مقارنة: العربنجي والسيد القائد

هسة وكتها، الشغلة بحرارتها، ولو ما نعرف شنو مصدر هاي الحرارة، چولة لو صخونة، المهم، أريد أدلو بدلوي ( گولها عشر مرات بسرعة وإحصل على وزارة مجاناً) في التشكيلة الوزارية التكنوقراطية ، راسي براس وي السيد القائد، وللعلم، آني السيد العربنجي حفظني الله من المارد في القمقم، أعلنت إصلاحات وزارية گبل بوخة السيد القائد بثلاث سنوات، وأعلنتها بيوم السعادة العالمي سنة 2013 …هنا على موقع كتابات.
بس لأن آني سيد عربنجي محد عبر تشكيلتي ، وما عندي وصلة خضرة ألفها على راسي لو اسويها جودلية وأگعد عليها وأگابل المنطقة الخضرة، في الربيع والدنيا حلوة. هسة ولك اللوتي يا سيد القائد، لو بيك خير تطلع تعتصم بحر تموز مو وي الدنيا ربيع والجو حلو وطالع تگعد على الشط وتسويها منية علينا لا أبو حتى الإصلاحات إللي يصفگ لها الغشمة. ليش ما طلعت سيدنا بالصيف من وصلت الحرارة لخمسين وماكو لا ماي ولا كهرباء ! وبعدين تعال أگول لك، إنت أبو الإصلاح، هذولة الحمايات مالتك بالجكسارات، هذولة مو يعتبرون خارج الدولة وخارج القانون ؟ لو إنت السيد القائد خارج نطاق تغطية القانون ؟ من نعلة ونعال على راسنا لأن هذا كلها من يدينا.
المهم يا جماعة… لا أحد يحسبني على هذا وذاك، ولا على الشمال أو الجنوب، ترى آني ما أعترف بأي بوصلة، أمشي وين ما تاخذني العربانة، أتركها تمشي براحتها فهي مأمورة، ولا أريد من هذا الحچي تگولون آني ضد التغيير، لأن أؤمن أن أصغر حصوة بالماي تسبب موجات تكبر وتكبر، وأن العطسة الچبيرة تبدي بحكة خشم، وهاي هسة إحنا بيها، بس لازم نبتعد أشوية حتى العطسة ما تجي بوجهنا.
عموما…حتى التشكيلة الوزارية أو (الكابينة لخاطر عباس البياتي) بسطعش وزير هي تشكيلة مبالغ فيها وممكن ترشيقها أكثر، لو صدگ ماكو محاصصة ولا تحزب بيها، بس أبو يسر هم رصيف وهم جسر قرر
سطعش وزارة لأن جابها تفصال على مقاس الحصة السياسية، مع ذلك طلع چم واحد زعلانين ومبرطمين، وتشكيلة العربنجية بيها بس ثمان وزارات وداعتكم، مفصلة تفصال على حاجات البلد، مو على حاجات السيد القائد أو حاجات ما أعرف منو أو منو. وهذا الرابط مال التشكيلة إللي أعلناها في يوم السعادة العالمي سنة 2013، شوفوها وقارنوها وي إصلاحات السيد القائد.
صوّت لتشكيلة العربنجي وإحصل على زيارة مجانية لموقع خيمة السيد القائد… گبل ما يجي الصيف.
أول خمسمية تصويت، يحصلون على قطعة من جودلية السيد القائد، بشنو تحكها يصير بيها تغيير، حتى لو تريد تغير أم الجهال، بس حك قطعة جودلية السيد بوجه أم الجهال، راح تتغير بقدرة الدستور وإرادة الإصلاحات.
هذا الرابط… نبدأ التوصيت الآن:

http://goo.gl/CcNak3