عندي مشكلة عقائدية، مدا أتشاقى، وهاي المشكلة مسببتلي  كآبة شكلية چهروية ومزاج غير إنفراجي.
هسة ياهو يشوفني يگول لي حجّي لو مولاي ! وآني لا هب بياض ولا دوشيش، شيللي بهاي الشغلات، يمعودين آني ما أعرف هاي الدرابين ولا أفلام هيتشكوك القبرية ولا القدرات البارباشاطرية في عبور خيط الشعر عالصراط، آني عايش يومي بالموجود، جاي أدفع الساعة دفع حتى يخلص اليوم.
بس من وين طلعت لي شغلة الحجي والمولاي؟ جاييكم بالحچاية.
تدرون السعادة تخلي واحد يتدروش، ويدخل حالة من هيستيريا الشكر على السعادة الخاصة بالعايشين بالعراق نسميها حالة شوفلكحايطانيزم، وهي حالة نادرة ما موجودة غير بالعراق بسبب التركيب الجيني و DNA مال الناس العايشين بالعراق (لاحظ عزيزي المشاهد آني بطلت أگول الشعب العراقي أو العراقيين) ، ولأن ماكو موديل ولا مستوى سعادة بأي مكان بالعالم مثل ما موجود بالعراق والدليل حتى نسوان إيران اللي يشگن المطي نصين ما يحلمن إلا بشاب عايش بالعراق مليان نشاط وسعادة وما يدردم وأقصى ما يگوله من يصير عصبي هو آيبااااااااخ . وحالة شوفلكحايطانيزم حالة تجي دائماً في حالات المقارنة، مقارنة باللي چنا وچانوا، وي وين صرنا وصاروا، بعد هيچ مقارنة يحس اإللي عايش بالعراق أو الإستعراقي بالنشوة والسعادة وينزل هرمون السعادة سطولة، من وين لا تسأل ! ويصعد الأدرينالين ويگوم يشوف نفسه يگدر ينطح أي حايط من السعادة، هسة الحايط شنو ذنبه ما أدري بس هيچ مكتوب في إجراءات التمتع بالسعادة بحسب المواصفات العراقية .ويتدروش گدام الحايط إللي أمامه ويشتغل الدگ … والله… طخ طخ طخ طخ عالحايط، أدري هو راس لو جاك همر !
وآني تجيني حالة شوفلكحايطانيزم كلش هواية بسبب خلل هرموني تخليني أحس بالسعادة بإفراط ، فأربع وعشرين ساعة عندي دگ وأطخ راسي بالحايط، من هاي هسة گصتي عبالك مال واحد يصلي باليوم ألف ركعة طويلة المدى مثل مال التراويح على طابوگة عبالك ورق سمبادة، فصرت حجي ومولاي من ورا السعادة رغم آني ما أعرف هو المراسل الأخبار من يگول مراسلكم من أرض الحدث هو يقصد الحدث الاكبر لو الحدث الأصغر !
هسة أريد حل ، والحل لازم بإتجاهين تو سايد، اي وداعتكم، يعني آني ما أريد أخسر إحساسي بالسعادة وحالة شوفلكحايطانيزم، لأن ما أعرف حالة غيرها ولا أصدگ أكو واحد إستعراقي يگدر يعيش بلا هاي الحالة نتيجة لكل هذي الطاقة الإيجابية الموجودة بالعراق إللي تخلي كل شي سعيد، إلى درجة الخروف بالعراق يروح للذبح وهو يغني مرحباً يا معارك المصير ! وبنفس الوقت ما أريد أحد يصيحني حجي أو مولاي لأن هاي الشغلة كلش تسبب لي لعبان نفس مثل واحد حاط راس أبو بريص بالعلج ودا يعلج وكل أشوي يخلي العلج جوة سنانه، أريد گصتي صافية مو مال واحد يگطع باليوم خمسين سجادة صلاة ويستهلك كرتونة تربة أصلية . دا تشوفون شلون مشكلة عقائدية ! ولا مشكلة ذاك الرجال نائب رئيس وزراء والخايب الدولة مالته صارت أول دولة بيها زواج المثليين، مثل آلتون جون، رجال برجال أو وحدة وي وحدة مثل هواية بس همين الگاع محظورة ما أگول مثل منو بس هن مبينات بالشفايف إللي عبالك شفاطة حتى تشفط الأشياءات بالأمور الأسفنيكية ، ويگولون هسة ذاك الرجال بس يشيل إيده بمجلس الوزراء ويشتغل الغمر واللمز خاصة هو خوش أحمراني ولحم شهي، بس ما أعرف هو راح ونطى صوت للإستفتاء مال إيرلندا لو لا، لأن هو ديمقراطي وأكيد يؤمن بحق تقرير المصير حتى بالشغلات الجاجيكية تحت اللحفانية….والحچي بيناتنا الشيخ البواسيري كان له دور وطني في إنجاح إستفتاء إيرلندا دعماً للأطباء المتخصصين في جراحة البواسير.
وطبعاً حالة شوفلكحايطانيزم تحتاج إلى مؤثرات صوتية، لازم قبل ما تدخل لهاي الحالة الإيمانية التي تدل على إيمانك بمبادىء الثورة والحزب وهذا الكتاب الذي بين يديك هدية الثورة إليك، أولاً لازم تفتح قناة العراقية تحديداً وإذا ما عدكم ترددها خلوا رقمكم بالكونترول بعدين أتصل بيكم وأنطيكم التردد، ولازم تصريحات البمبوني سعد ، إللي خلانا نترحم على الكذاب الأشر قاسم الططوا، وأفتح اليوتيوب على أغنية قناة الشباب طم طم طخ طخ طاح طاح حظكم…وبعدين إدعيلي، شوف شلون راح تدورش وتصعد عندك السعادة وتجيب سطولة وما تلحگ ( ملاحظة: يفضل تدخل لهاي الحالة وأنت ما لابس أشياءات داخلية حتى تترس سطولة براحتك).
أگول
أنتو همين أهل وماكو مستحى، ترى صعد عندي الهرمون وراح أبدي أتدروش….يا الله…وين الحايط !