موديل براقش

وحق الكائنات عبالكم حاصودة وتحصد بينا، ومثل ما ذاك أبو الأزلام أول ما أستلم الستيرن طلع باللتلف زيون وهو شايل منجل وولابس چراوية حمرة وقطعتين بيجية (أيام چانت بيجي ضمن الحكم العراقي وتصدر ملابس للرفاق الحزبيين) وبدا يحصد بالحنطة ما أعرف بالشعير، لأن هو چان ياكل حنطة فيرست كلاس وإحنا چنا ناكل شعير لاست كلاس حالنا حال بغال وحمير الشغل، وتالي طلع هاي إشارة لحكم الإعدامات والقتل والشلع إللي إعتمدها أبو النعلان، يلبسنا نعل أبو الأصبع ويطير راسنا، هسة لو ملبسنا شي يسوى وخلي يقتلنا هنيئاً مريئاً وبالرفاه والبنين عددا.
يعمودين وين ما نولي وجهنا فثمة عزرائيل، وحتى أبو عزرائيل، عبالك عزرائيل بوحده مو كافي النوب طالع إلنا ابوه وباچر عشيرته، وبعد أسبوع كل صنف العزرائيليات، وراح نشوف يوم إللي ما ينقتل من عدنا واحد راح يجي شيخ عشيرة ألبو عزرائيل (بشرط شيخ عشيرة عام وأمير مو مال بعد 2003) ويطلب فصل عشائري عزرائيلي وما راح نتفاصل إلا بمجزرة سبايكرية، وهناك نسمع ضحكة عزرائيل وهو يگول ” إلا طحين !!! !
والقتل والموت حاير بينا، خلصت كل موديلات القتل، الكاتم والهاون والقنبلة والمفخخة والزوجة الناسفة والرگية المفخخة والميت المفخخ وإجتماع مفخخ، ولكم أعمدة مفخخة، هواء مفخخ، أمنيات مفخخة (صدگ كلمة مفخخة شنو أصلها ؟؟؟ ومن يا عمام؟ أيباااااااااااخ أيبااااااااااااخ گبل چانت فخاتي تارسة كل شارع بالعراق وما أعرف شنو غير الفخاتي إلى مفخخاتي، غير البخت القندرة وإللي ما ينلبس بدرزن كرتة (البخت مو القندرة).
والتقارير النوب تگول الكلاب همين تريد حصتها، مو بس عزرائيل، أي والكائنات، الكلاب كلاب ، كل سنة ( الميلادية مو الهجرية لأن حرام نجيب طاري الكلاب بالسنة الهجرية) ، كل سنة الكلاب المسعورة تقتل بالعالم 59 ألف شخص رقماً وكتابة (فقط تسعة وخسمين ألف شخص لا غير) بالعض وداء الكلب، طبعاً بهاي الإحصائية ما داخلة عدد إللي ينقتلون من العراقيين لأسباب أخلاقية لأن ما يصير نگول إحنا إللي يقتلنا كلب أبن كلب (باللهجة العراقية أكو فرق بين الكلب والچلب…فالكلب صدگ كلب أبن كلب، والچلب يصير حجي چليب من عندك مصلحة يمه)، وطبعاً لتحقيق طلب الكلاب المسعورة ماكو غير أرضنا المباركة، لأن السيد الكلب ما يعجبه ياكل إلا من أرض مباركة ولا يعجبه يخري إلا على أرض مباركة ببركة الكلاوات والشعارات والديمضراطية.
تعال يا سيد الكلب وجيب كل جماعتك وتفضل عدنا ، وسوي تحالفات وتألفات وعوي براحتك وراح تلگى هواية أصدقاء وحبايب إلك بأرض العراق وما راح تحس بأي غربة، وراح تشوف قسم من ربعك وأهلك صايرين عراقيين وبدوا بالقتل قبلك هيچ لواگة لحضرتك، وإحنا يا سيد الكلب ترى حايرين من نريد نحسب حصة كل واحد من القتل، وهي حصة مقدسة لأن كل واحد جاي وعنده رسالة مقدسة ولازم ينجزها، وإحنا علينا بس نحسب إلى ان يجينا السرة، فمنعرف عليمن نحسب القتلى، على السياسيين لو على الكلاب لو الچلاب المكلبة أو الكلاب المچلبة أو على ربعك إللي صاروا عراقيين ، صدگ حيرة وظلمة ودرب عاثور، الله لا يرويك هيچ حيرة لأن من تنصاب بيها راح تعض ذيلك عبالك عدو متربص بك…وراح تسالني شنو معنى متربص، أجوابك وأگول هو من إرهاصات وينبغي !
بالأيام الجاية راح نشوف ونسمع أن الكلب صار قائد أمة، ليش لا ظل عليه، أشو ياهو يگدر يعض صار قائد وعنده راية، يا سيف يا راية ويا فكر وعقيدة، وتتذكرون إحنا كل فترة عدنا قتل موديل شكل، من كثر الموديلات ضيعنا الحسبة، القتل بدا من الخبل قسومي، وبعده القرقوز بيد جمال عبدالسلام (شلون إسم يناقض نفسه) المشوي والتكة، و عبدالرحمن الططو، والبكر الخبيث، ونعلة على صفحة صبحة صديم، ومن والاه وعاناه على القتل من أبو طبر والملا برزنة والملا خمنمن (هل يجوز شرعاً أن نقول للإمام روح الله الخميني خمنمن ؟ ) وجابر وفهد وحسني وميتران وبرويز مشرف (هذا شجابه بالنص ما اعرف) وأسامة والرفيق بوش المؤسس والرفيق بوش الأبن وروح القدس، والرفيق المناضل پول بريمر هم كاهي وهم گيمر، والرفاق إللي إستلمونا قتل بعد 2003 ماكو مجال أكتب أساميهم لان راح أحتاج إلى مقدمة إبن خلدون بس حتى أعدد صفاتهم ، وبعدين إذا أكتب إسم أي واحد قبل اللاخ راح تصير شغلة زعل وما نريد نزاعل أحد.
القتل الجاي بالكلاب المسعورة راح يبدي، وروحوا شوفوا وين أكو كلب أجرب (وفي نسخة الموسوعة البريطانية چلب جربان والقرعان ) راح يشيل چوالاته ويحضر نفسه حتى تجي له حالة سعررة (يصير مسعور) ويتوجه إلى أرض القتل المباركة للمشاركة في عملية الحصاد الأكبر للعراقيين. وعلى نفسها جنت براقش…مثل ما قرينا بدرس الأدب…ومن سألنا منو هي براقش گالونا إسم كلب العشيرة !!! ومن يومها يريدون ولد براقش المشاركة في القتل ثأراً لدماء أمهم السيدة الجليلة براقش بنت الكلب … هسة قحط أمثلة علمتونا على براقش !