مولانا انتم متوهمين ما كو فساد بالعراق جيبلي دليل انطيني دليل
وداعتك ولا واحد فاسد وحتى لو جبلتللي دليل اكللك مزور وافتراء كذب
اتحداك اتجيب دليل والكلام عن الفساد صراع سياسي انتخابي بس وداعتك
انتم متو همين
زين والوضع الاقتصادي المنهار شنو
حبيبي هذا العالم كله انهار اقتصاديا واحنا بلد نفطي وأسعار النفط انهارت طبعا يتدهور الوضع
زين وهاي الرفاهية المفاجئة للزعماء والقادة والمسؤولين مو جانو فقر
اغاتي انت  أولادنا هذا ورث اللي خلفهم جانو ضاميه على صدام (تهرب ضريبي) ثم ثانية همه مو عراقيين كول لا
عراقيين طبعا
زين مو العراق لكل العراقيين يعني العراقي الله كل العراق همه اخذوا حقهم انت ما اخذوته مشكلتكم  انتو ماتفتهمون
لا هاي هيه هم كول ما اركو إرهاب ولا طائفية
لك  بابا وين اكو طائفية كل ما في الامر ان الوضع الاقتصادي للاتحاد الأوربي وبورصة وول ستريت اثرت على العراق لهذا اتصوف مخصصات وميزانية المحافظات اتدهورت فالناس طالبت ان الأولوية للمحافظة في التعيين وفي الموارد هذا كل ما في الامر يعني ناس صدك مهمشة.
زين  والإرهاب
لك بابا وين اكو إرهاب
انت مخبل لعد هاي التفجيرات شنو
بابا الانتحاري رجل فاشل في الحب فقرر ينتحر علنا امام الناس ما سامع ومن الحب ما قتل
زين الناس شنو ذنبها
صوج الناس غير تسال انت انتحاري لولا حتى توخر من يمه
زين والسيارات المفخخة
هاي تماس كهربائي وحرارة صيف لان الكهربئيات من الصين الشعبية
زين والعبوات الناسفة
هاي من طائرات الرايخ الثالث القيت على العراق 1941 في حركة مايس واندفت بالكاع والناس تبحث عن الاثار والإنقاذ حتى تبيعها بمريدي وتتفجر بسبب من سوء التخزين والاستعمال.
زين والاسواق التجارية والمحلات من تتفجر
هاي مس كهربائي وسوء تخزين وحرارة جو وعدم الالتزام بتعليمات الدفاع المدني
مولانا انت تشتغل
انا معمم
بارك الله بيك يعني عتوي
احترم نفسك ما اسمح لك
اني مو عظام ولا لكام
لا قصدي مثل العتوي أبو درب
كلما تشمرى ليفوق
من يوكع يوكف على رجلييه.
مقبولة منك بس اتحداك انت تثبت لي اكو فساد او خلل امني بالدولة
لا يابه وين اكو  احنا اللي تاهمين بختنه
اتحداك جيب دليل على فساد او عمالة قادة الدولة
واللي ما تعجبه الدولة خللي يطلع منها
جملة وتفصيلا
واتحدى ان يستقل محافظ او نائب برلماني او مدير عام
لانه ناس تحدم الشعب
والاقتصادية مال التيارات والأحزاب ناس تخاف الله فلس احمر ما يدخل بجيبها
كلها للفقراء والايتام والارامل
حتى الواحد صاير يتمنى يصير يتيم
والوحدة تتمنى تصير ارملة
هههههههههههههههههههههههههههههههههههه
لا خوية اني العميل واني الفاسد
ولعنة الله اللي صدك بيكم
حامييها حراميها
وطنيها عميل فاسد
هههههههههههههههههههههههههههههههههه