آخر أخبار بغداد يگول أن الكابتن مؤيدانو لاميلدو عنده مهارات طوباوية، وكلمة (طوباوية) تتحمل معنيين بكيف اللاعوب. ولأن كرة الطوبة في العراق مجعوصة حيل فأن الكابتن مؤيدانو يرى أن هو راح يگدر يمسك الپمپ والنيدل وينفخ الطوبة وهو المعروف عنه أنه نفــّــاخ أگشر وخوش يضرب پمپ !
وأهل الطوبة وكرة الطوبة بكل مكان صاروا تحت نيران صديقة وغير صديقة بعد ما شافوا جوزيف بلاتير وهو يلعب في سياسات الدول وفي مصاير الشركات العملاقة وتشكيل الوزارات وتنصيب الأمراء مثل ما صار في قطر وعودة پوتين في روسيا من باب تنظيم كأس العالم، وهمين عقود وصفقات بعشرات الملايين من الدولارات والعمولات الضخمة لهاي العقود وأيضاً عمولات إعطاء الحقوق الحصرية لنقل المباريات وبيع حقوق البث لقنوات مشفرة ووضع لوحات إعلانات في الملاعب.
كل هاي الأمور تخلي الكابتن مؤيدانو يلبس شورت ماركة عفج – داس ويعلن ترشيح نفسه لرئاسة إتحاد الكرة في العراق حفاظاً على واردات الإتحاد المليونية وإللي تنافس واردات الأضرحة والمزارات والمراقد والتي كلش واضحة في الأولين واللاحقين في كرش حسين بن سعيد وكرش أبن مسعود وأبن حمود وحتى كان سبب تچليب الخبل أبو نص لسان بهذا المنصب، لأن منصب مال واحد يلعب طوبة بالفلوس ومو مهم يجيب گول لو يعرف يگوّل أو يعرف الفرق بين ضربة حُرة وزربة خَرة . وإتحاد الطوبة بالعراق إتحاد دسم بسبب عدد الأندية وبسبب عدد اللاعبين العراقيين في دوريات الخليج وهسة بسبب وجود منتخب ناشىء واعد وفي حال صعود المنتخب العراقي في التصنيف العالمي للمنتخبات راح تصير إحتمالية لإحتراف اللاعب العراقي في دوريات أخرى أغلى يعني عمولات أكثر لأن كل عقد إحتراف لازم إتحاد الطوبة يوافق عليه ويوافق على نسبة الإتحاد وشوف شلون أكو مساحة للتسلل خلف دفاعات اللاعب، وبعدين بكل مشاركة لأي منتخب في حالة إنتقاله من دور المجموعات إلى دور سطعش ياخذ دولارات حلوة، وفي حالة الصعود إلى الادوار اللاحقة بكل فوز تصعد قيمة الدولارات، يعني بالمختصر منصب رئيس إتحاد الطوبة منصب مال واحد يطبطب عليه ومو بعيد حتى نقرا أسم عدنان الهزاز مرشح نفسه لمنصب رئيس الطوبة مع تعهد بتقديم خطة للواعيب بعدم سقوط السدارة وأنت تضرب كلة بطوبة سرعتها 120 كيلومتر/ساعة..والله الموفج!
