وصفة بيتية لطبخ حكومة متنقرطة

بسبب الأزمة المالية والحالة العاوية، ما عدنا فلسين حتى نشتري حكومة متنقرطة جاهزة وياها الكتالوگ وخبير يجي يعلمنا شلون تشتغل الحكومة…ما عدنا هيچ إمكانية مالية هسة، فلازم ندبر حالنا بالمهارات البيتية الموجودة عدنا، وترى شغلة طبخ حكومة ما تحتاج شي، بس أشوية جرأة واحد يدخل المطبخ السياسي، ويا معين.
بالأول جيب لك رؤوس الكتل الحزبية ، ولازم تتأكد الراس خوش راس مو خايس بسبب الخزن السيء ولا واحد دايس عالراس بالگونية، تاخذ الرؤوس وتغسلها بأوراق الدستور ، وخلي هذني الرؤوس بگوشر مصنوع من وعود ستينلس ستيل، إشگد ما تمشي السنين هي هي، تلمع ، وتجي تعصر عليها ما تجود بيه قريحتك بس دير بالك مو تعصر قريحتك هواية ترى تتيبس وبعد ماكو قريحة إلا في إستثناءات خاصة، وآني وأنت مو من ذولة أصحاب الإستثناءات الخاصة، المهم، بعد ما تعصر القريحة، جيب كلنيكس وأمسح فتحة القريحة مالتك حتى لا تصير إكسپاير، وإحتفظ بالكلينكس فوگ الكاونتر حتى ينشف.
جيب الگوشر وغطيه زين بعباءة سيد، وإنتبه لازم العباية مگلوبة عالبطانة مثل حالتنا ، وأترك الگوشر تحت شمس الفجر الجديد مال الديمقراطية بحوش البيت، إلى أن تطلع الريحة، والريحة إللي تطلع هي خليط تجانس مصالح البوگ والرشوة والفساد في رؤوس كتل الأحزاب إللي موجودة بالگوشر. تعال شيل العباية، وجيب الكلينكس إللي مسحت بيه فتحة القريحة مالتك، إسحگه بنفس الهاون إللي يدگ على راسك من ماكو كهرباء بالصيف والحرارة خمسين وأنت راهي، حتى يصير پودرة، خلي الپوردة بالممحلة وأنثرها مثل الوعود على الگوشر. شيل الگوشر وإدخل من جديد للمطبخ السياسي.
جيبلك علبة من معجون المحبة وتأكد إن العلبة ساخت إيران لأن هسة أكو منتجات مقلدة كثيرة، العلبة ما تنفتح إلا بإستخدام المارد، أفتح باب الكاونتر وطلع القمقم إللي بيه المارد خلي يفتح لك علبة المعجون ولا تنسى ارجع المارد بالقمقم حتى لا يهشم زجاجة المطبخ السياسي ، خذ لك ثلاث خواشيگ من علبة معجون المحبة أو خمسة بحسب المزاج الطائفي ويفضل إستخدام خاشوگة مصنوعة في دولة الفافون، أعجن المعجون وي الموجود بالگوشر، وماكو إحراج إذا تتفل أشوية إذا العجينة يابسة لأن نوبات معجون المحبة
تسبب جفاف عاطفي بين الرؤوس الحزبية ، إتفل تفلة تفلتين بس لا تكثر الله يخليك، أهم شي تفلتك بهذا الزمن التفلاوي .
إنتظر إلى أن تجي الكهرباء الوطنية، شغل الفرن الكهربائي على حرارة 328 درجة پرلمانية بعدد نواب الپرلمان، وأنتظر إلى ان تستوي العجينة، وإذا طفت الكهرباء الوطنية قبل ما تستوي العجينة لازم تعيد الموضوع من جدة وجديد، هسة خلينا نفترض أن الكهرباء الوطنية ما تنقطع لمدة ساعتين ، راح تستوي العجينة إللي خمرتها منها وبيها مثل الخل، دودته منه وبيه، طلع العجينة إللي هسة صارت كيكة يسموها كيكة الحكومة، إقطعها بعدد رؤوس الكتل إللي خليتها بالبداية، ومو مشكلة إذا القطع مو متشابهة لو مو متساوية المهم المشاركة مثل ما چان أبو زيدون يگول وإحنا خسرانين بالطوبة…إخوان المهم المشاركة، وجيب كل قطعة من كيكة الحكومة وخلي عليها علم يمثل التكنقرطة مال هذي الكتلة والقطعة.
يفضل أكل القطعة مع النستلة، وتقدم حارة حتى لا تسبب بواسير وعسر الهضم.
أكلوا وأدعولي لي…فان الله لا يضيع أجر من أحسن عمل كيكة حكومة متنقرطة بالبيت وبمطبخ البيت السياسي، بس إذا طلعت الكيكة شايطة، لازم تگعد تلحس الگوشر والوعود، وتنظفه ونفسك تلعب، في إنتظار وصول وجبة جديدة من روؤس الكتل، وهاي ما تطلع إلا بمساعدة دولية، وبالعمر مرة وحدة.