سعاد : يا ستار…من الصبح گالب وجهك…خيرك
أسعد : أدري شلون تريدين أگعد من الصبح إذا أطب للحمام وماكو ماي بالبريج؟؟ مو گتلج قبل ما أنام لا تنسين تخلين ماي بالريج لأن الصبح ماكو ماي ..الجماعة كلهم يسحبون الماي بالماطور!
سعاد : سطعش ألف مرة گتلك جيب إلنا ماطور چبير حتى نسحب كل الماي من الأبّي …إذا هذولة إللي يمنا جايبين ماطور مال هليكوبتر ويسحبون كل الماي…دا تسمع صوته؟
أسعد : على أساس الماطور الچبير يشتغل بالهوا…منين أدبر كهرباء إذا إحنا بس ساحبين من أبو المولدة ثلاث أمبيرات؟
سعاد : لعد هم هذولة شلون جايبين كهرباء؟
أسعد : بيت أبو فلاح أبنهم يشتغل چايچي بمقر الحزب، وبنته تشتغل بالتربية وأنت تعرفين واحد ما يدخل للتربية إلا وشايل هدايا يوزعها سبيل على روح بيبية وزير التربية
سعاد : يعني شنو؟
أسعد : سلامتك…بس يعني همّ عدهم مولدة خاصة مالتهم…مدا تشوفين الحايط يم المطبخ مالتنا شلون صاير مصخم…وهذا الصوت مو بس صوت ماكو هليكوبتر مثل ما تگولين، هذا صوت كوكتيل ماطور ومولدة
سعاد : گرة عينك وعيني
أسعد : يا ساعة راح تطفى المولدة؟؟
سعاد : أبو المولدة گال اليوم بس ساعة الصبح لأن يريد ينظف المولدة
أسعد : ولچ لو هاي المولدة عروس ما تحتاج كل يومين تنظيف…هذا ما يريد يجر عدل ودا ياخذ گاز ببلاش ويبيعه ومدا يشغل المولدة
سعاد : صدگ أمس العصر مر علينا هذا الولد إللي يشتغل يم أبو المولدة
أسعد : عبيس؟
سعاد : ما اعرف أسمه…يمكن عبيس لأن شكله يشبه عبسي
أسعد : شي يريد
سعاد : گال بيت أبو سلوى مدا يقبلون وايرنا يفوت من فوگ الحديقة مالتهم
أسعد: من نعلة على گصة أبو سلوى…من يوم راد أجيبه مدرس خصوصي لسعيد وما جبته گالب خلقته علينا…. يريد أجيبه يدرس فيزياء وهو قبل 2003 كان معلم وطنية !
سعاد : أي والولد ما نجح إلا بالدور الثالث وگونية طحين لخبز العباس
أسعد : يمعودة ..من كل عقلچ أكو واحد يرسب بالعراق العظيم
سعاد: وهمين هذا ال(عبيس) گال الواير مالكم صاير كلش تعبان وخايف لا ينگطع ويوگع على واحد وينتل…والجوزة همين تعبانة
أسعد: أگللچ إذا جوزة الحكومة گايمة شلون تريدين الجوزة مالتنا عدلة ؟ !
سعاد: جوزة گايمة شنو وشلون؟
أسعد : لا هاي مصطلحات ديمقراطية أشوية صعبة عليچ
سعاد: أي على اساس دا تحچي النظرية النسبية..أبو معدل واحد وخمسين
أسعد : إنعلست والله أنا أخو چفصة…ولچ من وين طلعت الشمس
سعاد : مناك من العوجة !!! ههههههههههههههههه
أسعد: من نعلة على صفحة أهله وأهلچ
سعاد : لا تنسى تمر على دائرة تقاعد تشوف موضوع تقاعد بابا لان دا تسأل وتگول هم زين ما وصيته على معاملة حج !
