سمعت من جدتي أم أمي أن ابن عمها الشيخ حسون قد طلب فزعة عشيرته لأبن اخوه , كونه قد رشح للأنتخابات هذه المرة ولكون الشيخ حسون ربنا يطول النة بعمره خوش زلمة لازم نفزع لأبن أخوه هاي المرة وننطيه أصواتنا , مهما يكون , لأن ابن اخو شيخ حسون اذا فزعنالة هاي المرة راح ما ينسانة من يصعد , يعني حتى لو بس الصيت ( ابني يعني بس تكول كرابة أمي بالبرلمان كافي هاي الجلمة راح تسويلك مكانة بين ربعك واصدقائك بالدوام وبالدربونة  ) طبعاً هذا كلام جدتي , ومن رحت للتعلولة بربعة شيخ فرحان اليوم بالليل لكيت ولد عمي كلهم ملتمين ومسوين مؤتمر انتخابي جبير ويدعمون ابن عمنة من رابع ظهر مزهر المحامي الي مرشح هالسنة للبرلمان , ورايد الفزعة والمونة من عمامة وأهلة ولازم يفوز بأصوات عشيرتة وكرايبة واصدقاء كرايبة هو صدك جذاب وموخوش ادمي ومن جان مدير ناحية ما فادنة ولا كلبنة بس أحنة لازم نوكفلة لأن هذا أبن عمنة ومن عشيرتنة , ونصرتة واجب , هاي شلون طركاعة , أني راح أنتخب منو ؟؟ والله حيرة , زين صديقي جاسم أبن عمه مرشح للبرلمان وجاسم لازكلي هالمرة صوتك ألنة , وعيب عليك اني اخوك , ومن حقي عليك ان تنتخب ابن عمي وبأعتبارك منتخبني و واكفلي بشدة , زين يا جماعة الخير الناس المثقفين  بالتلفزيون وبالشارع  كالبين الدنية أنتخبوا الزين والمثقف والكفوء , والي عندة خبرة بالسياسة وبالاقتصاد وبالأمن , لا ابن اخو شيخ حسون عندة كل ذني ولا ابن عمنة من رابع ظهر يفتهم بهالشي ولا ابن عم جويسم , هذولي كلهم كجة مرحبة وي السياسة ؟؟ زين أحنة لو انتبخنا ذولي فهم علم وي السياسة وراح نبقة طيب وطاب بهالمفخخات والانتحاريين وطبوا الفلوجة وطلعوا من البصرة و هددوا كردستان , عمي ولد عمي وكرايبي وكرايب جيارنة وكرايب اصدقائنة وخوالنة وعمامنة , أعتذر منكم هالمرة , هاي المرة انريد نصوت للعراق وللسياسيين الحقيقيين حتى يخلصونة من المعمعة الي احنة بيهة , خايبين جا هية ولية لو كونة بين العشاير , لا راح انتخب هااي العشيرة ولا ذيج , أني راح أنتخب اصحاب المشاريع المدنية والسياسية الحقيقية , راح انتخب الي عدهم مشروع للعراق , لأن هاي مرحلة حاسمة ومابيهة مجاملات على احساب الدماء عمي هاي دماء يعني دم اخوي وأخوك وابني وأبنك , يعني الي يزعل خل يزعل , او الشغلة ما بيهة زعل وهية مو مال فزعات ولا مال عشاير هاي سياسة وتقرير مصير , غلطنة بالانتخابات السابقة وكلمن انتخب الي مثل مذهبة وعشيرتة و ابن عمة , وكلشي ما حصلنة غير موت بموت بدمار , عمي عيب عليكم يا كرايبي , خلونة ننتخب الناس السياسيين الي يعرفون معنى السياسة صح , ولعيون العراق لازم نختار الصح هاي المرة والي يريد يزعل خل يزعل , بعدين نراضيه , يوم الي تفرج على العراق , ويبين الصح من الغلط , يوم تتلاكة الوجوه ونشوف العراق مدني ديمقراطي , أمن ومزدهر وراهة راح تكولون ألف رحمة على والديك صدك جنة واهمين , فيا ولد عمي وكرابتي عذراً وألف عذراً