الى أهلي وأحبتي وأصدقائي في الفلوجه والرمادي..الى عشيرتي البوريشه.. وأهلي في البوعلوان.. وأحبتي في البوفهد..وأصدقائي في البوفراج..والى العراقيين من زاخو الى الفاو.. والله كل قطرة دم تراق, هي أغلى من أقتناء كل المناصب والجاه والتناحر على من يجلس في هذا الكرسي أو ذاك ..وهي أغلى من كل دولارات العالم .. وقطرة الدم العراقي لا تعوض بأرسال كتاب أعتبارها شهيد .. فوالله لو جعلوا مال الدنيا في يميننا وتاج السلاطين في يسارنا.. ما فرحنا وما سعدنا, بأراقة نقطة دم واحدة..
همه أيريدونه أن أنكون أشلاء ممزقه.. ومشتغلينه حقن, أنت شيعي وأني سني..أنت عربي وأنا كوردي وأنت تركماني وأني صابئي ..أيريدون أيصير بلدنه فوضى سوريه ومصر وتونس .. أيريدون أيحركون كلشي عراقي , لان هذا العراقي رقم صعب, ما كدرو أيضربون أبن الرمادي بأبن العماره, لانو رقم واحد.. ما يقبل القسمه, ويسون هذا أبن الغربيه وهذا أبن الجنوبيه , حاولو وشكد حاولو, بس ما كدرو.. خلونه أنشوف طريقنه, ونعرف أحنه بيا أتجاه ماشين.. خلونه نبني عراقنه من جديد..المالكي والشابندر والسنيد والعسكري , ما يمثلون طائفه الشيعه , ولا ,علاوي والمطلك والكربولي أيمثلون طائفه السنه, لان طائفه الشيعه وطائفه السنه, أرفع وأسمى من كل التسميات ومن كل العناوين, والسنه هيه مرادفه للشيعه, يمشن سوى ويلتكن عند صحن رسولنه الامين وخاتم الانبياء والمرسلين.. العراق باقي, وين اللي حكموه..كلهم أنتهو .. وين عبد السلام , عبد الرحمن, عبد الكريم, البكر,صدام, واللي الجاي هم أيروح, بس العراق باقي.. ولكم أفتهمو.. اللي يعمل لشعبه, يبقى ينذكر, والتاريخ ما ينساه..
شوفو شلون أنذال وولد كلب, مو أحنه أصحاب أجندات, ولا أحنه عيونه على الكراسي, أحنه أنسويكم أوادم ونخليكم تصعدون فوك روسنه, أحنه السبب, حتى أتعرفون , شكد هذا الشعب بسيط ويقتنع بكلشي, كلتونه تعالو للانتخابات, رحنه مثل الخرفان الجربه اللي تنساق للذبح, وأنتخبنه, عبالنه أوادم, بس , أحنه يا جماعه, أسفين, ونعتذر , وبعد ما نسويها, جنه قشامر, هسه فتحنه, وكمنه نعرف وين الصدك , وين الجذب.. شرد أوصفك لو كلت جذاب يومك كرب
خليت الوطن يلتهب
وخلصته مص وحلب
مره تكول الشيعه رقم صعب
ومره تكول السنه سبب
والبوك صاير للركب
وكلشي بهذا البلد تحول رعب
وضاع الدرب
عفيه وطن بس المصايب ينتحب
بذاك الوكت وبهذا الوكت
لا أكلنه منه سمج ولا شفنه منك ثرب
وكضيناها مره لطم مره لعب
تاليها شنهي ولك
لا ظل وطن ولا ظل شعب
وضاع الدرب
عفيه رجل لا تفيدك جمعه رحيل ولا غضب
ولك عاكول صرنه بلا ذنب
حتى النخل ظل بس كرب
ولا عيون ظلت لا هدب
ومره يبوكون الذهب
بأسم الشعب
وهذا الحضر أموره وهرب
والشعب ببواري أنضرب
وضاع الدرب
وذوله العجم وذوله العرب
ما قصروا.. مره شغب مره سلب
أنريد نعرف يا زمن
وين الصدك وين الجذب
ها يا شعب
