من قوانين اللعبة السياسية أن يكون الجمهور والمتفرجين كلهم أغبياء وإذا مو أغبياء لازم السياسي يعاملهم على أساس أنهم أغبياء. والسياسة ما تنجح وي ناس مفتحين وعينهم على الخطأ والصح، من هذا نسمع بعبارة ” ذر الرماد في العيون” حتى العيون تنسد والسياسة تاخذ راحتها لأن بصراحة السياسة كلش بنت أوادم وتستحي من أحد يتفرج عليها..شنو لابسة وشلون تگعد ..وين تروح ومنين إجت..هاي السوالف تسبب إحراج للسياسة !
وفي الدول الديمقراطية مثل حالتنا  (اللهم نسألك دقرطة دائمة ومقرطة سالمة) تكون هناك فترتين لتواصل السياسي وي الجمهور الغبي لإستمرار العملية السياسية الديمقراطية، الفترة الأولى هي فترة الحملة الإنتخابية وصعود هرمون الشعارات والوعود الأنتخابية إلى مستويات خطرة ولازم مجال لتصريف هذا الهرمون لانه هرمون سام جداً ويسبب دوخة وعدم التركيز وهلوسة فلافلية بحيث تشوف لفة الفلافل صينية قوزي بمجرد قراءة وعد إنتخابي عليها…هاي بداية لكل سياسي يلم لنفسه جمهور من الأغبياء الصفاقين والمطبلين المزمرين واللاحسين والملمعين، هاي الصفات كلها تختصر بحزمة لواگة وحدة تسمى الحبربشية وهي حزمة قابلة للنفخ إلى أحجام كبيرة ومخيفة ولكنها فارغة ، تطگ بمجرد سحب السياسي الهوا ويطفي الكومبريسر…فشششششش ما تظل غير چهرات غبية تسأل عن السياسي إللي چانوا منفوخين بهوائه القذر…فيجيهم الجواب: بالامس كانوا هنا واليوم قد رحلوا !
هاي الفترة متعبة بس منتجة للسياسي…تنتج جمهور من الأغبياء وتنتج منصب سياسي..اول ما يخلص السياسي شغله من الجمهور الغبي يلم النفاخات إلمامزروفة ويخليها بالمجر عنده، وياخذ له غفوة پرلمانية مدتها أربع سنوات إلا گالون ونص، بهاي الغفوة ما يصحى لا على صوت إنفجار ولا طگة، ما يصحى  بس بوكت موسم الحج والعمرة من كل سنة  حتى لو هو من أنصار الرفيق لينين وستالين او اسمه شموئيل خوشابا…المهم سفرة وبلاش ! ومن توصل للگالون ونص من إنتهاء الدورة الإنتخابية ، يگعد مثل الصل، او ديچ هراتي ولا عبالك هو نفسه چان في سبات سياسي حيواني بعد فترة تزاوج متعبة تزاوج فيها وي الجمهور الغبي…طبعا هو الفحل صاحب هرمون الإثارة !
هنا راح تبدي الفترة الثانية، يجي السياسي مصحصح عبالك دعاية مال نسكافيه، ويتذكر أن الپرلمان فاسد (حاشاه بطريقة ما أعرفها شلون ) وأن قرارات الپرلمان كلها قرارات لصالح النواب وجيوبهم (هو ممثل الشعب مو نائب للعلم رجاءاً حاراً ومگسباً) علماً ان هو صاحب أقوى (موافج) بمثل هاي القرارات بشهادة تسجيلات وقائع جلسات الپرلمان، ويتذكر أن الحكومة فاسدة رغم أن هو كان في لجنة نيابية تنطيه صلاحية استجواب أي وزير أو إستدعاء مسؤول حكومي ، بس هو خطية كان ماخذ له غفوة پرلمانية شرعية ما تتعارض وي القسم الپرلماني ! وهناك يعلن إنشقاقه عن الكتلة النيابية إللي هو كان وياهم لأن أكتشف أن هاي الكتلة عبارة عن كتلة قذارة علماً هو چان طامس بيها ومستمتع بلذة هذه القذارة، بس لأن الجمهور الغبي قافل على إسم الحزب أو الكتلة وما يباوع شلون السياسي يغير كتلته لو جماعته، فالجمهور الغبي ما تهمه چهرة السياسي، يعني لو هذا السياسي الفاسد كان في مجموعة (س) وهاي المجموعة فاسدة من راسها حتى ساسها، وبنهاية الفترة الپرلمانية يجي السياسي وينشق ويسوي له مجموعة (ص)…الجمهور الغبي ما ينتخب (س) لأنها مجموعة فاسدة ويروح ينتخب المجموعة (ص) لانها مجموعة جديدة ويجوز أي يجوز تطلع أحسن من (س) إللي جربها وچانت مو خوش نكهة..بدون ما يگول لنفسه أن هاي الچهرة هي نفسها في (س) و( ص). بهاي الفترة تنزل على السياسي نفحات إيمانية، يصحى الضمير الغائب إللي كان مستتر تقديره همّ مو آني ويصير ضمير متصل تقديره أنا بس والباقي خس ونكتشف أن هو بهاي السنوات إللي چان بيها بالحكومة أو بالپرلمان چان مثل شارلوك هولمز يلم أدلة على فساد الحكومة وما خلا وثيقة ما أسنتسخها (وهي جريمة آمانة منصب وإستغلال منصب) وأن هو عنده تسجيلات نادرة للگبانچي ويوسف عمر !! وعنده تسجيل حتى الفلانة ام الچادر تغني يا طبطب يا دلع في مؤتمر حزبي للحزب المنافس في إشارة إلى نفاق سياسي وأن ما فوق الچادر يغطي ما تحت الچادر. وهنا يفتح السياسي المجر وينفخ نفاخاته، ويصير هو إللي كان الوطن ينتظره بس كان يستوي على نار هادئة ، والناس تتقشمر بغباء وإصرار على الغباء، ويفوز هو همين، وتالي الجمهور الغبي يكتشف ان الطبخة إللي يقدمها هذا السياسي في إحتفاله بالفوز هي طبخة نص ستاو، بلحمة فاسدة وجايفة، وأن هذا السياسي ضرب المقسوم، والتشريب والقوزي، وشرب الشاي والزقنبوت، وراح ياخذله غفوة….في إنتظار موسم جديد …ودورة جديدة..والمصيبة ماكو سن اليأس بهاي الحالة حتى تنقطع دورة هذا السياسي ونخلص من ألعابه..وشوفة چهرته…كل شي بخت…حتى الغباء بخت!
والعاقبة لهم مو لنا…حتى يرث الله الأرض ومن عليها وينطيها همين إلهم مو إلنا
[email protected]