الاشخاص:
1. حجي عز الدين.. صاحب محل
2. حجي نجم الدين
3. حجي عبد الله.
.
المشهد الأول
حجي نجم الدين يجلس في محل حجي عز الدين. يتحدثون عن حجي عبد الله.
– حجي نجم الدين: حجي عبد الله شخص لا يستحي ولا يخاف الله.
– حجي عز الدين: يمعود عوفك منه.. مثل ما تكول هذا ما يخاف الله.
– حجي نجم الدين: هذا كذاب ومنافق ودجال وكل الصفات الشينة بي.
– حجي عز الدين: هذا مخرف وكايم يحجي شيش بيش..
– حجي نجم الدين: حاقد وما يحب الخير لأي شخص.
– حجي عز الدين: بس يسمع واحد متعين يتخبل اسبوع ما ينام..
– حجي نجم الدين: مليان حقد وما يحب الخير لاحد.
في هذه الاثناء يرن موبايل حجي نجم الدين. قبل الرد على الهاتف:
– حجي نجم الدين: اوهووو .. عبالك يسمعنا.. تونا نحجي عليه ويدك عليّ.
– حجي عز الدين: منو هذا بس لا حجي عبد الله؟
– حجي نجم الدين: لعد منو غيره؟ ليش احنا حجينا على غير واحد؟ هسة تعال احجي ويا هذا البربوك..
– حجي عز الدين: يمعود دجاوب شوف شيريد..
حجي نجم الدين يفتح الموبايل ويرد على الاتصال:
– حجي نجم الدين: الو..
– صوت حجي عبد الله: هلا حجي حبيبي شلونك؟
– حجي نجم الدين: الله يبارك بيك حجي.. الف هلا.. والله مشتاقلك..
– صوت حجي عبد الله: الله يخليك.. شلون صحتك.. والله حبيت اسال عليك.
– حجي نجم الدين: الله يبارك بيك حجي.. انت ابن حلال مصفي يا غالي يا طيب.
– صوت حجي عبد الله: وين ما وين؟ دتعال خلي نشوفك ونكعد شوية ونفطفط.
– حجي نجم الدين: والله انت ما ينشبع منك الحقيقة لازم اجيك حجي. اخ لو تدري اشكد مشتاقلك؟
– صوت حجي عبد الله: باجر جمعة تعال الصبح نكعد شوية وبعدين نروح للجامع نصلي صلاة الجمعة. ولا تجيب وياك احد تعال وحدك.
– حجي نجم الدين: لا يابة قابل منو اجيب ويايا..
– صوت حجي عبد الله: مو اخاف تجيب هذا صديقك حجي عز الدين.. ترا هذا فد واحد منافق تكة ماكو وما يخاف الله وما اريد اشوف جهرته.
– حجي نجم الدين: يمعود دعوفه خلي يوللي هذا شنو.. اني اجيك وحدي وبعدين نروح نصلي الجمعة سوى ان شاء الله..
– صوت حجي عبد الله: تمام اتفقنا.. يالا فيما لله..
حجي نجم الدين يقفل الهاتف. يتحدث الى حجي عز الدين صاحب المحل:
– حجي نجم الدين: فعلا هذا فد واحد ما عدنة كرامة.. بس اني اعرف اشلون احجي ويا.
– حجي عز الدين: قابل ما اعرفه.. هذا حجي عبد الله كبير المنافقين.. مرات يجي للمحل يمي ما انطي وجه.. هو يحس ويطلع.
– حجي نجم الدين: والله زين تسوي.. فد واحد عكرة تكه ماكو.
يضحكان. ثم ينهض حجي نجم الدين ويذهب من المحل.
*******
المشهد الثاني
نفس اليوم مساءً. حجي عبد الله يأتي الى محل حجي عزالدين.
– حجي عبد الله: السلام عليكم
– حجي عز الدين: وعليكم السلام ورحمة الله وبركاته
– حجي عبد الله: شلونك حجي شلون صحتك؟
– حجي نجم الدين: الف هلا بيك حجي. اتفضل اكعد والله مشتاقلك اهوايا.. اشو لا تجي لا تمر.
– حجي عبد الله: والله شمرلك اشو كل ما اجي هذا صديقك حجي نجم الدين كاعد.. وهذا اكبر منافق وما اريد اشوف جهرته.
– حجي عز الدين: يمعود دعوفك منه ليش اني ما اعرفه. حتى وجه ما انطيله. بس يجي يمي عيب خوما اطرده.
– حجي عبد الله: لا تنطي وجه.. هذا اكبر منافق وما يحب الخير لأي أحد.
– حجي عز الدين: اعرف.. ليش ما اعرف.. تصور هذاك اليوم شاف ابن ابو سعدية مشتري سيارة.. رأسا بدأ يحجي عليه.. يكول جانوا ما يلكون خبز هسه يصعدون سيارات.
– حجي عبد الله: لعد ليش اكلك منافق وبربوك.
– حجي عز الدين: دعوفك منه.. هسة احجيلي انت شلونك والله حيل مشتاقلك.
تستمر الجلسة والصحبة الحلوة بين الحجي عز الدين والحجي عبد الله.
– حجي عبد الله: اكوم اروح لان هسة راح يأذن المغرب.. وما يفيدنا غير صلاتنا.
– حجي عز الدين: براحتك حجي.. اني هم اعزل واصلي المغرب بالجامع واروح للبيت.
يذهب الحجي عبد الله. الحجي عز الدين يقفل المحل ويذهب الى الجامع. تقبل الله.
ظلام وستارة.
