مبااااااارك
ويهلية ويهلية وطشوا الچكليت
والله لو أعرف أهلهل كنت أهلهل بنص الشارع وخلي أصير حبيب بن أبي صفرة المهلهل
شنهي ما شنهي !
يابة
ثبت شرعاً دون أي لبس فقهي ولا وجود لأي شبهات شرعية بإن أبناء الشعب العراقي الخايبين والبطرانين ماكو فرق كلهم ألمان، وأكيد سامعين قبل چانوا يگولون العراق ألمان العرب، ترى طلعت الحچاية چذب  ، لأن إحنا أصلاً طلعنا ألمان أصليين لا عرب ولا كرد ولا نقشبندية ولا كارل ماركس وليخسأ الخاسئون إللي يريدون يلزگونا وي العرب ويسمون العراق ألمان العرب…عررررررررب …كخخخخخخخخخخخخخخ:
إحنا شعب الألمان أحسن الشعوب
والما يصدگ بينا خلي يطبه طوب
والإكتشاف هالمرة لا من واحد عفطي حاشا السامع ولا من واحد ما يعرف ألمانيا وين صايرة ولا من واحد ما يعرف شنو العلاقة بين الدولمة والچلاق.
فقد أثبت الطبيب الدكتور كاكا نجم الدين وهو الطبيب الخاص لفرد شي چان عدنا بالعراق وإسمه رئيس الجمهورية، المهم هذا الكاكا أثبت للعالم الحر والمستعبد والدول المتقدمة والدول المتقسمة أن الشعب العراقي جزء لا يتجزأ لا بالمؤامرات البعثية ولا بالمؤامرات الدعوچية ولا بالخطط الكردو- ساكسونية أن العراق أرضاً وسماءاً وشعباً هم ألمان.  ومع أن أكو دلائل عديدة على أن العراقي هو ألماني قح مثل : أن شوارب العراقيين بالثلاثينات والأربعينات چانت شوارب هتلرية وأن يعرف أن حكومة رشيد علي الكيلاني كانت حكومة ألمانية ومن فشلت حركته راح إلى المانيا والكل يشهد أن العراقي يعرف قواعد مسابقات التلي ماتش أكثر مما يعرف أسماء ولد عمه ! بس مع ذلك فأن الدكتور نجم الدين أثبت ألمانية العراقيين بطريقة علمية جديدة .
هسة عوفونا من شغلة مام عايش لو لا…وخلونا نظل ورا كاكا نجم الدين، يگول الكاكا: مام جلال زين ويسلم على الشعب العراقي، وقام بجولة في السيارة  – بحسب كلام كاكا نجم الدين – في شوارع برلين للإطمئنان على الاوضاع والاحداث الجارية في العراق ويطمأن على بغداد !
ها يابة …نصيح بات لو دمبلة !
مو هذا يعني إحنا ألمان !!!
يعني إذا واحد يتفل ببرلين راح نشوف البلغم بباب المعظم ! وإذا فريق بايرن ميونيخ جاب گول مو غريب مشجعي نادي الشرطة يحتفلون وإذا بي إم دبليو إندعمت في هامبورغ مو غريبة عشائر أبو دشير يروحون فزعة لأن بي إم دبليو شركة تخصهم !
والألمان عارفين هالشي وما ناكرين والدليل بوابة عشتار موجودة بمتحف برلين، وحتى هواية أكو أسماء عراقية لها جذور ألمانية مثل موحان إللي هو بالأصل موهان ، وحتى كلمة شماكل العراقية هي أصل عائلة شمايكل الألمانية إللي من أجو يسكنون بأرض الاجداد عراق العظيم الناس تفاجأت من ريحة حلوگهم لأن هاي العائلة  چانت تخلي هواية ريحان بالأكل فجماعتنا بالعراق لعبت نفسهم من ريحة الريحان إللي چانت تعط منهم مثل ما تعط ريحة الإباط من عراقي في عز حر تموز داخل كوستر ما بيه تبريد ،  فگامت الناس تصيح على أي واحد من هاي العائلة : شماكل ! إلى أن خلوهم يهاجرون ويرجعون إلى ألمانيا ويكونون عائلة شمايكل.
وهم زين مام جلال راح يتعالج بألمانيا مو بالصومال…لأن لو رايح للصومال چان يطلع جولة بسيارته في شوارع مقديشو حتى يطمأن على الشعب العراقي ويتابع أحداث بغداد..وكنا نكتشف إحنا بالأصل صوماليين…وآويلي على الصومال…أكيد چنا راح نطيح حظها مثل ما طيحنا حظ ألمانيا. خلونا على أللألمان بلا طمع ….والعاقبة للثول !
[email protected]