( صرفيات الحكومة زايد ناقص ) 14ترليون دينار عراقي نثرية كماليات للحكومة العراقية لعام 2012 ونثريات بعض الوزارات 100 مليون دينار عراقي ؟؟؟؟؟ عمي مو لبهلول للحكومة ولوزاراتها , واخلي اكمل الخبر يابة يكول الخبر عدنا 1000 منصب يحتاجون حماية والذي منو ( مو الي يدوخ ذاك حسابه وحد ) بين سيارات حماية وبانزينات وسواق وفيترية وحدادين وموبايلات وخدم وحشم وطباخين , وقسم منهم عنده 70 سيارة ويطلع بس بعشرة خوفا على المواطن من الازدحامات من كثرة السيارات ( بعد عيني حنيين )
ورواتب حمايات كبار مسؤولي الدولة وزعماء الكتل في العاصمة بغداد وحدها تكلف العراق نحو مليار دولار سنويا أو ما يعادل موازنة ثلاث محافظات (حصوة بعين العدو ) ياجماعة الخير هذا على ذمة الوكالات وتصريح نواب اي مو بهلول . جمالة غرقت بغداد وعلى طاري المطرة اكو تكملة للخبر (يشكو أعضاء المجالس البلدية في بغداد وباقي المحافظات من ضعف التخصيصات المالية ؟؟؟؟ ) هسه انزل؟ … شعدك بالسطح بهلول ؟ اي مو بيتي فاض وبدل ما نزل بالماي خل انزل عليهم … يعني واحد يكول خل الله بين عيونكم .. كل هالصرف واكو ناس تنام بلا عشه وما عده نفط حتى يدفه بيته … يا بيت هي غرفة مسكفه بالجينكو و ايجار , مريضهم ميكدرون يجبوله دوة وجهالهم اذا راحوا مدرسة أحذيتهم مزرفة يفوت بيه الماي مو زرفتوا قلبي ليش ؟؟ بهلول على كيفك لازم شوية مستبرد ومصخن .. بهاي حقكم اي مريض اني بحب العراق والعراقيين يعني المسؤول ميشيل الا موبايل اخر موديل ومايركب الا سيارة اخر موديل ومياكل الا ما لذ وطاب لعد شتريد بهلول مو مسؤول ؟؟ يمكن حقهم لان قابل يشتري موبايل طابوكة من باب الحرص على دماء المسؤولين وعدم استخدام الموبايلات من نوع طابوكة في التراشق السياسي خاف واحد ينفشخ اما السيارة اذا مو اخر موديل مشكله مثلا ديطلع المسؤول على اخر اخبار الفن في الوطن العربي ( حقه مسؤول ولازم يعرف حتي يطور امكانياته لشغل منصبه مو ) قابل اجيبله سيارة مسجله كاسيت ؟ مترهم عللس الكاسيت ؟ ( اتصير بي جفلة وما يكدر بعد ينظر في شؤون المواطنين ويأخر تطور البلد ) تريدون يتأخر البلد ؟ ( لان العللس اساسه المسجل )لازم انجيبله سيارة سيدي اخر موديل من اجل الشعب والوطن ؟ وحفاظا على هيبة المسؤول مياخذ باقي الورقة خردة شايفين مسؤول يدور على الباقي ؟ بعدين شنو 70 سيارة يعني هو احسن لو السفارة الأمريكية الي بنيته تجيب 3500 سيارة اخر موديل وارد امريكي مو هذا مسؤول وطني لازم نسانده ونندعيله بزيادة عدد السيارات حتى يقف للعدو الأمريكي الغاشم وشراء احدث الموبايلات وارقى العطور واغلى ماركات الساعات .
اما بالنسبة للاكل والشرب هاي مالي حق بيه معقولة مسؤول ياكل فلافل لو بيتنجان واتصير بي انتفاخات لو مغص ويروح للطبيب وجيب الدوة عفوا يجيبولة الطبيب والدوة قابل هو بهلول . بهلول هاي شلون ربطته ؟ ترهم يابه شنو مخصصات ماتكفي المحافظات والمجالس البلدية ؟ غير اكو تبليغ على مطر بالشتا على عاصفة ترابية بالصيف من راس السنة حتى ندخلهن بالميزانية وبلاهن العراق كمرة وربيع شو ما شاء الله عدنة متنزه الزوراء ودولاب الهوى الجبير بس لا تطلعون هاي الأيام تفرجوا وانتخبونا بس, و حرصنا على صحة الغالي ابن العراق المرحوم دنيا واخرة من هيج مسعولين نسو الأخرة صعدوا على جتافنا بغفلة من الزمن صدق ( الرصافي ) طيب الله ثراه ، والذي قال: كلوا يا أيها السادة كأكل السادة القادة كلوا لا ترهبوا الناس فأن الناس منقادة .
