الكل يتذكر جهاز (كشف المتفجرات) إللي أشرف عليها وجابها من بريطانيا ضابط دعوچي ما أتذكر رتبته لان هو كل أسبوعين برتبة، هذا الضابط چان بوكته الناطق الرسمي باسم عمليات بغداد، الشي الوحيد بهذا الضابط هو وجه الحليق بكفاءة عالية وهي الكفاءة الوحيدة عد هذا الضابط الصاروخي. هذا الجهاز إللي گلنا عنه أنه جهاز كشف الطرشي وطلع صاحبنا الضابط على التلفزيون زعلان من هاي التسمية…گلناها قبل إنكشاف فضيحة هاي الأجهزة إللي طلعت ما تكشف حتى عن الطرشي ونوعيه الخل…خل العنب لو التفاح لو خل الدبس.
ونتذكر هذا الضابط وپوزاته الإعلامية بعد كل تفجير إرهابي وعبالك المنصب مالته بس يطلع بعد خراب البصرة …بذيچ الحالة هو يستحق منصب الناعق الرسمي وليس الناطق الرسمي لأن چان يطلع عالتلفزيون يلمع بكل أبهة والامهات يدفنن أبنائهن بكل حزن. هذا الضابط إللي من چان يطلع ويقرا بيان نتصور أن هو ضابط حماية في حلبة سباقات موناكو…ما يسمع شكو جاي يصير في شوارع بغداد…يا إما ما عنده كهرباء ويتابع أخبار العراقية – وهاي فرضية خاطئة لأن هو من أبناء الحظوة والمحظيات – أو ما يريد يحچي الصدگ وهو ميزة هذا الضابط اللغوچي والدعدوچي إللي چان بسنة 2005 برتبة نقيب قبل صعوده على صاروخ التوصيات والمحاصصة بحيث صرنا ما نلحگ بيه…يوم عقيد…ويوم لواء وهسة فريق.
وخلي نراجع شريط أحداث الإنفجارات إللي صارت ببغداد بوكت ما چان هو الناطق الرسمي لعمليات بغداد وفي وكت من الاوقات هو (القائد) الفعلي ..ونشوف شنو إنجاز هذا الضابط…ونحسب عدد ضحايا التفجيرات الإرهابية إللي ذبحت بغداد وشوارع بغداد من چان هذا لازم ملفها الامني ، راح نشوف ألاف الچلمات والتطمينات، وخلي نشوف مقابلاته قبل وصول وأثناء مفاوضات شراء أجهزة (كشف المتفجرات) …شلون يعدد مزايا هذا الجهاز إللي لو أكو مفخخة على المريخ يگدر يكشفها وماكو داعي ندز كيورسي إلى المريخ بمليارات الدولارات حتى نسوي مسح على المريخ نشوف أكو مفخخة لو لا. وجيبولي حادثة بيها أي إرهابي چان شايل متفجرات وكمشه شرطي عراقي بشارع ببغداد بعد ما كشفه بجهاز (كشف المتفجرات)…أتحدى أكو أي حالة توثيقية لهاي الحالة…بس آني أگدر – وأقسم على ذلك – أن اجيبلكم حادثتين كشفهم الجهاز…مرة كشفَ الجهاز كيس طرشي  …ومرة حشوة أسنان..وأحتفظ بمكان الحادثتين واسماء الأشخاص ..بس أگوللكم إن صاحب حشوة الأسنان هو آني…بس مو ناسفة إلا امام جهاز (كشف المتفجرات).
ولأن هذا الضابط دعوچي..فما شفنا ولا سمعنا عن تحقيق في بنود عقد شراء هاي الاجهزة اللي بنفس الوقت بريطانيا عاقبت الجهات إللي باعت هاي الاجهزة للعراق…يعني الانگليز خجلوا من نفسهم وإحنا وجه التنك…ولا عرگت الگصة. ومن حق أي أم فقدت أبنها أن ترفع قضية القتل العمد على هذا الضابط والفريق الفني إللي راح وشاف الأجهزة قبل الموافقة على مواصفاتها…هذولة كلهم مجرمين مع سبق الإضرار (نعم من الضرر) والتربح (من الربح) إللي أخذوه من تجار هذه الأجهزة.
