لا بروح جدك أخذلنا .. فدوه لعيون سراوي أخذلنا .. شعب طايح حظه ويطلب منك أن تخذلنا .. الله ينصرك علينا وعلى أمة محمد أخذلنا .. بروح خالك أبو سراوي أخذلنا بعد .. أحنا شعب يموت على الخذلان .. شتريد بعد .. تسع سنين وأنت معيشنا على الخذلان .. خليت الارهاب يدش بالوطن حتى تخذل ناسه .. وصار الشعب ربعه مهجول بالخيام وبالهياكل , وما ظلت , لا كرامة ولا رفعة راس , وحسره عليه منحه سخيفه لو بطانيه عفنه .. أنت خذلت الشيعة قبل السنة .. ودمرت الولاء والانتماء , وزرعت الطائفية بكل حقدك علينا .. صرت المدافع والمحامي للسارقين والعصابات الاجرامية .. فرغت قاصة العراق المليانه بجيوبك , حتى تخذل هذا الشعب أكثر .. ضحكت على الناس الطيبة بسندات العار والخذلان .. ألاف من الابرياء والبريئات , خليتهم بسجونك السرية .. عطاله بطاله صفت الوادم , وأصحاب الشهادات الحقيقية كاعدة بالكهاوي .. وأمراض رهيبه وخطيرة , تغزو العراقيين .. ميليشيات سيبندية تتجول بالعاصمة , بس السيطرات وجدت حتى تذل المواطن ..
لا أبو سراوي , أحنا نريد منك أن تخذلنا بعد وبعد .. عليك العباس أبو راس الحار , شبعنا خذلان ..لان ما ظل بعد بينا عراقي , يوكف ويلجمك عند حدك .. ويكولون ( المؤمن لا يلدغ من جحر مرتين ) .. دخلي تصير أنتخابات هسه , أني أول واحد أروح أنتخبك .. تعرف ليش , لان جلدنا تعلم على الصكعات .. وأنت السياسي الوحيد , اللي تعرف شلون تخذل هذا الشعب .. وأنت ما خليت مكسوره تعتب عليك , يا حجي .. ولك والله لو تسوى العتب , جا عاتبيتك ..