المثل الشعبي وشيعة وضايع راسها ينطبق تماما على حكومتنا الوطنية , حكومة المقبولية والشفافية , فعلا وشيعة وضايع راسها , وما نعرف ياهو الرئيس وياهو المرؤوس , اليوم وصلني خبر بالباكيت من نائب بالبرلمان , يكول أنّ رئيس الوزراء حيدر العبادي وحسين الشهرستاني ما موافقين على اتفاق عادل عبد المهدي مع حكومة الإقليم , ويكول هذا النائب أنّ الوزراء بالحكومة كلمن يكول أنا شعليه , وهذا الشعب المسكين يريد يعرف راسه من رجليه ما جاي يكدر , ومحد جاي يكول حقيقة هذا الاتفاق وشنو اللي وقّع عليه عادل أفندي , وما جاي نعرف الصدك من الجذب , من جهة مسعود وبمؤتمر صحفي مع رئيس وزراء تركيا كال بعظمة لسانه هاي ال 150 ألف برميل هي من نفط كركوك , وهذا ما اعترف بيه حتى عادل افندي في بيان رسمي , ويطلعلك واحد سربوت مثل وضيع أبو كلل ويكلك لا , هذا النفط مو من نفط كركوك , وهاي الترجمة غلط مال كلمة مسعود بالمؤتمر الصحفي , طبعا بالمناسبة الشئ بالشئ يذكر , اللي جاب هذا السربوت الزغير بهذا المكان وخلّاه يعتدي على الناس الشرفاء مثل الجلب المجري أجلكم الله , هو السربوت الجبير , فشبيه الشئ منجذب إليه .
نرجع لاتفاق عادل أفندي , عادل افندي ما كال للشعب هاي ال 500 مليون دولار شنو فلمها ؟ , بس هي ؟ لو دفعة أولية راح تجي وراها دفعات متتالية مثل ما كال هوشيار زيباري في مؤتمره الصحفي بيوم اللي حوّلهن لبن أخته ؟ وكم دفعة هم محد يعرف ؟ هسه نريد نفتهم هذا الفلم , إذا رئيس الوزراء ما موافق على الاتفاق , والاتفاق لم يعرض على مجلس الوزراء , زين اشلون اتنفّذ بهاي السرعة ؟ وعادل أفندي عنده هيجي صلاحيات يوّقع بكيفه وينفذ بكيفه بدون ما يكون أكو قرار من مجلس الوزراء ؟ وجماله يكولون حتى التحالف الوطني ما يدري بهذا الاتفاق , زين وهذا وزير المالية الكردي منو اللي خوّله بصرف هذا المبلغ بعد 24 ساعة من توقيع الاتفاق من غير قرار من مجلس الوزراء ؟ بربكم وبدينكم وبمعبودكم هاي حكومة لو ولاية بطيخ ؟ جا وينها الشفافية يا أبو الشفافية أشو ما سمعنالك لا حس ولا نفس ؟ بس لا تكول منتظر المارد المعنوي يطلع من القمقم ويشيل مسعود ويصلخه بالكاع ويخلصنا من النهب والبوك مالته لأموال العراقيين المساكين .
الشعب يريد يعرف شنو اللي صار ؟ هاي مال تلغمطوها على الشعب ما راح تكدرون , لأن كلها فاكّه عيونها عليكم , وهذولة كم زعطوط وسربوت مخلينهم يفتّرون على الفضائيات ويشتمون بالناس الشرفاء , ما راح تغطي عملتكم المصخمة , لو تجيبون ألف وضيع وتخلوه ينبح من الصبح لليل , نريد جواب هذا الاتفاق العار منو اللي وراه ؟ وشلون تنّفذ بهاي السرعة وقبل لا تعرف الناس بيه ؟ وشنو موقف الحكومة والبرلمان ؟ لو مال عمّك ما يهمّك ؟
