اعظم جريمة حدثت في ارض الواقع هي جريمة قتل المجرم قابيل لاخيه هابيل، والاثنان هما ابناء ادم البشرية ع، واجرم عظيمة حدثت في واقع الارض هي سخافة قتل خمبابا من قبل جلجامش وانكيدو، وهما ابناء بشرية ادم مع اضافة الملح والشطة والبهارات السومرية القديمة في اور ليتشكل وهم الحضارة القديمة في كون اجداد اطويرش نصفهم الهة ونصفهم بشر…
(يصدح صوت زيييييج بطول الباب وعرض الغرفة… لاتهتم له).
كان هذا نص ماتكلم به اطويرش مع نفسه وقد نزع عگاله في نص الهول، وانتصب امامه بطل عرگ ممتليء للنصف(النصف الاول سرطه اطويرش وهو يحاول الوصول إلى طقس التنسيم الاول لغرض الوصول إلى مرحلة الخرط الموقعي)… وبجانبه “مصفي خضره” تعود ملكيته الى زوجته، بينما يشكل الحندگوك حصة الثلث المعطل في تشكيل المزة…
يكمل طويرش حديثه مع نفسه:
– ادري ليش كتلتوا خمبابا؟ سيبندية… سرسرية… شنو داخل وياكم بالانتخابات؟ ماخذ الودي مال عشيرتكم.. انعل ابو طاهركم.. لا انوب الحلو واحد من يملطخهم بالطين محد يطلع له…منو يصدگ جلجامش وانكيدو ماعدهم عشاير وراهم… طلعوا ذبّابة جرش وچانوا خابصينه بروح النصر وجيب النصر وساحة النصر…(طويرش ياخذ فاصل عواد ويلط له بيگ بصحة خمبابا وياكل باگة حندگوگ عليهه ملح)… حبيبي خمبابا چيرس لابو الجرت كراعك… ادري مو انته يسمونك وحش ووگعت بيناتهم… اليوم لخاطرك خمبابا راح اكشف لك وللراي العام ولهيئة نزاهة تاريخهم الاسود… انته تدري جلجامش كان يغتصب كل عروس قبل لايلزمهه رجلهه… يعني جلجامش مغتصب مثل نيرون… ماتعرف نيرون؟ وحش وخاتل بغابة واسمك خمبابا اتريد تعرف نيرون؟ عگالي نزعته اتريدني انزع لباسي… عوفهه خمبابا… انته تدري زاير عبود يگول كل واحد يغتصب مرة غيره لازم شايف واحد يغتصب اهله فيسميهه الزاير بعقدة النقص، والعقدة ينراد الهه تعويض، بس اكو هناك تعويض مفرط… اي وروح خنياب الماشافته عيني.. انوب هاي عمتنه البربوگ عشتار… چنهه مرة بباي…. جلجامش اني اريدك ومشتهيتك… گبر… چا انتي مالگيتي غير واحد ناقص… المهم خمبابا خل افضحهم الك وللتاريخ(ينسمع صوت زييييييج عال يرن في ارجاء الغرفة بوجه التاريخ!!) كمل حجي اطويرش لخاطر كل الالهة النص الردن الي عدنه [عشتار راحت لابوهه انليل كبير الالهة : بابا… جلجامش صار شريف براسي… رحت شوفته الكندة مال اور كلههه… ماخليت حركة ماسويتهه اله، وبالاخير النذل يعز روحه علي…
يصرخ كبير آلهة سوگ شلال انليل ابو گرن… شلون؟ عشتار تنزع وجلجامش عايفهه… الا اطيح حظك جلجامش…]…
خمبابا خويه وداعتك كلهم لاگفين طين… انليل كبير الالهة بمكان مايملخهه بكم راشدي… كم نعال… طبگ وياهه…خلق انكيدو وذبه بالغابة تربّيه الحيوانات… ادري شيتعلم بالغابة؟ ادري انته دازه بمدرسة خاصة وي الحيوانات… انوب الحيوانات كلهه تركب ماتنام على ظهرهه…
خمبابا خو مادوختك؟ تره هيه رطينه… واخوك طويرش عاجنهم وخابزهم… من كبر انكيدو اتحدى جلجامش… جلجامش ابو گرون دز اخته المومس الفاضلة شمخه وانكيدو ما صدگ… وين اليوجعك… هذوله كلهم الگوادة تمشي بدمهم… ومن تصالحوا هدوا عليك وكتلوك… ليش ماادري…
بس خمبابه بيناتنه العرگ خلص…
(كانت هذه الكلمات اخر ماسمعته زوجته منه حين وجدته يشخر وحيدا في الغرفة بعد ان كان يرزل نفسه وحده).