بشرى للمقندلين والمقندلات
الله ما ينسى عباده، بس گلنا يا مدد والله جاب إلنا دليل ما يقبل غلط على أن قانون منع العرگ مو شرعي لأن يخالف نهج الإمام الخميني في حبه للعرگ والخمر، وأنتو تعرفون مخالفة نهج الخميني في أي قانون في العراق يعني فقدان الشرعية عن هذا القانون، أصلاً العراق يفقد شرعيته كدولة ووجوده وسيادته إذا يخالف هذا النهج ، ويكون صفته دولة نغل، مو دولة شرعية. ولك أبو صماخ والگشرة ، نسيب الشيخ البواسيري شجابك وورطك وي مخالفة إمامك !
ولك بعد ما صحت يا مدد، تذكرت ديوان الخميني الصادر عن مجلس الأعلى للثقافة والفنون بمصر سنة 2003 وترجمة الأستاذ الدكتور محمد علاء الدين منصور ( غير بخت هم عدهم مجلس أعلى للثقافة وإحنا عدنا المجلس الأعلى للسخافة ). تعال يا أبو صماخ وشوف شگال الخميني عن العرگ والخمر .
يقول قدس مزاجه الخمري :
قد ناء الصوفي والعارف من هذه البيداء
فأحتسى الخمر من المطرب فهو هاديك إلى الصفاء ! ها يابة، الإمام بنفسه يگول هاديك إلى الصفاء، مو هاديك إلى الشقاء والحرام، خو الإمام ما يجيب حچي بكيفه حاشاه مو لو مو مو ؟؟؟ يعني إذا الإمام ما شارب الخمر ويحچي هيچ ما يجوز وحاشاه من ما يجوز.لا وأكثر، تعال شوف عنده قصيدة ينطينا بيها أصول شرب العرگ برمضان ! ينصح بشرب العرگ و الخمر برمضان بالسحور لأن وقت الإفطار يكون مشغول وي حبيبه ! لا وفوگاه يعرف ترتيبات الپيك وينصح بالإستماع إلى الطرب وي العرگ : أقبل رمضان، هوت الخمرة وتداعت الخانة
أجّل العشق والطرب والخمرة يا صاح لآوان السَحر
فقد أفطرني حبيبي الدرويش نبيذاً
قلت: قد أورق صيامك وأثمر
بالخمرة نتوضأ
ففي مذهب العابثين سينال عملك الحسنى !
فلتسامحني أمهات شهادء حرب إيران لأن بسبب هاي القصيدة آني مستعد أمسح عن الخميني جريمة الحرب لسنة وحدة وتبقى عنده سبع سنوات. يمعودين طلع أبو الخمن صاحب كيف ومزاج، طرب وخمرة، لا ويتوضأ بالعرگ ويحب واحد ( عاف جميلات إيران كلها ويحب واحد درويش، شوف الزهد والتقوى)، ويتغزل بمذهب العابثين، يعني مو بعيد چانت ببيته عنده جدارية لصموئيل بيكيت شيخ العابثين، ويجوز چان مثله الأعلى في العبثية والصعلكة حسين مردان، ويجوز أبو الخمن چا ينادم (يعني يطگ الپيك ويشارك الگعدة) وي جان دمو أبو العبثية العراقية.
ها يابة أبو صماخ
هسة منو مخالف الشرع والقانون ؟
إحنا المقندلين والمقندلات على مذهب العابثين وي الخميني، تگدر تعترض ؟ مو راسك الچبير راح يصير چيس ملاكمة، وإذا أنت تگول ما قاري ولا تعرف ديوان الخميني النوب راح تصير دفراتك ببلاش كل مية دفرة وياها بلغم، حتى الصفر محسوب وداعتك ! ولك شلون أنت خايف على المذهب والدين وما قاري ديوان الإمام ؟ مو هذا مرجع كنبرن ، والله لو يسووك سواية وما يبقون منك ولا تيفو، وحيل بيك، خليت نفسك بكماشة، يعني إذا أنت قاري الديوان وتعرف حب الخميني للعرگ يعني أنت تخالف نهج الخميني وهذا من أكبر المخالفات الدستورية في العراق وتروح بيها أربعة إرهاب حوزوي، وإذا أنت ما قاري الديوان يعني أنت جاهل بالمنهج وغير منتمي لنهج الخميني وهاي مخالفة ولاء وإنتماء تروح بيها لدرب الزلگ.
وأنتم يا إخوان الكاس والمزاج والكيف
إحتفلوا بهذه البشرى، وشاركوا هذا حتى الكل يعرفون شنو كان نهج الخميني وي العرگ حتى نسقط هذا القانون إللي مستند على نهج المراجع، وماكو مرجع أكبر وأبعد من أبو الخمن، عنده يقف الجميع، وهذا أبو الخمن وهاي سالفته وي العرگ، يعني إحنا دليلنا أقوى بإسقاط هذا القانون… يا مدد.
………خارج النص
أدري أبو الخمن إذا أنت هيچ صاحب كيف وپيك، ليش ما شربت عرگ وشربت بداله السم في 8/8/1988؟
