميكروسكوب شراح نشوف ؟ راح نشوف بداخل الخلية السايتوبلازم مالتها كله دم، دمي ودمك، هاي الخلية طفيلية تمتص دمي ودمك حالها حال الگراد والگمل، هاي ما تعيش إذا مو إحنا ننطيها دمنا ونضيّفها بجسمنا، هسة عرفتوا شنو الموضوع؟ الموضوع هاي خلايا الأزمة إحنا أساسها، وعايشة على حياتنا ، لو مو إحنا ننطيها دمنا ترى ما تعيش، بس حتى يستمر الدم يجي هذا إللي بيده شاهول السبحة ويجيب السچين وعالوريد..حتى ننزف وتتشكل الخلية. لو نفتهم…إي من دبش نفتهم، لو نفتهم ننطيهم سم وزقنبوت بدال الدم وخلي نشوف شنو حال الخلية بلا دم؟ ساعتين ما تعيش، بس جيب راس إللي يفتهم. خو إحنا اليوم إللي ماكو خلية نذبح بعضنا ونخلي دمنا باجمل الاكواس والكؤوس ونقدم الدم لصاحب الشاهول حتى تتشكل الخلية. صحة وعافية على گلبك…تريع وإحنا نگول أفيشششششششششششش.
يا ناس عوفونا من الخلايا، ما نريد خلايا وخرة بدرس الأحياء، مو خلخلونا من كثر الخلايا، الوضع صار مخلخل، وصارت خلال وماسافات بيننا وبين باقي البشرية، وكل العالم صاروا آوادم، وإحنا بعدنا حايرين شلون نتطور من الخلية إلى نسيج وعضو وروح دولة، هسة لو تجيبونا خلية جذعية وتتشكل مثل ما نريد بيها باب وجواب، مرة نسوي منها كهرباء، ومرة نطفي بيها الگيزر، ومرة ننطيها للمارد المعنوي حتى يلتهي بالقمقم وما يطلع ويزعجنا، ومرة نسويها تفلة بگصة أبو الگصة، مو جايبين خلية خاملة هي حايرة بروحها، بس شي نسوي، الفساد وصل للخلية ونواة الخلية وتشكيل الخلية وإستيراد الخلية ومحتبرات زرع الخلايا.
هسة مو حقنا نگول مثل هذا أبو المسرحية : قبررررررررررررررررررر وبصفه حفرة…بكيفكم حفرة لويش..بكيف اللاعوب.
