ينراد نهلهل لو نطك اصبعتين… الريس راح يوصل اسبوع الجاي بس حرامات المدارس معطلة جان طلعنة كم مدرسة توكف على طريق المطار تستقبله للقائد وحامي الحمة…
سيدي الرئيس ليش رجعت مو بعدها الدنيا حلوة هناك والجو حلو شعندك جاي على الطلايب اشو الشعب مرتاح والطلايب بس يم الساسة.. ابقى ارتاح اتونس لان متسوة جيتك..
سيدي الرئيس الشعب العراقي ينتظر جيتك بفارغ الصبر وهو متلهف ليغني لك هلا بيك هلا وبجيتك هلا .. سوف تاتي كما اتى الملك ارثر بعد انتصاره في معاركه الاسطورية… وسيكون يوم عودتك كاحتفال الاغريق بملكهم اخيلس.
هل ستجتمع مع الجميع بكونك رئيس للعراق ام سفير دولة كوردستان الديمقراطية الصديقة وهل المجتمعين سيستمعون وينفذون اوامرك ام ستأتي في الاجتماع وتتكلم علن رحلتك وكيف قضيت الاجازة بين المنتجعات وغيرها…
لم اراك يوما وقلبك متكسرا على الشعب المسكين ولم اراك يوما وانت متعصب او حتى متالم على شيء في العراق لماذا هل لانك لاتعرف ماذا يحدث ام لانك تعرف وتتناسى مايحدث..
سيدي الرئيس اسألك بالله ان تستقيل من منصبك لانك حققت للعراق مالم نكن نحلم بها واخاف ان يأتي يومي ويذهب هذا المجد الذي حققته لانك فعلا امنت وعدلت ونمت…
انا بنظري الرئيس يجب ان يكون هو الحاكم الفعلي في العراق لان احنة مو وجه ديمقراطية برلمانية ورئيس وزراء مثل بريطانيا وغيره .. احنة المفروض يكون الحكم عدنة رئاسي يعني الريس هو الكل بالكل مو مثل هسة الريس لايحل ولا يربط… العراق تعودا على الرؤساء والملوك لا على دولة رئيس الوزراء وغيرها من الاسماء الرنانة …
انا لا اطالب برئيس دكتاتوري وانما رئيس يأتي عن طريق صناديق الاقتراع مثل ماحصل في مصر ومايحصل في امريكا وغيرها من البلدان التي تعتمد الحكم الرئاسي بدل البرلماني…
لم اكن اعلم ان قدوم الرئيس من الخارج سيشغل المواطنين جدا وبدا كأنه حديث الساعة فهذا جاري ابو سحر محظر صور الريس ويريد يسوي منه سُفرة للاكل.. واخوية ابو رياض رايح يشتري صعادات فسألته لماذا هل لانك ستفرح بقدوم الريس كال لا تظل غشيم اليوم لعبة برشلونة… واذا فازوا احرك الجو
والله اهتمام بقدومك ياسيدي بحيث اتصلت بحسون المطيرجي وكتله شراح تسوي من يجي الريس جاوبني بضحكة وقال: ياريس حبزبوز هو اني طيوري من يلعبن بالسما واشوفهن تسوة شوفت اكبر مسؤول سياسي مو الريس؟؟!! حقة الرجال الطيور ماخذه كل عقلة اعذرة مام جلال…
بعد سؤالي لاصدقائي رجعت للبيت ونمت مثل ماينام رئيسنا في اهم المؤتمرات والاجتماعات وبديت اتخيل الاجتماع مع الرئاسات الثلاثة:
مام جلال: شلونك نجيفي وانت يامالكي والله اني مشتاقلكم بس شو يسوي واحد لازم يطلع يتعالج ويخلص من حر مال هذا بغداد..
نوري: اي مام تحتاج لان انت دتتعب هواية ومدتنام زين من ورة الديك الرومي و….
النجيفي: دشوفلنة الصور وكلنة وين رحت علمود نطلع بالاجازة
وظل مام جلال ساعتين يحجيلهم على الرحلة مالته ونسوا الشعب والصحفيين برة ينتظرون.. خلصن الساعتين خابروا المالكي كلولة السفير الايراني رايدك .. تذكروا ان هم فاتهم الوقت فقال مام جال:
اني اطلع للصحفين واقول نكتة بالبداية اضحكهم وبعدها اكول قررنا تكملة المشاورات بعد كم يوم والامور تتجه نحو الاحسن وتضيع السالفة…
فزيت من هذا الكابوس ولكن هو ليس كابوس فهذا مايحصل عندكم عندما تجتمعون فلا تتذكرونا بشيء وكل شيء مؤجل عندكم لانه يهم الشعب ولا يهمكم..
نتمى يامام جلال ان تتقدم بالعراق الى الامام وان تكون جيتك الاسبوع القادم جيت خير علينة واتمنى ان تدفع العملية السياسية للامام شوية مو ترجعه وره… ونتمنى منك ياسيد الرئيس ان تنصف الشعب وتفكر به لاننا سوف نحبك ايضا وسنتقبلك بالهلاهل .. وهلا بيك هلا وبجيتك هلا مام جلال
* حبزبوز الحفيد واحد من ابناء الشعب جان جدة من اشقياء بغداد… لا كاتب ولا صحفي ولا اي شي من اشياء المثقفين ([email protected])
وعلى الفيس بووك حبزبوز الحفيد