نقابة الصحفيين بكل مكان شغلها متابعة أعضائها وحمايتهم، بس عدنا بالعراق شغل نقابة الصحفيين متابعة أخبار إنتخابات إتحاد الكرة في جدلية لها علاقة بالسؤال الميتافيزيقي العراقي ” شجاب الچلاق عالدولمة ” وتاركة الصحفيين يتمتعون بحرية الصحافة إلى درجة أن مساحة الحرية للصحفي العراقي نطته يكتب بأسم مستعار مو بإسمه الحقيقي وبكيفه يختار يا إسم يريد حتى لو داود اللمبچي أو أبو الطبر ! وما حد من أعضاء نقابة الصحفيين العراقيين كتب بحث أو ورقة عمل عن أسباب إنتشار الكتابة بالأسماء المستعارة عد الصحفيين العراقيين، طبعاً هي حرية، والنقابة ما تريد تتدخل بهاي الحرية ! امممممممموووووداكم أعضاء النقابة نفر نفر وحتى نص نفر وأنتو تشوفون شلون إحترگت الدنيا والجريدة بسبب رسم فيه كل مواصفات رسم پورتريه كاريكاتير صحافي، ومن مصدر قريب فأن الرسام قد أستلم تهديدات مباشرة والنقابة ساكتة من أجل عيون المرجعية ويا ريت لو مرجعية عراقية هم چان بيه مجال. ليش نقابة الصحفيين ما طلعت بيان تدافع عن حرية التعبير علماً أن الرسام إللي رسم اللوحة هو عضو في نقابة الصحفيين العراقيين.
سمعت قبل فترة لقاء وي رئيس إتحاد الكرة (هنا نستخدم الكرة) الياباني في إذاعة بي بي سي، سأله المذيع عن خطة الإتحاد الياباني للكرة، جاوب الرجال بكل تواضع ودقة كمبيوتر: إحنا خطتنا في اليابان هو الفوز بكأس العالم سنة 2054 ! إي والله بلا شقة سنة 2054 رقما وكتابة (ألفين وأربعة وخمسين). يعني الإتحاد الياباني عنده رؤية وخطة عمل لأربعين سنة الجاية، وگال الرجال: إن الكرة في اليابان كانت رياضة ما حد يحبها ولا يريدها وغير معروفة، فأتفقنا وي شركات أفلام الكارتون بإنتاج مسلسلات كارتونية بشخصيات قريبة للأطفال حتى نشجع الاطفال على هاي الرياضة، ويگول: بدينا بهاي ببداية التسعينيات (وحتى تصدگون بكلامه أكيد تتذكرون الكابتن ماجد) حتى صار عدنا هسة منتخب ينافس أقوى المنتخبات العالمية وعنده طريقة لعب مميزة يسموها پلاي ستيشن…إنتهى كلام المسؤول الياباني ! والسؤال الموجه إلى الكابتن مؤيدانو هو : تگدر تخلي خطة عمل لإتحاد الطوبة (هنا نرجع إلى الطوبة) لخمس سنوات الجاية! وراح ننطيك طرح لا تحسب العطل الدينية والعاشوراء وعيد ميلاد السيد وعيد طهور السيد وعيد تسريح السيد العسكري. شوف هسة إحنا طايحين الحظ بالتصنيف العالمي وإذا تگدر خلال خمس سنوات تخلينا عد الترتيب الخمسين عالمياً فتعال إتفضل ورشح نفسك وإذا ما تگدر إحترم نفسك وخليك بمكانك لان راسب حمود شمرنا شمرة كافرة من الترتيب 72 عالمياً وإللي چنا فرحانين بيه إلى الترتيب 113 عالمياً وبعدنا نازلين للوصول إلى چتف بچتف وي منتخب تيمور الشرقية. نريد إتحاد مثل الإتحاد الياباني…إتحاد عنده رؤية للمستقبل مو رؤية للفلوس، إتحاد يعرف شنو خطة عمل وشنو الأهداف ، إتحاد يعرف شلون يخلي إستراتيجية عمل مو إتحاد تشريب باگلاء .
وإلى أن نتأكد راح يجينا هيچ إتحاد راح نظل نتابع ريال مدريد وبرشلونة وإحنا شايلين لافتة رابطة مشجعي نادي الشرطة لأن السيد راضي شنيشل طيح حظ الزوراء ونادي البيشمركة ينافس في دوري أبطال المليشيات المسلحة العالمي، أما نادي عفج فدايخ بقراءة شروط عقد بيع مدربه إلى نادي بايرن ميونيخ بعد طرد گوارديولا بسبب تواضع نتائج بايرن ميونيخ الآخيرة وخسارته المذلة أمام نادي الشنافية في دوري أبطال الدبـــّة !
[email protected]
