بوگ بلا حدود، كلاوات بلا حدود، رشاوى بلا حدود، تزوير بلا حدود، زبالة بلا حدود، طسات بلا حدود، كهرباء ماكو بلا حدود، أمراض بلا حدود، إحباط بلا حدود، كآبة بلا حدود، دولة بلا حدود.
شعارات بلا حدود، وعود بلا حدود، أحزاب بلا حدود أخلاقية أو دستورية، لأن هو دستور بلا حدود توگــّف الواحد عد حده، سجناء بلا حدود، إعدامات بلا حدود، تفجيرات بلا حدود، لعنات بلا حدود، تفلات بلا حدود.
خطط بلا حدود، كذب بلا حدود، نفخ بلا حدود، خطوط حمراء بلا حدود، مناطق متنازع عليها بلا حدود، بيع الگرگري بلا حدود، دكاترة حواسم بلا حدود، عمائم بلا حدود، تمائم بلا حدود، شتائم بلا حدود، خرافات ودجل بلا حدود.
لاجئون بلا حدود، ضائعون بلا حدود، منسيون بلا حدود، مهمشون بلا حدود، مسحوقون بلا حدود، فقراء بلا حدود، شهداء بلا حدود، قبور بلا حدود، حروب بلا حدود، أعداء بلا حدود، أحقاد بلا حدود، طوائف بلا حدود، ولاءات غير وطنية بلا حدود، أحلام بلا حدود ، كوابيس بلا حدود، هلوسات بلا حدود.
أمية بلا حدود، إختطاف بلا حدود، تجارة بنات بلا حدود، گوادة بلا حدود، دعارة بلا حدود، عهر بلا حدود، بيع الكلى بلا حدود، بيع أطفال بلا حدود، تجارة سلاح بلا حدود، تجارة مخدرات بلا حدود، تهيئات بلا حدود، مؤامرات بلا حدود.
إحنا بلا حدود..هاي شغلة منتهين منها وشبعانين ومتريعين، ولأن بلا حدود لازم ماكو عدنا لحية مسرحة ولا أكو عمامة أو طربوش او عباية عليها حشمة. وإللي بلا حدود يشوف كل الناس بنفس العين، لا اكو صور لازم نلبس وياها عدسات حتى نشوف زاوية أكبر من زاوية، ولا عدنا صور نستخدم وياها فلاتر حتى ما نشوف ألوان ما تعجبنا وتلعب نفسنا، إللي ما عنده حدود يشوف كل الصور بنفس الحجم، أصلاً صورنا بلا چرچوبة..صورنا بلا حدود.
وآني واحد من هذولة (إحنا بلا حدود)..عربنجي بلا حدود، لغتي بلا حدود، لغة تكسر وتجمع مثل ما أريد ما دام توصل المعنى بلا حدود، شتائم العربنجي بلا حدود ما دام عيني وآغاتي ما يفيد وي (كائنات) ما أنزل الله بها من سلطان إلا سلطاناً على رقاب العراقيين. أكتب بلا حدود، وما أدير بال من أسمع نباح قرب حافر زمال عربانتي، لان ياما مشيت بدروب مظلمة بلا حدود والكلاب تنبح بلا حدود ، وإللي يخاف من كلب ينبح ترى أبد ما يوصل، وبعدين مو كل كلب يستاهل حجر حتى يسكت.
كل شي صرنا وجربنا، من بغددة إلى طربگة، من فوگ الفوگ إلى تحت النعل القذر، ومن أقصى اليمين إلى أقصى اليسار، من أقصى الإيمان إلى أقصى الإلحاد، من أقصى الطهارة إلى منتهى القذارة، والنتيجة چانت منتهى الضياع…ضياع بلا حدود ، فوضى بلا حدود، وما ظل غير نصير عربنجيون بلا حدود، فمثل ما يگولون..يضع سره في عربنجي خلقه. إللي يريد يجي ويصعد ويانا بعربانتنا نگول له نجوت ورب العربنجية، وإللي يظل يباوع علينا يقدم رجل ويؤخر رجل نگول له خيرها بغيرها، وإللي ما يعجبه فكرنا ولا لغتنا نگول تحياتنا للديمقراطية وسلم لي على خالتك، نحترم رأيك ونطلب التعامل بالمثل بحسب اللغة العربنجية، وإذا تشوف لغتنا خايسة تگدر تسد شبابيك بيتك وتعلگ بخور …لكم مبادئكم الكشخة ولنا طريقنا…وإسمنا…عربنجيون بلا حدود.
[email protected]