ولأن إحنا بالعراق المتعدد الولاءات والعمائم والفولتيات والتيارات نحترم الفشل وما نجرح مشاعر الفاشل حتى لو الفشل مالته نتج ألاف القتلى ، فهذا الضابط الصاروخي لغى 18 سنة ترقية بحسب الرتب العسكرية وصار فريق وهو إللي چان نقيب في 2005 لعد كل شي ما سوينا وإحنا رحنا لتلفات الدنيا حتى نستورد ناس يجون يغيرون الحكم.. شنو فرق عن ذاك اللي چان يوزع رتب عسكرية بالصواني عبالك قوزي على التمن !! شنو فرق هذا الضابط الصاروخي عن العريف حسين كامل الخازوقي او الفريق عبد حمود او الفريق الصومالي! تعالوا نحسب ونشوف شلون النقيب 2005 يصير فريق 2012! حتى مونتگمري من كسر قوة الألمان ورومل ما أستحق هالترقية ولا ماك أرثر من جبر اليابان تستسلم ما شاف هيچ دلال ! بس لأن العراقيين يحبون الطرشي ويعتزون باللي يحب الطرشي ويجيب إلهم أجهزة تكشف عن أجود أنواع الطرشي والخل، فكرموا الرجل إللي جابلهم جهاز كشف الطرشي والخل وصار فريق بحاله…هو الگولچي والدفاع والهجوم والإحتياط والمدرب..صار رئيس جهاز المخابرات..وأولى علامات نجاحه وصلت وي تفجيرات بالدرزن وقتلى شلع.
من جهاز كشف الطرشي إلى جهاز المخابرات طفر هذا الضابط 18 سنة، شافوه يفتهم بالأجهزة…والمخابرات ترى مثل الطرشي…الطرشي أشوية خيار على شلغم على قرنابيط على بيتنجان على ثوم عجم..العفو ثوم إيراني…على أشوية بهارات…والمخابرات أشوية خبر وأشوية سيناريو وأشوية دراما مثل رأفت الهجان وأشوية خبط وكبسة وتنگة وسطلة تماما مثل الطرشي…هذا الجهاز من ذاك الجهاز…وإللي گدر يفتهم بمواصفات الاول أكيد يگدر يعرف أسرار الجهاز الثاني.
وإحنا الرئاسة لازم وياها فضيحة وفشل …سوينا واحد رئيس بعد فضيحة مذبحة الباشتاتان…لأن يستاهل ما دام عنده فضيحة لازم يصير رئيس…وسوينا واحد رئيس وزراء لأن فاشل..سبع سنوات وأبو المولدة هو إللي يتحكم بينا..سبع سنوات ويطلع بيان إن وزارة الكهرباء هو سبب ضعف الصناعة بالعراق..غير إكتشاف خطير…لعد بلاها من هاي الوزارة إللي تسبب فشل لجهة حيوية بالإقتصاد…بس إحنا نبقي وزير الكهرباء ووزارة الكهرباء لأن خوش شماعة وحايط نصيص كلما تصير عدنا هوسة فشل نروح ونگول وزارة الكهرباء…أعتقد حتى الخلافات الزوجية سببها وزارة الكهرباء لأن من تطفى الكهرباء بعد المغرب ماكو شي يريح أبو الجهال لو يگضي الوكت غير ذيچ الشغلة، فالنوب يگوم يلح على أم الجهال…وتصعد المشاكل خاصة إذا ابو الجهال ما يغير الطريقة والأسلوب راح تصير مثل كتاب مكرر أو مثل مقالات العربنجي إللي صارت مملة ومكررة …صح لأن العربنجي يكتب عن المشاكل والمشاكل هي هي نفسها من تسع سنوات و لا تغيير…فاكيد المقالات عبالكم مكررة…. هاي كلها بسبب وزارة الكهرباء.
النوب…ننتظر تكريم وزير الكهرباء لأن هو الفاشل الأكبر بالعراق ويستحق تكريم اكبر من تكريم الضابط الصاروخي…بس لا يطلع وزير الكهرباء يحب العمبة الهندية وما يحب الطرشي…ترى صدگ  مشكلة.
[email protected]