يا مبشــّـــر بشـــّـر قائدنا

رسمياً..أعلن العراق خلوه تماما من فيروس العقل ومرض التعقل أعاذنا الله وإياكم من هذا الفيروس والمرض الخطير خطورة إتفاقية أربيل. وهم زين الحكومة سوت إلنا شغلة نفتخر بيها – كعادتها الگشرة وهي القضاء تماما على فيروس العقل وبصورة رسمية وموثقة صوت وصورة.
شنو الموضوع؟ أدري بيكم مستعجلين لأن إللي يشفى من مرض التعقل وفيروس العقل يگوم يستعجل بكل شي وما يصبر على توالي الأمور.
يابة إلكم السالفة بالتفصيل:
إشگد أكو گهاوي بالعراق؟؟ وبكل گهوة أكو شطرنج لأن هي لعبة الدالغة وماكو واحد في المشرقين والمغربين يحب الدالغة مثل العراقي وخاصة الدالغة على شلون يطلع البخار من إستكان چاي مهيل…صدگ  هذا المنظر يرادله دالغة وحسبة ولعبة شطرنج والبيدق يروح والرخ ينحصر والفيل يودوه لحديقة الحيوانات والوزير يستقيل بعد فضيحة عقد وهمي وكش الملك، كل هذا والعراقي ضارب دالغة على إستكان الچاي وشلون دا يطلع البخار من الإستكان، و لهالسبب  الشطرنج لازم موجود بكل گهوة عراقية.
والدالغة ما تجي إلا وي فيروس العقل، والتعقل هو الناتج المباشر من يگوم فيروس العقل يشوف شغله وي الدالغة، والگهاوي هي بؤرة فيروس العقل بالعراق من گهوة حسن عجمي والرصافي والبرازيلية إلى الشابندر، وطبعا من واحد يلزمه فيروس العقل لازم يتصرف..وماكو أحسن طريقة لتصريف العقل غير الشطرنج بالگهاوي.
ولأن العراقي ما يحب چاي البيت حتى لو أم الجهال حطت ربع كيلو هيل بالقوري وجابت إستكان الچاي خدران وهي خدرانة، نشوف الگهاوي عدنا مليانة زلم خشنة ، وكل إثنين يگعدون يگوم واحد يعطي فيروس العقل لصديقه مرة بالچيكارة ومرات بحچاية، وبعدين يگومون يلعبون شطرنج حتى لا يبين عليهم فيروس العقل وتصير فضيحة وخاصة إذا لابسين دشداشة، على هاي الحالة أعتقد الشطرنج هي العلامة الوطنية للدالغة العراقية ومادامت الدالغة العراقية موجودة وبكثرة فأكيد فيروس العقل موجود ويعني أكو شطرنج لتصريف العقل.
وطبعا هيچ بشرى مال القضاء التام على فيروس العقل لو تگولها الحكومة بصورة مباشرة راح تسبب موجة فرح هستيرية راح تكبر مثل التسونامي ، ونعرف أن الحكومة كلش تهمها الحالة العصبية للشعب وتخاف على هستيرية الشعب ومن موجة بزغ تسبب هزات عنيفة خاصة  بالخصر لأن بعدنا ما ناسين خطورة الشعار الثوري الخالد إللي ضيعنا  ” وإنها لثورة حتى الخصر” فگامت تنطي هاي البشرى والقضاء على فيروس العقل بطريقة حيل مبتكرة، يعني ما گالت يا عراقيين ترى صرتوا أغبياء وبالعافية عليكم، لأن العراقي ما متعلم بعده على هيچ صراحة ديمقراطية، بس گالت يا عراقيين ترى بعد ما تعرفون تلعبون الشطرنج، ومثل ما نعرف الشطرنج يجي وي فيروس العقل، يعني يا عراقيين ما ظل عدكم عقل…بالإستعاضة بحسب درس الجبر للصف الثالث المتوسط ! وهذا هو المطلوب إثباته في نظرية الديمقراطية أبو الحصة.
ولأن حكومتنا ما تطلع بيان إلا وياه الأدلة والحقائق ووسائل الإيضاح، فاستخدمت نادي رياضي لزف البشرى …إي..لان عدهم وسائل إيضاح مباشرة تگدر الحكومة تستفاد منها لنشر البشارة العظيمة في خلو العراق من العقل. شلون؟؟
الإعلان الرسمي إجانا من نادي الإتصالات، لان حكومتنا كلش تحب التواضع وما رادت تدگ طبل لهذا الإنجاز التاريخي ونطت بيرميشن لهذا النادي حتى يعلن البشرى لكل الشعب العراقي إللي أخاف أكو واحد يشك بنفسه ويتصور عنده فيروسة  لو أشوية ذرة عقل، نگول تطمن ولا تخاف غنت في أمان أكثر من الامان إللي توفره وزارة الداخلية  – بالوكالة – تطمن ترى العقل في العراق صار مثل الجدري بألمانيا…تم القضاء عليه قضاءاً تاماً بالنعل وضرباً بالقندرة على مكان تواجد العقل.
نداي الإتصالات أعلن  تعاقده مع لاعب (محترف) في لعبة الشطرنج من جورجيا ! للمنافسة على لقب الدوري العراقي. اي بشرفي الخبر لا كذبة نيسان ولا كذبة حكومة، الخبر موثوق بالصوت والصورة والمقابلة وي اللاعب. وما أعرف هذا يا كشاف (المواهب) راح لجورجيا وشاف هذا اللاعب بالشطرنج إللي عنده مناورات ولا مناورات كاربوف أو كاسباروف أو حيل بوبي فيشر وإجى وكتب توصية لإدارة النادي والحكومة لجلب هذا اللاعب للدوري العراقي، أكيد واحد خبير خبراء بالوقاية من مرض العقل وعنده شهادة عليا في التعامل وي فيروس العقل حتى القضاء عليه .وإدارة النادي – وهي طبعا جهة حكومية – رادت تگول للعراقيين أصحاب الدالغات الشطرنجية يا جماعة الخير ترى صرتوا هب بياض بالعقل وما إلكم لعبة غير الدومينو حتى تصرفون الهب بياضاتكم  – دومينو عدلة ومو أزنيف لأن الأزنيف بيها حسبة وحساب .
أما هذا اللاعب (المحترف) فخلي المخابرات العراقية تحفر وراه وتجيب خبره إذا صدگ عدنا مخابرات. لاعب شاب كلش (محترف) من دولة مليانة مافيات سلاح وعصابات تجارة الفتيات..ترك بلده الأوروبي وإجى لنادي غير معروف على الخارطة العالمية للعبة الشطرنج..وراح وي النادي لمعسكر في دهوك المدينة القريبة على الحدود العراقية التركية والمنطقة النشطة بالتهريب، ونادي تابع لجهة حيوية (أستقال) وزيرها  بفضيحة عقود وعمولات لشركة من المنطقة الشمالية – كردستان. هاي الامور كلها مؤشرات إلى شغلة چبيرة ما أريد أحچيها بس أترك المايكروفون للرفيق…العفو أقصد الفريق قاسم أبو المخابرات حتى يشوف الفلم…ويحچي إلنا…ترى إحنا ما عدنا كهرباء حتى نتفرج على الفلم…وبعدين شلون راح نفتهم الفلم والعقل  – بحسب الإعلان والتعاقد مع المحترف الجورجي – صار من ذكرياتنا المؤلمة !.
[email protected]