مزعــــــطة

إي يابة…خلونا اليوم ناخذ راحتنا بالسوالف لأن الأخبار كثرن بهاي الفترة وآني بصراحة صار عندي تهيج بالكيبورد من كثر ما كتبت ، وتدرون الكيبورد وي التهيج ما ينراد..تكتب إنحب والكيبورد يحوله إلى إنچب .والمصيبة من تكتب لصاحبتك  (أبوسك) والكيبورد بسبب التهيج والغيرة يحولها إلى (أدوسك)!
وخلونا وي سوالفنا :
يعني ترى كلش عيب واحد يعزم ناس على غدا وعشا وبيتوتة وبعدين يروح يدگ باب الجوارين  “يمعودين تعالوا لحگولي ترى ما عندي پارة ولا فلس ولا مكان، هذولة شنو راح أغديهم لو أعشيهم ووين راح ينامون” ؟  لا ويكابر ومسوي نفسه شيخ عشيرة لو عجيد الگوم أبو الناموس وبعده يصر على دعوة المعازيم،” تعالوا منين ما تريدون”  بالحچي والهيوات ما حد يلحگه ، طبل عالي الصوت، فارغ !
هالشي يرجعني إلى سنوات، من چان الجنرال برويز مشرف هو رئيس پاكستان، هذا هم چان واحد لوتي وملعب وصاحب هيوات، بس كان فنان، وين أكو طالبان افغانستان لو القاعدة جابهم وخلاهم عنده، وكل أشوية يا أميركا تعالوا أنطوني فلوس لأن دا أحارب الإرهاب، أصلاً هو چان يجيبهم بدعوات وعزومات رسمية وبعدين يدگ باب هذا وذاك يتوسل الفليسات والأسلحة والأباتشي ، ونفس اللعبة راد يلعبها أبو الكفشة علي عبدالله صالح من حول منطقة الشبوة في اليمن إلى معسكر مفتوح للقاعدة حتى يبتز أميركا ودول المنطقة بالمساعدات والفلوس والأسلحة، وتالي، لا برويز مشرف هسة موجود ولا علي عبدالله صالح، بس صاحبنا أبو الهيوات بعد ينفخ لأن بعده ما واصل إلى مرحلة الخفة بحيث تطير البالونة و….تطگ !
صاحبنا عنده بيت كبير ركن ومفتوح على ثلاثة شوارع !! أي كلش ما معقول بس هذه هي الحقيقة، بنى البيت كله خاوات من جيوب غير ناس، بوگ ممكن، رشاوى همين ليش لا، ابتزاز أكيد، عصابات لا تحچيها، وفوگاها گاعد ركبة ونص وياخذ المقسوم.
مسعود آل برزنة هو إسم صاحب هذا البيت، لوتي ملعب ورئيس عصابة آل بارزوني، لزگ بينا اللاجئين الأكراد السوريين بإعتباره هو قائد الفتح المبين لكل أكراد العالم ، وصاحب خان جغان – فرع شمال العراق، جابهم وخلاهم يصرفون فليساتهم وليراتهم بأربيل، وبعد ما خلصت الليرات وصاروا ينامون بالشوارع، أكتشف مسعود آل برزنة أن هذولة يحتاجون واحد يصرف عليهم ويغديهم ويعشيهم ويسكنهم ، وماكو أحسن من جماعة بغداد إللي رايدين بس مسعود يرضى عنهم لأن رضا مسعود من رضا صندوق الإنتخابات، والطريق إلى الكرسي لازم يمر من مصيف صلاح الدين، ومسعود إللي لحد هسة ياخذ 17 % من أرباح بغداد، رغم أن هاي النسبة راح وكتها وسبب أخذها وكل القرارات إللي مرتبطة بيها تكنسلت وصارت من عهد النظام البائد، بس مسعود مظل مچلب بهاي النسبة والجماعة ببغداد ما يگدرون يگولون لا لأن الكرسي أهم من ألـ (لا)، تماما مثل كل قرارات مجلس قيادة الثورة مال أبو النعل صارن ورق تواليت بمصيف صلاح الدين إلا قرار الحكم الذاتي…قرار حكيم وما حد يگدر يلزمه لأن يعض !
