صدام لعب بينه جوله، ودغمث بينه تدغمث، ولعب أرواحنه، وما خله ناقصه ما دگها.
الرفاق، والأمن ، والمخاتير، والوكلاء، والشيوخ، وكتبة التقارير، هم ما قصروا، ما خلوا ناقصه ما دگوها، وإنوب إنداروا على أرواحهم، وگاموا ناس تحرگ ناس.
الكتاب والشعراء والصحفيين والفنانيين والكاوليه هم خذولهم بينه شوط، لعبوا ويانه تك گول، وتلوگوا لواگه، ومسحوا أچتاف، وداروا گعدات، وباعوا كلشي.
الضباط والنواب ضباط والعرفاء وسرية الأمن وجماعة باب النظام، وحتى جماعة الحانوت، سوونه مصرف، وضحوا بدمائنه وكرامتنه، علمود( الجيش كيان ضعيف يستمد قوته من النظام ).
ومن صفت، وإجا دبليو بوش، شوفوا وين صاروا، ناس نزعت ثوب ولبست ثوب، وناس صفت كلمن حدر نجمه.
شعب عجيب غريب، وحكوماته مثله تجي : عجيبه غريبه، مدري الأدمغه مغسوله، مدري أحد داعي علينه، مدري ( مذكوره بالكتب ) !
راحت ناس وإجت ناس، وبقينه على نفس وضعنه، ندافع عن الغلط، ونبرر للظلم، ونحط الذنب بالفقير. نجيب الگصاب نسويه والي، ونخلي من يصلح للولايه يثرم لحم.
دوله عمرها سبع تالاف سنه، وبيها ٣٢ مليون نسمه، و خايفه من شيخه موزه ومن العرعور، شعب بايع عقله للحرامي وللچذاب وللناقص، ومدري شلون يفكر.
شعب تارك الله اللي شكبره، الاقرب من حبل الوريد، ومچلب بأبوعلي الشيباني وأمثاله.
شباب بعمر الورد، المثلهم مالين مراكز الابحاث والمصانع والجامعات، ملتهين بميماتي، وراس نرگيله، وميسي !
بلد متروس علماء مدري بشنو، ما واحد يمد راسه، ويگول : خايبين هنا، إفريخاتنه، كافي، خلوا الوادم تعيش، موتوهم، ما تريد الوادم تطب للجنه عمي، الوادم تريد تعيش ، ويوم القيامه هم وربهم ينجازون.
كافي.. حتى أنه لعبت روحي من حچيي !
في أمان الله
