صحيح داعش دخلت للموصل … كواجهة ربما او ناس معارضة للحكومة استعانت بيها وجابتها ولو هذا الشي ما اصدق بيه الا بموافقة قوى عظمى عالميا مو السعودية وقطر وايران وهالخرط اكيد …
لكن اكو ثلاث مستحيلات بالموضوع/
المستحيل الاول: انه 500 واحد انهزم قدامه 50,000 جندي وهذا الشي ماكو عقل يشيله لو ماكو اتفاق وية الجيش وبيع وشرا … والجيش كان بترتيب المالكي وولائات قادته للمالكي حتى يسيطر على الوضع، اما افراد الجيش فما ينلامون خصوصا انه الجندي بدون قائد معروف عنه يترك مكانه،،، وفعلا تركوا اماكنهم وتركوا المدينة.
المستحيل الثاني: هو هذولي الـ 500 واحد ما يقدرون يبقون بالموصل او باطراف الموصل اذا ماكو ناس داعمتهم بالداخل ودا تستخدمهم ورقة ضغط على الحكومة لتحصيل مكاسب لان مو من المنطق انه يبقون يفترون اذا ماكو من يحميهم ويأويهم بالداخل…
المستحيل الثالث والأكبر والأهم: هو إنكار طائفية المالكي طول السنوات الماضية وانكار طائفية الطرف المقابل القاعد اللي قاعد يدورله اي زلة علمود يركب على المالكي شغلات طائفية … والحاصل اثنينهم مرتزقى لولائاتهم الطائفية المغذاة من خارج العراق، والناس من وراهم حاصلة بين الاثنين….
هسه اني اللي يهمني من الموضوع الناس … سكان المدن الواقعين بهالمعمعة …. والناس المخدعوين بفكرة تحرير المدن اللي واقعة تحت هذه الظروف ….
بالمقابل ما عندي اي حل ولا احد يتخيل انه الحل داخلي من العراق … مشاكلنا وحلولنا مستوردة ومرتبة ومخططة وكل ما هنالك على جميع القيادات التنفيذ فقط … ولكن دا احاول اثبت حقيقة فقط …
الحقيقة هي انه الشعب العراقي يطلع من قشمرة يفوت بقشمرة …. كلها باسم الاحزاب والطائفة والدين …. وجيش تعود على قتل ابنائه من ايام الانقلابات وقتل الاكراد والشيوعيين وغيرهم وغيرهم وهلمجرا … وشعب صار حديثا يقتل بعضه البعض علمود يروح للجنة اللي ما دا افتهم يا دين دا يتبعون علمود يروحون بيه للجنة يم يا رب هم ما دا افتهم !!؟؟
