أريد اشكي حالي وهمومي، گلت خلي أكتب عريضة عرضها شبرين، وتذكرت العرضحالچي عباس إللي كان مراقب عمال في البلدية ومن طلع تقاعد جاب ميز وكرسي وشمسية من البيت وگعد بباب البلدية يكتب عرايض للناس لأن يعرف دالغات المدراء بالبلدية بحسب الدعاية إللي چانت زوجته أم صلاح تسويها بكل گعدة وين نسوان محلتنا !
أكتب عريضة بس إلمن ؟؟ العريضة لازم تصير معنونة إلى صماخ چبير يفهم المكتوب، خليني أكتب للرئيس…بس هو وينه ؟ أكو أخبار متسربة من قيادة إدارة عمليات جهنم تگول لاگين وثيقة سرية تؤكد دخول مام إلى عضوية نادي جهنم – درجة كردي كلاس، بس ما شفنا هاي الوثيقة إحتراماً لخصوصيات الست الخاتونة إللي تريد تطمن على سرية ممارسة الرئيس للتمارين الرياضية في نادي جهنم وخاصة أن هو موديل مرغوب للصور الفوتوغرافية والكاريكاتورية والصور إللي تنوضع في غرف النوم لزيادة الفعالية !
أكتب عريضة إلمن؟؟ لأعضاء مجلس النواب؟. مو هذولة كل يوم طالعين يشتموني، مرة دايح ومرة بائس ومرة ساقط، صح ساقط لأن ما درست مادة الخيانة مثلكم وما نجحت،  ساقط وأفتخر بسقوطي لأن ما زورت شهادة ولا جبت شهادة دكتوراه في صناعة النعل من جامعة رأس الرجاء الصالح للعلوم الزراعية في الطب البشري إختصاص المجاري والبالوعات المتنگة لزيادة إنتاج الدواجن…مو هيچ شهاداتكم زرق ورق ؟؟؟ مو تتذكرون قائمة شهادات فرج الحيدري؟؟ صدگ هو وين صار…اكيد هو اللاخ إلتحق بنادي المليار حاله حال فلاح السوداني وحازم الشعلان وأيهم السامرائي وغازي الياور وقاسم عطا والغرباوي وكل الشلة إللي الله راضي عنهم…المهم رضا الله مو رضا الشعب، والله من يرضى عن واحد يسويه مسؤول – مدير عام وفوگ بالعراق، سنة وسنتين ويقدم إستمارة عضوية إلى نادي المليار مع مرتبة الشرف..لأن هذولة حتى الشرف يشتروه بفلوس!
أكتب عريضة إلمن ؟؟ لمجلس المحافظة؟؟ هم وينهم وشلون أوصل إلهم؟؟ أشو كل واحد ساد الدربونة مالته بحاجز كونكريتي متأثراً بسور الصين العظيم، وساكن في حافات المياه واحد ينراد له بخت مال لين تشنغ حتى يوصلهم بدون ما تعضه چلاب الحماية مالته إللي واحدهم عبالك عاض الذيب إللي قشمر  بيبية ليلى في الملحمة الأسطورية ليلى والذئب. لو أروح إلهم لمبنى المحافظة؟؟  شكو بيه مو فلان الفلاني يجيب إبنه إللي بالإبتدائية ويگعد بمكتب رئيس مجلس المحافظة ، كلب الأمير أمير…. يا ناس…حتى واحد يصير چلب ينراد له بخت في بلد صار عيشة چلاب ! وليش تتعجبون…اكو جراح مشهور (ما اجيب أسمه حتى لا تصير دعاية) يدخل أبنه إللي بالمتوسطة وياه لغرفة العمليات في مستشفى حكومي !! ويگول هذا أحسن تدريب وببلاش، لان يريد يصير طبيب !! ومن يموت المريض…قضاء وقدر كل من يموت بيومه !
