أبو نجيبة : صبحّك ألله بالخير أغاتي أبو ضوية….خير أشوفك أليوم مدولغ
أبو ضوية : بس مدولغ ….بس مانايم …..أكَولّك حلم ولا صاير
أبو نجيبة : خير أبو ضوية….شحلمت …أي وألله هاي عيونك غادية دم ……هماتين ألقرحة
أبو ضوية: لا وألله ياأخوي ….كَول أني حطيت رأسي عالمخدة …وجان أشوفلك أوادم لا ألهم أول ولا تالي ….واكفين سرا بشارع ألرشيد
أبو نجيبة : رجعنا على أيام ألسرا ….شنو ديوزعون بيض …لو تايرات
أبو ضوية : لا ياأخوي …أوادم شكران حمران ….عيونهم زرك …..كَول وكَفت وسألت واحد منهم ….هم زين طلع يعرف يحجي عربي
أبو نجيبة : شكر وحمر …..يعني مو جماعتنا
أبو ضوية : لا ياجماعتنا ….أشو هما كلهم جلحان وملحان ….وألله كَول سألته ….طلع شلون رجال محترم …..جان مدير بنك كَبل …..واكف وشايل قروانة …كاعد يوزعولهم أكل ….ويذب كل دمعة هالكَبر …..كَال أحنا لاجئين أمريكان …يرضاها ضميرك …يقبلها ناموسك…..أجينا دخيل ….وطلبنا لجوء بالعراق …..هاي عدا ألناس أللي تطشرت بدول ألعالم …ويكَول كندا أم خشم أليابس وألمكسيك أم ربع نعال …..هاجمين عليهم غفل …ومحتلين أمريكا .. وألنخسة كلها من ورا كوبا ….كومة حجار ولا هالجار..وألناس هجت بليلة سودة…..كل عشرة بعباية
أبو نجيبة : لا أله ألا ألله ….صدك جذب ….أمريكا ….أكو أحد يكدر يحتلها ولو عدنا مثل كوبا …تدلغ وتظم رأسها ….. وبعدين
أبو ضوية : ويكَول هسة صفينا لاجئين بالعراق ….وراح ألاكو وألماكو ….وساكنين بخيم يم ألكمالية ….وعلى ساعة يهججوهم …..وشهاديهم مامعترف بيها ….ولازم يمتحنوهم بالعربي يلا يكدرون يأخذون لجوء ….وأللي ماحافظ ألمعلقات مال أمرؤ ألقيس وربعه …..لو مقامات ألحريري ….يسمطون أبو أبوه ….وتنام عليه طابوكَة
أبو نجيبة : صدك دتحجي …..هذا غير حلم
أبو ضوية : هاي عدا ألمذلة بكل مكان ….واكفين سرا على ألسفارات ويطردوهم ….على أنتو أمريكان ماننطيكم فيزا……ويخافون يرحلوهم …حرب أهلية كشرة عالكة بأمريكا ….بين ألسود وألبيض …وألكواتم وألمفخخات صايرة بفلس ….كلها جايتهم من كوبا….ألكهرباء تجيهم ٣ دقايق باليوم …بس حتى لاينسوها ….وألحواسم ألسود…ديشتغلون شغل يعجبك
أبو نجيبة : بس ألله راحمهم ياأخوي …ماعدهم مرجعيات…زين جيشهم وين صار ….ترا جيش عرمرم
أبو ضوية : ألمكسيكين صفوهم بقوائم تجيهم من كوبا …وطكه طكه …ثار قديم ….كوبا طلعت ولا ألبدوي …مانست ثارها ويا ألامريكان ….والرووس ألجبيرة سجنوهم على أتباع ألنظام ألسابق
أبو نجيبة : زين هذا رامسفيلد منبوش ألصفحة …أشوف بي يوم…وين صفى
أبو ضوية : تخاف عليه ….واوي عتيك هذا ….كاعد بالمخيم بالكمالية ولابس كشيدة وسبعة ألاف محبس ويعقد زواج متعة للمخيم …..كرف فلوس….ويكول أللي أحصله بيوم يعادل راتب مال شهر من جنت وزير دفاع أمريكي