طلع إلنا مسعود باكي شاكي ” على الحكومة الإتحادية في بغداد تحمّل نفقات إيواء اللاجئين السوريين في أقليم كردستان “.. ولك مصخم عزا العزاااااااك، منو گلك لفهم، وبعدين أنت تگول برسالتك ” أقليم كردستان” يعني الحكومة الإتحادية شي عليها؟؟؟ أنت مو عندك دولة ونظام وحكومة ورئيس وزراء وعلم وفيزا وإقامة وجيش وميزانية وبلنص !!! ولك خزيتنا!! لعد شلون تريد تصير دولة إذا چم ألف ما تگدر توكلهم !! ليش الدولة بس قرار حق تقرير مصير لو لازم تعرف شي يصير وما يصير؟ ولكم والله سويتوها مزعطة، باچر لو عگبة كل طفل راح يوگف بباب البيت ويعلن إنفصاله عن جيب أبوه وبعد نص ساعة يرجع للبيت يبچي لأن راد يشتري لفة فلافل وبطل بيبسي وچيس چيبس ويلعب فيفا بپلاي ستيشن بس الفلوس ما چانت كافية، يا دوب گدر يشتري علج ميوة!
ومسوي نفسك بس آني وآني كاكا بارزاني هم جوهّ وهمين برّاني وتالي طلعت بوخة ونفاخة!! ولك صدگني لو ما تلحگ على نفسك وترگعها برگعة لو بأي شي ترى تصير طرطور بين الأكراد، وإشگد ما تدگ طبل ما حد راح يجي يدبچ وياك، ترى خذها مني، الدنيا ما تتأمن، والشغلة مو بس تجمع چم راس وتسوي مؤتمر وتوزع خمسة ألاف دولار لو عشرة على كل مشارك مثل ما تكرم الراحل جلال على شعراء الأكراد في المهرجان الاول للشعر الكردي إللي حتى الروسي كتب نفسه كردي وإجى وگال شعر باللغة الباشتونية !
بس أكيد هسة أكو شغل بأربيل ( عاصمة السياحة العربية 2014) والفلوس مال 17% مو كافية، فأحسن طريقة هي نسوي مثل مال برويز مشرف، نجيب ناس وبعدين نگعد نبچي ونلعب لعبة أبتزاز الحكومة، يا تدفعون يا هذولة كلهم نوزعهم على باقي المدن، وكلهم بذور إرهاب وشر وحاقدين ويائسين ، وللعلم أكو مجموعات من أكراد سوريا وصلت لباقي المدن خارج حدود دولة البارزان، أكو أكراد سوريين وصلوا الموصل وقسم لكركوك وقسم ديالى  وقسم تكريت والإنفجارات اللي دا تصير بطوزخرماته هي مقدمة لتفريغها وإسكان أكراد سوريين مثل ما گال قارىء من طوزخرماته دزلي رسالة ويشرح سبب الإنفجارات، وقريباً راح نشوف تشكيل وزارة يلزمها وزير كردي  إسمها وزارة شؤون اللاجئين السوريين إللي هم اكراد من (يستضيفهم) مسعود بس هم فقط لاجئين سوريين من مسعود يطلب مساعدة من الحكومة المركزية لتغطية نفقات الإستضافة !
آويلي كاكا مسعود…ادري البامية تنفخ بس ما كنت أتصور أنت هالگد تحب البامية…أگووووول..سنو رأيك لو تبدل على اللبلبي لو اليابسة ؟! جررررري وشوف بلكن تطگ وتتخلص من ورطة اللاجئين السوريين…بس الله يخليك سويها بلا ريحة لأن الحديدة حارة عالكيمياوي!
[email protected]