ذاك اليوم جانت كعده أبيت أبو سراوي..وحضرو كل جماعه اللغف ألا التيار الصدري..أيموت عليهم أبو سراوي..وجان بس هو يحجي بالاجتماع..الله أيساعد زوجته..بس هم زين هيه بلندن وهو بوحده يم العلوييييييييييه..لا تروحون بعيد متعه, زواج متعه بتلاث ولايات وبعدين كلمن أيروح ألدار حقه..أتقبلون أينام وحده..حتى الله ميرضى.. الاجتماع جان علمود التظاهرات والعصيان اللي ديصير بالمحافظات الغربيه والشماليه.. وجان أبو سراوي مثل كل مره ,كلش عصبي .. وطلع ملف وبدى يقرى منه ..الملف مكتوب بيه قرب حدوث أنقلاب في بغداد يجري أعداده في حال سقوط بشار الاسد.. وكال ذوله المتظاهرين وأشر على أيده, ذوله مثل( الدنبله ) وأريد أفجرها كبل ميفجرها غيري .. والايام الجايه كلش صعبه علينه جميعا.. وباوع على أحمد الجلبي ,وكاله..أنت تتصرف مو خوش ويانه..أتقوي علاقتك بالبرزاني على حساب الشيعه..عليك أن تحدد , أما تبقى ويانه أو تروح وياهم.. بس حمودي ما سكت ورد عليه وبيت أبو سراوي,وكله.. سياستك ويه الجميع مو زينه.. وهي اللي أضرت الشيعه.. وأنت أتقلد حزب البعث بأنفراده بالسلطه, وتتسرع بأتخاذ القرارات وما تترك لشركائك أبداء الرأي والمشوره..وعليك أن تتنازل شويه للمتظاهرين وترضيهم .. وأذا أتريد تتصادم ويه أهل الرمادي عليك أن تعرف , كل نقطة دم تروح, ذوله مجتمع عشائري , يعني أيصير الدم للرجاب..ويمكن على هذا الاساس طلع الجلبي وصار ويه المجلس الاعلى .. لان طكت روحه من أبو سراوي..هاي الجلبي هيج .. لعد الشعب المسموط شلون..الله أيساعدك يا شعب..
النوب أندارعلى باقر صولاغ ,وكاله.. أني سياستي عجوله وما بيها رصانه..أبو المثل أيكول أكعد عوج وأحجي عدل.. بس صولاغ بعد جبدي شلون رده رد وهم بيته.. أني حذرتكم كبل فتره وزعلتو مني , وكلتلكم أي شي أيصير بسوريا راح ينعكس على محافظاتنه الغربيه..أحنه شكلنه التحالف الوطني على أساس التشاور بالامور والاتصال بيناتنه.. تتصورون أني عرفت بهذا الاجتماع من التلفزيون..هذا ميصير هيجي حجي..وأقترح على أبو سراوي بعد أن يحصل على تفويض سياسي من كل التحالف..أن أيقود عمار الحكيم مشروع مصالحه بين كل الاطراف..
وطلعو الجماعه من بيت أبو سراوي زعلانين ويدردمون ويه نفسهم..لان لو أبو سراوي يسمع واحد بيهم , معناها نسألكم الدعاء وينعلس..اليوم أبو سراوي مو ذاك المهتلف أبو قميص السمائي وبنطرون شحاله يمسح الكاع مسح..وجان يتوسل حتى أيصير بمجلس الحكم ..لا يابه لا..هسه أبو سراوي أسد خضنفر , يبلع مثل علاوي عشره بملف واحد..وكلشي بيده ..يعني العراق كله تحت تصرفه..وأذا قال المالكي قال العراق..وهذا اللي كل الشعب الخايس خايف منه..لان أبو سراوي صار يتصرف مثل مجان صدام حسين يتصرف..وهاي الديكتاتوريه بعينها..لان من كام أبو سراوي أيشوف نفسه أكبر من الاخرين ويستخدم أيده الاثنين من يحجي وحط البعوره تحت أبطه..يعني كام أيخوف..وديرو بالكم يا كرعان..والجايات يا ستار منها..
وما خفي كان أعظم
