آني ما اعرف أسبح، بس أحب أروح للمسبح من أيام مسبح البلدية بالبنوك ومسبح المسبح ( هذا مثل مطعم المطعم وكبة الكبة ورافع الرافعي)، وهسة كلش متندم لأن ما أعرف اسبح، ندمان ندم يا فحل عبالك كان عندي خاتم سليمان وضاع ( يقال أن علي حاتم السليمان عنده نسخة من خاتم سليمان ومن هاي صار قطري وتعيشون وتاكلون غيرها)، هسة لو أعرف السباحة كنت أركب الموجة حالي حالهم، هي الموجة شي يرادلها بس زرگ وأركبها ، وكلمة الركوب هنا تحمل إيحاءات أيروتيكية وأكروپاتيكية وأنطولوجية متداخلة في ثنايا الإنجرار العاطفي.

وفي هذا السياق والسياق إللي بصفه وإللي وياه، صرت خارج اللعبة مع العلم آني نطيتهم الطوبة وحتى النعلان والشحاطات حتى يسووها بدال الگول، نعلان عد هذا الفريق، وشحاطات عد الفريق الثاني، طبعاً هماتين (وفي رواية منقحة همين) صارت حساسيات وحزازيات وگعدة عشائر وبوس چتاف، ليش هذولة نعلان وليش ذولاك شحاطات، وكان جوابي دائماً يتسم بالدبلومسية متأثراً بنهج شيخ الدبلوماسيين ودكتورهم إبراهيم السرسري فأقول ” إن مقاييس إختيار النعل والشحاطة لا تنساق خلف إنتماءات فوضوية كونفوشيوسية متخلخلة بل لها قوالب إطارية منتقاة من إنتماءاتنا الإستقصائية عن كل حقيقة وراء الشمس”… ودمتم للنضال الوطني. أشو الكل صاروا سابوح، وحتى إللي كان يغرق بطشت أم الجهال أو بسيان المنطقة، وين ما وين وشلون، هالموجود، جيب چسوة وألحگني للمظاهرات، هو منو بحال منو، وعلى گولة نبيل بدر ” كل واحد تحت الموس…المريش والمگصوص” من طلع بدور ” زينهم تواليت” في مسلسل نسيت أسمه قبل ثلاثين سنة.

المهم يا أخوتي في كل هذا الضياع والخربطة ، ترى الشغلة عاوية، ما تفيد وياها ركوب الموجة، لأن إستراتيجية إيران – الحاكم الفعلي للعراق – هي إمتصاص زخم المظاهرات والتسويف وقتل الوقت مرة يشمرون الطوبة للأوت بعيد فوگ المدرجات ومرة يأشرون للحكم الطوبة ما بيها هوا ومرة حجم الطوبة مو شرعي، ومرة الملعب إضاءته قليلة، نفس الفلم مال المفاوضات النووية إللي قشمروا بيها العالم والدثو جون كيري، إلى درجة الرجال داخ ووگع من البايسيكل ودعم الرصيف وهو خبير بالبايسيكلات من أيام البيسيكل تك پايدر.

آني ما أريد أسويلكم ديسأپوينتيد، بس تعالوا ونشوف شنو إللي صار من يوم ما بدت المظاهرات ! أشو الأعرجي طلع گول وفلت بالمليارات، اشو القذر المطلگ ضرب الدخل وبح إختفى، أشو عمار وقلطاغ…أقصد صولاغ، أعلنوا عن بدء رحلات شركتهم الخاصة فلاي بغداد وي المظاهرات حالهم حال علي حاتم السليمان في إستخادم الكلمة المناسبة : طز بيكم وبمظاهراتكم . أشو قاسم أبو الگيزر فلت من الفلقة وطلع فول أمپير وبفولتية عالية من قاعة الپرلمان، أشو تقرير سقوط الموصل بال عليه كلب ومحد عبره ، أشو أبو إسراء بعد تقرير الموصل سافر من البوابة الرئاسية بمطار بغداد وراح إيران وأستقبلوه بصفته المقالة نائب رئيس الجمهورية ورجع بطائرة إيرانية ونزل بالتشريفات، أشو أبو شفايف چنها شفايف بعير في موسم الزواج الجبوري راح للدوحة وإجتمع وي المجرم الهاشمي وهمين طززززززززززز بالجميع، أشو عمنا أبو يسر لا إجى يم وزير المالية إللي ذبح الميزانية والإقتصاد ذبح ولا أحد سأله تعال كاكا خوش خيار أشو أنت من چنت وزير الخارجية السفراء صايرين خريط ونصهم بلا شهاادت وربعهم بشهادات متوسطة وربعهم الثاني ما لهم علاقة بالسياسة، وأشو صولاغ بعده لاعب جولة والطائرات العراقية صارت مضحكة وشركة خطوط الجوية العراقية إللي چانت تسوى راس كل صولاغي صارت فضيحة ويغسلون جامات الطيارات بالبريج، ومضيفة محجبة، والطيارة ما تطير إذا مو المقتل ! وأشو عادل الزوية بعده وهو إللي كان وزير المالية من طارت الميزانية لأربع سنوات ما نعرف وين وهسة وزير النفط ولاعب دور القچغچي وي كاكا مسعود، يبيع النفط والدخل بالنص، أشو زيرة الصحة بعدها والمستشفيات العراقية الطوارىء صايرة گراجات للسيارات وسرير المرضى على بلوكات ويار ريت لو بلوكات كلها بنفس المستوى، جهة ثلاث بلوكات وجهة بلوكتين، وأشو الشهرستاني بعده يلعلع وهو إللي باگ فلوس الكهرباء وورط العراق بعقود نفطية للشركات على حساب سعر البرميل فوگ ثمانين دولار ، يعني وي سعر النفط هسة، إحنا لازم ندفع للشركات إللي تطلع النفط على كل برميل أربعين دولار، ياااااااااااااااا حلاوة ، اشو وزير الداخلية أبو عيون الناعسة بعده هو هو وتفجير خان بني سعد كل شي مجاب نتيجة، ودماء 120 مگموع بالعيد ما لها حوبة، أشو زير الدفاع العبيدي هو هو وماكو أي إجراء تعال شوف ليس طيارة أف 16 توگع بأميركا قبل ليلة من طيرانها للعراق، وتعال ليش الطائرات إف 16 لازم بيها شروط وما تطير إلا بموافقة أميركية وما مسموح تطير فوگ أربيل، هي عراقية وإحنا دافعين فلوسها صح لو آني غلطان ! أشو عمو فؤاد يعوف كل مسؤولياته (صدگ هو شنو مسؤولياته غير هو رئيس الجمهورية ) ويروح يتوسط بحل مشكلة الرئاسة في الشمال عبالك مبعوث خاص من الأمم المتحدة… وأشو وأشو أشو…..ما تخلص وداعتكم لو أعدد من هسة لراس الشارع (بداية زمنية ونهاية جغرافية).

هسة عرفتوا شنو نتيجة المظاهرات !!! وهسة عرفتوا شنو ركوب الموجة؟ هاي الموجة حتى بس نغرگ حالنا حال آلان الكردي، نغرگ بآمالنا وأحلامنا إللي حملناها بأول يوم مظاهرة، راح نغرگ كلنا، وساعتها، راح نعرف أن الإصلاحات هي مسح جامة شباك قذر جداً في بيئة قذرة جداً، يعني، بعد خمس دقائق ترجع الجامة مثل ما چانت، بس لازم ندفع فلوس التنظيف مع الممنونية.