أبو نجيبة : زين وبوش مسٌود ألوجه ….حوبة ألعراق بعلباته
أبو ضوية : ديبيع جزادين …..وسبح بوسط ألبلد بعمان ….بناته جانوا مخطوفات ….وماهدوهم ألا بجم دفتر ….ومرته طك عليها ألبريمز
أبو نجيبة : لا أله ألا ألله ……..وزين هاي مرة كلنتون …..أللي بكل عزا لطامة …..حاط رأسها براس ألرياجيل ….وين صارت
أبو ضوية : عاصية بروسيا …..ضحكوا عليها ألقجغجية على أندزج من روسيا ببلم للعراق ….وباكوا فلوسها ….وجاي تشتغل بمعمل مال صوندات
أبو نجيبة : رحمة لاأبوك …وهذا مهجومهم ….ألبيت ألابيض شصار منه
أبو ضوية : هاي خليها على ألكنديين….كالوا أحنا حركناه كبل مية سنة …واليوم هماتين نحركه ….سوولك أياه فحم ….طلعوا نشامى وسباع ولد سباع بحظي بختي
أبو نجيبة : هاي شلون مصيبة وهاي مالت ألفضاء…. بناية شكبر ….صواريخ ومركبات ومكوك صاعد ومكوك نازل
أبو ضوية : ألمكسيكين وداعت عينهم عاد…بنص ساعة فكوها كلها وباعوها خردة لكوبا….وكالو للامريكان نكسر رجلكم أذا صعدتوا للفضاء مرة لخ …ملاعين ألوالدين …شثبرتونا يومية عجاجة بالجول مطيرين مركبة …مو عميتونا عمي ومحد مفتهم شي
أبو نجيبة : وهذا أبو بسطال ….بريمر ….شسوه شلعب لعب …بشرني وين صفى
أبو ضوية : عنده سكلة ركي على ألشط ….راح ديخطب بنت فخرية أم ألجبن ….لحكته بالنعالات وكالت اني انطيك بنتي ..مو كافي أخذت فلوسنا وأخذتلك عراقية كبل وشردت وياك …نعال بنتي يشّرفك يامكطم
أبو نجيبة : رحمة لا أبوك ….وهذا أوباما …وين صفى بهالهوسة
أبو ضوية : يكولون يفترون بي عالدول …منين أصله ….محد يعرف …هاواي تكول لااعرفه ولاهم يحزنون ….كينيا ….تكول اعوذ بالله منين النا هالشكولات
أبو نجيبة : وهاي ألسودة تقدم برامج …..يكولك ملكيتها بالملايين عندك علومها
أبو ضوية : ياهية …..بالله أني بحال مذيعات هسة
أبو نجيبة : بلي ….هاي أوبرا ماأدري شسمها ….وين صارت
أبو ضوية : لكَيتها … صايرة حفافة.. ونسوان ألكمالية كلهم عليها….ودازة خبر بيد حمدية أم ألروبة ….تكول بلكت أبو ضوية يتزوجني حتى أكدر أخذ أقامة
أبو نجيبة : أضرب بيها راح تجيك ملايين بالهوا …والله حظوظ …ماجان دزيتها على أخيّك
أبو ضوية : هاي سوالفك …بشبر ماي تغرك ….يافلوس ….طلعت مستلفتهم من البنك …الرجال مدير البنك كالي اللي شفته اول مرة
أبو نجيبة : يعني حلم ولا صاير …..وألله ألعظيم
أبو ضوية : أكَولك ياأخوي …..ممرود مرد من ألبارحة لليوم ….شنو تفسيره رحمة لاأبوك
أبو نجيبة : تفسيره ….أتغطى زين من تنام ….وكَيلك ألله …أللي صار وجرى برأس ألعراقيين ….فلا يجرى على غيرهم ….أودعناكم ….أني رايح ….شلون ضيّع عليه نص ألنهار
