أتحدى أي واحد يشكك ويگول بالعراق ماكو ديمقراطية من شماله بإقليمنا الحبيب كردستان الى جنوبه ببصرتنا الفيحاء ـ ـ لا وأتحدى أكثر أي واحد يگول أكو مثل ديمقراطيتنا بكل العالم ـ ـ واللي يگول شلون دبرتها ـ ـ أگلله هم شفت ديمقراطية بكل دول العالم صارله الشعب ثلطعش سنة يصيّح “شلع قلع كلكم حرامية” و “بأسم الدين باگونه الحرامية”، والحرامية يضحكون ويصفگوله للشعب ويظلّون يبوگون!!! ـ ـ شفتو فد يوم واحد من أبناء الشعب إنسجن وإنعل والد والديه كودن يهتف هذا الهتاف حتى يبرّد گلبه ـ ـ أتحداكم إذا تگلولي أي شفنه ـ ـ ولا تتحججون وتگلون لعد هاي السجون شلون ممليّه بالنزلاء ـ ـ أگللكم يابه تره هذوله كلهم، لو أربعة إرهاب ـ ـ لو من جماعه النظام الصدامي ويريدون يرجعون الدكتاتورية ـ ـ لو قسم لاغُفله كل واحد منهم چَم مليار دولار واللي جَابته الإنترپول قابضاً، بس هَذوله الأخيرين خطية مظلومين ومشمولين بالعفو لِمّن راح يرَجْعُون (الچَم فلس) اللي راحت بحساباتهم اللي برّه بالغلط ـ ـ يعني شنو ليش نظلمهم ونگول باگوها ـ ـ هَم الله مَيقبل بالظلم ـ ـ إنتو مو تعرفون أكو كليشه تنكتب بچَعَب الوصولات والأوراق والوثائق المالية تگول “الغلط والسهو مرجوع للطرفين” ـ ـ أي هي هَذي عَلويش يكتبوها ـ ـ غير علمود هَلْ الشغله هَذي ـ ـ صحيح صارلهه المليارات بحسابهم برّة أقل شي سبع سنين لو عشرة وتجي عليها فوائد وعمولة من أثنين الى خمسة بالميّة على الأقل، يعني على كل مليار دولار يجي عشرين الى خمسين مليون دولار كل سنة ونضربها بسبعة سنين صارت ميّة وأربعين الى ثلثميّة وخمسين مليون دولار، بس هَم ما يخالف عوافي عليهم المهم يرجعون فليساتنا وترجع صفحتهم بيضه ويكدرون يرشحون للإنتخابات الجديدة ـ ـ شفتو شلون ديمقراطية عدنا!!!.
يا جماعة لا يكون گلبكم أسود ويگول ماكو ديمقراطية ـ ـ يعني ما شفتو ممثل رئيس الوزراء من راح يفتتح ملعب النجف گبل چم يوم خطية الرجّال ما گال من خطابة غير چلمتين (شلونكم وأودعناكم) ـ ـ ما أنطوو مجال الناس يحچي كلها تصيح “شلع قلع كلكم حرامية” وإشتغل ركع بطاله المَيْ بفلس علي ـ ـ لكن الرجّال أخذها بروح ديمقراطية وإنسحب ـ ـ يعني مسوّه مثل ما چان يسوي الدكتاتور يسد أبواب الملعب عليهم ويدخّل قوّات الأمن الخاص ويبدي الرمي عليهم بالرصاص الحي، لو تجي الطيارات ويرشوهم بالكيمياوي عبالك ذبّان ـ ـ وهسه أكيد رجع ممثل رئيس الوزراء وگلله ال رئيس الوزراء عل اللي صار بملعب النجف ـ ـ وراح يطلع رئيس الوزراء گبل الإنتخابات وشوفو شلون راح يهدد الفاسدين وينعل والد والديهم بالحچي!!! ـ ـ أي لعد أشعبالكم الحديده حارة وما راح يسكت رئيس الوزراء ـ ـ بس فد لحظة هو رئيس للوزراء من صُدك هو رئيس عل الوزراء؟!، شو ما عنده حچاية على أي واحد منهم!!! ـ ـ شو الجعفري عبالك دوله مستقلة بكيفه يدير وزارة الخارجية وهيله اليعرف سياسة الدولة الخارجية بيا إتجاه تمشي ـ ـ ووزير الدفاع بِدَت الحرب ويّه داعش وإنتهت وحرام اللي إنسمعله تصريح واحد ـ ـ ووزير الداخلية لا والله شويه أحسن هم مرّات من يصرّح يجيب طاري رئيس الوزراء عل السريع ـ ـ ووزير الموارد المائية يبسَتْ النهرين وماتت الناس من العطش وهو خطيه مقهور على غزالته بمزرعته اللي هم لحكها العطش وماتت سودة علي موعليّه!!.
يعني أكو أكثر من هاي الديمقراطية اللي ما خللو الناس شي ما ضِربَو بي المسؤولين حتى (بوش) لاحَته إلاّ شويّه قندرة منتظر الزيدي لو مو الگولچي (ياشين المالكي) چان مِتدرّب زين وما خلاها تطلع گول وطلعها ضربة ركنية ـ ـ يعني الجماعة ما يهمهم وگلبهم چبير وغاسلين وجوهم بمَيْ أصفر ـ ـ شلون عيني، لا لا، لا يروح بالكم لبعيد ـ ـ آني ما قصدت اللي ببالكم ـ ـ المي الأصفر اللي قصدته هو مَيْ الزعفران بس صلاحية الزعفران چانت منتهية من زمان والجماعة يخافون الله وما رادو يسوون طلبية جديدة تكلف ميزانية الدولة هوايه ولهذا المّيْ مالته طلع بي ريحه مو طيبه شويّه.
وإبقى يا شعب إنتخبهم حتى إنت تظل تهتف “شلع قلع كلكم حرامية” و “بإسم الدين باگونة الحرامية” وهُمّه يظلون يضحكون عليك ويبوگون فليساتك ـ ـ ودير بالك يا شعب لا تنتخب اللي يردون يبقى للدين هيبه وقدسيه ويفصلو عن السياسة ـ ـ أي أي، أقصد التيار المدني بكل اتجاهاته، تره هذوله ضد الديمقراطية وكفره!!! ـ ـ بس نصيحة لوجه الله تعالى بعد الإنتخابات ما تنتهي خلي يصير تغيير بالهتافات مثل ما الجماعة راح يغيرون كراسيهم، يعني وزير اللغف بالتجارة يمكن راح يصير وزير اللغف بالكهرباء و”على هل الرنّه طحينچ ناعم”!!، وإنت يا شعب همينه غيّر وإكسر الروتين وخلي تصير شعاراتك “بإسم الدين باگونة الدعوچيّة” و “طاح حظ هل الديمقراطية اللي چابتلنه الحرامية” و “بإسم الدين لغفوهه للميزانيه”!!!!.
وأختم وأگول كافي عاد يا عراقي ويا عراقية لا تنطون صوتكم للحرامية ـ ـ وكافي عاد يا عراقي ويا عراقية لا تجربون المجرّب مثل ما گالت المرجعية ـ ـ وكافي عاد يا عراقي ويا عراقية حان الوگت وعبروا الطائفية ـ ـ وأنتوا كلكم نشامى وما يلوك صوتكم غير بس للي ينادون بالمجتمعات المدنية.