أسعد :ولچ من أشوكت صار عندچ ماما وبابا…مو كل عمرچ يوم وأبوي …
سعاد : أشتريتهم…على أساس أنت شلونك…بيت أبو گروة
أسعد : هسة أبوچ راح الله يرحمه وتعال حير بالمليارات مالته، هسة قابل تقاعد أبوچ العفو قصدي باباك شگد؟
سعاد : حتى لو فلس…هي تريده…وتگول أشتري رصيد للموبايل
أسعد: يا رصيد؟؟؟ مو هي گاعدة بالغرفة بصفنا…إلمن تخابر ؟
سعاد : تخابر تلفزيون الشباب ! قابل إلمن تخابر…وبعدين إشبيك ما ينحچي وياك من الصبح
أسعد : وين نعالي ؟
سعاد : مو البارحة شمرته على أبو بريص يم المطبخ…شنو نسيت !
أسعد: مرة على أبو بريص ومرة على بوستر إنتخابي…الله يساعد النعل…جيبي النعل من رحمة على روح أبو بريص
سعاد: شتريد الغدا اليوم ؟
أسعد: هذا إذا رجعت قبل ما أصير خبر عاجل…صدگ وين چان الإنفجار أمس؟
سعاد :صدگ وين طگة مال بارحة…
أسعد : بچايخانة يم الجسر…آني من زمان گايل هذا الچايچي ما يعرف يخدر الچاي زين وأكيد هذا شرب چاي ما خدران وزعل ورجع لبس حزام واجى وفجر روحه
سعاد : عيني راضي عن الچاي إللي أسويه آني ؟؟ أخاف هم تزعل وتفجرنا
أسعد : يمعودة إذا بس عالچاي بسيطة
سعاد : عزااااااااااااااااااااااااااا…شنووووووووووووو؟
أسعد : كافي عاد…والله صوچ الحكومة دللتكم…النوب تريدون دلال حتى بالبيت…..افتحي إلنا التلفزيون نشوف شكو زبالة بالتلفزيون
سعاد : وين الريموت
أسعد : فوگ الثلاجة
سعاد: يا قناة تريد؟
أسعد : قناة الجيش ! قابل يا قناة
سعاد : زين زين لا تعصب
أسعد : شنو هذا…عاااااااااااجل شنو
سعاد : دقيقة نشوف شنو الموضوع
أسعد : ها شكو
سعاد : اليوم حظر تجول…وماكو دوام مديرية التقاعد…وماما راح تزعل
أسعد : من نعلة على غيرتچ…هسة يا تقاعد…مو البلد كله طابگ عالصفحة
سعاااااااااااااااااااد…..ولچ مصخمة سعااااااااااااااااااااااد
سعاد : أي يوووووووووم جيتچ
أسعد : أستلمممممممممممممممم
سعاد: بدينا
أسعد: لا تنسين ماكو ماي بالحمام…
سعاد : لا هي مسوية حسابها وأخذت سطلة من الليل لغرفتها
أسعد : والله خوش تدبر امورها.
سعاد : شعبالك..فلس وفلسين
أسعد : لا…قائد تحرير فلسطين
سعاد : هههههههههههههههههههه
أسعد: جيبي لي النرگيلة….
سعاد: من الصبح؟
أسعد : لعد من الليل! النومة راحت وطلعة ماكو..شكو بعد
سعاد : يا ستااااااااااار
أسعد : الستر حلو
سعاد : وين تريدها
هو : بالگراج
وطلع أبو سعيد…جاب السكملي وگعد بالگراج…شال راسه يباوع السما..ما شاف غير وايرات المولدة عبالك عش مال لقلق.
وهناك…..أجى غراب وگف على الوايرات…
سعاد : يبوووووووووووووووووووووووووو سعيد إلحك أبوك انتل بالگراج
سعاد : سعييييييييييييييييييد أنقطع الواير على أبوك تعااااااااال
بعد يوم…لافتة نعي
وفوگ چادر العزا…أجى نفس الغراب….وتعرفون الباقي…
[email protected]
