لو صدگ يريدون يبنون…ولو صدگ يريدون تغيير…چانت الحكومة الجديدة تكون حكومة تكنوقراط مصغرة فقط تتكون من الوزارات الآتية:
وزارة البنية التحتية : لإعادة إصلاح الكهرباء والماي والمجاري والطرق والمستشفيات والنقل والإتصالات والتعليم وقطاع الخدمات
وزارة الدفاع: حتى ترجع الأراضي المغتصبة (هذا مصطلح مال قناة العراقية…صرنا دولة عدنا بداخل الدولة أراضي مغتصبة…يا مبشر بشر قائدنا)
وزارة الخارجية : بناء الثقة في العلاقات الدولية
وزارة الداخلية : إعادة ثقة المواطن بالدولة
وزارة الإقتصاد: لكسب ثقة المستثمر الخارجي
بس تعال جيب دثو يفتهم ويعرف الفرق بين حكومة تتشكل والبلد مستقر وحكومة تتشكل والبلد ثلاثة أرباعه ما تدري منو يحكمها…والربع الباقي نعرف منو يحكمها بس ما نشوفهم ولا نعرف أخبارهم. خبصونا بحكومة تكنوقراط وگلنا الخير جاي على گولة ذاك الرجال…كل يوم الساعة ثمانية بالليل طلع وگال ” الخير جاي” تالي لا إجى ولا دز خبر ولا مرسال ! البلد مهتوك هتك وعلى بطانة وهذولة مخبوصين بوزارات سيادية… هي وينها السيادة خاطر القبيس؟؟؟ أشو أمريكا تجي وتضرب لا الله بالخير ولا أحد يعرف منين…وطيارات فرنسية بكيفها تفتر…والطيارات الألمانية بكيفها تصور…وقاسم سليماني ما خذ العراق طولة قماش يفصل براحته…ودول الخليج يلعبون لعب…وأردوغان دمرنا بداعش…وينها السيادة؟؟؟ أشو حتى وزارة النفط مو سيادية…أبو بكر البغدادي يلعب لعب بالنفط هو وجماعة البارزاني… كل من عنده بير نفط بدربونته من حقه يجيب عربانة نفط ويبيع النفط حلالاً مباركاً…
وبعدين تعالوا وشوفوا…حكومة تكنوقراط مو؟؟؟ زين هادي العامري شنو تكنقرطة مالته ؟؟؟ شنو شهادته؟؟ ولكم أكو تكنوقراط ما يعرف يشد الباينباغ ؟؟ لا يكون عنده جائزة نوبل لأختراعه التركيبة الكيمياوية للزردة!!! لو الشيخ البواسيري شنو التكنقرطة مالته ؟؟؟ وبعدين شنو علاقة الثرثرة بوزارة الخارجية؟؟ تخيلوا الجعفري أستلم الخارجية وراح وحضر الجلسة العمومية مال الامم المتحدة… شوفوا الخطاب مالته :
العلاقات الدولية تصطبغ بالجدلية الإنصياعية في تمازج الطوبائية مع الغائية لإستغفال المنطلق السوسيولوجي الإسترشادي لحصحصة الميثولوجيا في الإنطوائية الدولية” وطبعا ما راح يگدر يكمل الخطاب لأسباب معروفة خارجة عن السياقات الدبلوماسية بين الدول!
ولكم يا تكنوقراط؟؟؟ عبالكم شهادة طبيب هي تكنوقراط !! مع إحترامي للاطباء بس تكنوقراط يدير مؤسسة أو قطاع من قطاعات الدولة بكفاءة إعتماداً على تخصصه… ادري أياد علاوي الطبيب الفاشل شنو تكنقرطة مالته؟؟؟ وبعدين البيقية إللي مو أطباء…مثلاً : نوري المالكي شنو تكنقرطة مالته؟؟؟ يجوز هو مخترع المخطانة في اللقاءات الدولية ؟؟ وغيره وغيره وغيره…
ولكم عيب…عيب علينا مو عليكم…مو شبعتونا نصب ..نصب مادي ومعنوي…وصرنا سينما بلا فلم…نگطع بطاقة ونجي نگعد ماكو فلم…صار إلنا اكثر من عشر سنوات يومية تگومونا بعفاط وتنيمونا بعفاط… مع مقبلات من سيارات مفخخة لزوم الگعدة والمزة… يا تنكوقراط !
بشرفكم لو ألزم أي واحد من هذولة وأسأله سؤال يخص الوزارة إللي هو لازمها تتوقعون يعرف الجواب لو يعرف يتكنقرطلي ؟؟؟
مثلاً : أسأل أبو الكهرباء شنو الفرق بين الديجيتال والأنالوگ؟
ولو أسأل أبو النفط شنو الفرق بين النفط الحامضي والنفط الحلو… وشنو نوع النفط بالعراق؟
ولو أسأل أبو النقل… شنو وسائل النقل الهجينة؟
ولو أسأل أبو الدفاع : عدد أربع كليات أركان عالمية … وخمس أسماء لقادة في الحرب العالمية الثانية (چان موجودين في كتاب التاريخ مال ثالث المتوسط)
ولو أسأل أبو الخارجية : عدد أسماء المنظمات التابعة للأمم المتحدة مع أسماء مدرائها
وكافي … كاااااااافي مو صرنا شوادي… وفوگاه ولا حديقة حيوانات تقبل بينا وتخلصنا من هاي العيشة بهذا البلد … كل حدائق الحيوانات بيها فائض ودا يقللون النفقات !
أگول بس بلا زعل…مو عبالكم غلطانين بالقراية والإملاء… لأن شلون ما أشوف هاي حكومة تكنوضراط مو حكومة تكنوقراط !
………….
*[email protected]