أكتب عريضة إلمن ؟؟ لرئيس الوزراء؟؟ هذا إذا واحد ضحك عليه وجاب محطات كهرباء غازية وگال له روح بفالك ابو إسراء راح تنحل مشكلة الكهرباء وهو صدّگ بهذا الكلاوچي ودايخ بالورطة فشلون راح يگدر يسمعني!! هذا راسه صاير إستاندارد لتجربة كل موديلات وأحجام الكلاو الموجودة في السوگ، وهو متونس لأن هو أكبر مروّج للكلاو من كافة المناشىء المحلية والأقليمية. إذا رئيس الوزراء نفسه تلعب من مشاكلنا وكل ما يطلع بالتلفزيون أحس عنده جالي وگالب چهرته لعد  شلون راح يسمع مشاكلي لو يقرا عريضتي؟  خلي هو حاير وطامس بالمشكلة السورية ويريد ياخذ جائزة نوبل بالسلام..سلام عليكم أبو إسراء من رخصتك…طييييييييييييييييييييييط !
أكتب عريضة إلمن؟؟ للدوريتين مها وعتاب ؟؟؟ لو حيدر الملا حاله حال الملايات بالفواتح…بس يعدد حتى الآخرين يلطمون !!
أكتب عريضة إلمن؟؟ لمقتدى؟؟؟ هذا باتمان الحوزة وحاير هسة بتوقيع عقود إستخدام صوره في پوسترات الجزء السادس من سلسلة أفلام باتمان…وحاير شلون يستثمر الخبرة البلاي ستيشينية في إدارة الأزمة العراقية وخاصة بعد نجاح منتخب اليابان في تطبيق خطط الپلاي ستيشن في تطوير منتخب كرة الطوبة اليابانية، يعني مو غلط واحد كل خبرته في پلاي ستيشن ويصير قائد الجمع المؤمن..حبيبي لايگ عليك !
أكتب عريضة إلمن ؟؟ إلى جلالة الله ؟؟ لا الله  ما يحتاج عريضة دا يشوف إللي بينا ويبارك السرقة والبوگ وما يريد يتورط ويانا وداير وجهه عنا نحو النمسا وموناكو ومهرجان ريو دي جانيرو، شله شغلة بوساختنا، هو يريد الصافي، احسه دا يباوع ويگول هذا رزقكم، وهذا المقسوم إلكم، دبروا حالكم !! هذا هو الفلسفة الحالية في إدارة العراق عد الله ، وبعدين العراق أكبر قاعة تدريب عد رب العالمين لتدريب الملائكة والشياطين وملك الموت على أفضل الممارسات العملية وإدامة الصراع بين الخير والشر، يعني ما أعتقد من مصلحة الله ان يحل المشكلة العراقية، وبعدين وين يتدربون الملائكة المبتدئون والشياطين المبتدئون وفريق الإعدامات بقيادة المرعب عزرائيل حفظه الله ورعاه  !
أكتب عريضة إلمن؟؟ لماما وبابا؟؟؟ لو أم الجهال؟؟ ماما منزلة الكبنك الأسود ومطفية من يوم الإنفجار بالسوگ إللي راحت فيها أختها إللي چانت وياها، وهي إنصابت برجلها ومن يومها گامت تعرج وبابا صار يعصب هواية  وخاصة من يطلع من غرفة النوم ويدخن عبالك چولة ما مبدلين الفتايل ويدردم ويشتم الإرهاب وحظ الخرة ! أي بابا بعده بحيله ويضحك عليّ من يشوفني أطلع من غرفتي تعبان وأجر نفسي جر.. وهذا السبب همين ما أريد أكتب عريضتي لأم الجهال..لأن الدنيا اخذ وعطا…تماما مثل ما أخذ قاسم عطا.
أووووووووووووف…حيرة
أكتب عريضة لنفسي ؟؟ ليش آني بحال نفسي؟ ! آني كلش مشغول وي بيت حجي لفتة، لأن لفتة يريد يصير بالپرلمان الجاي وبعده ما مقرر وي يا حزب يدخل، وبعده ما يعرف هو إسلامي معمم لو شيوعي لو ليبرالي لو من أنصار ضرب المرأة لو ضد العنف الأسري وختان المرأة لو عضو في منظمة نزع الجواريب والألغام ! وخاصة هو عنده تاريخ نضالي متميز لأن  كان عضو في إتحاد نساء العراق – فرع راس شارعنا بدرجة چايچي مع قدم ستة أشهر لأن كان يغسل الإستكاين بالتايد  !
يللا…كل مَن عرضحالچي نفسه.. كتبوا عرايضكم…وشربوها بدال چاي ليبتون !
[email protected]