بأسم الوطن الهالك المهلك
الدولة تعني الهيبة بس عدنا أكو جماعة يريدون الدولة هيتة، الدولة تعني قيادة، وعدنا يريدون تبقى دولة مريضة بلا عيادة، الدولة تعني عَلم، وعدنا يريدون الدولة عَدم. الدولة هي قرار مو فرار وإنكسار مثل الجرة، بعد ماكو چارة تتعدل.
الدولة ما تقبل رفسة بغل منتول بتيار جنون الوهم ، بغل منفوخة البطن بسبب إدمانه على أكل الهوا، بغل راح يمنة ويسرة بلكن يلگي واحد يسوي له چارة ويگوم يخلّف، بس كل عيادات فطاحل البيطرة السياسية ما گدرت تلگي دوا يفعّل خصية البغل ويخلي يخلف بُغيلات للمستقبل المبغل إللي ما موجود إلا في أحلام البغال.
والعربنجي – أي عربنجي مو حبيب العربنجي – يفهم الوطن ومدن الوطن وشوارعه وناسه وعاداته واحلامه أحسن من أي بغبغان أو لبلبان متريگ لسان عصفور وبالع راديو تك موجة، يحترگ الراديو وماكو غير نفس الموجة، نفس اللغة ونفس المذيع ونفس نشرة الأخبار وجهة البث. العربنجيون إبناء هاي الگاع، ناموا بشوارعها، وسمعوا آهات أهلها وهمسات بناتها، وشالوا أحلام شبابها من شارع لشارع، ولهالسبب، نريد هسة (عربنجيون من أجل الوطن) حتى نشيل هاي الگاع من الخياسة إللي سببتها السياسة، نريدها گاع نظيفة مو گاع يستلمها بغل گعد وي خنزير عنده أنفلونزا، وقد حضر الإجتماع دجاجة همين منفلونزة من تحارش بيها الخنزير المنفلونز وأغتصبها، وجابت بيضة فاسدة تدهدرت من فوگ ميز الإجتماع  وطلع منها خنزير مدجج بشعارات بغلية، يهدد، ينفعل، وبالآخير، بووووووووووووووووف، بوخة.
وهسة تماما إجى وكت الحساب، لأن الگاع صارت ما تنداس من الخياسة مو بسبب العباس ( لا لا لا والله والعباس…يوگع زلم فوگ الزلم هاي الگاع ما تنداس والعباس) لأن الگاع إنداست بنعلان من كل ماركة عدا نعل عراقي بسبب عدم جودة المنتوج العراقي وقدرته على منافسة النعلان الجاية من برة .
في (عربنجيون من أجل الوطن) نتعربج من أجل الوطن، ماكو لا صاية ولا عمامة، لا لحية ولا چفچير، لا ركضة طويريج ولا ريوگ عويريج، لا ناموس عشيرة ولا فزعة قبيلة، كلنا نفزع للوطن، كلنا نشيل ناموس الوطن، نروح نتفرج على رفسة البغل الآخيرة، نصور نوثق، نكتب اللحظات الآخيرة لأحلام البغال.
نبدا مقالاتنا (باسم الوطن الهالك المهلك)، ونختمها بهوسة عراقية، لا شرقية ولا غربية، تشوفوها بنهاية هاي المقالة.
بس دخيلكم، خلوها هالمرة غسل وتشحيم بعد ما ننزل المحرك، حتى ما نرجع خايبين ونردد
شلون تگول مجفت وأنت مبدل بس رنگات
شلون تگول مجفت وأنت مبدل بس رنگات
ويا أهلاً بمعارك البغال، إللي تجي بعد عرس الواوية.
والختمة هي:
أسمع صوت إستكاين…چا وين الچاي.
[email protected]