گبل سنوات..يمكن أربع سنوات…زد عليها أو أنقص منها …نشر صندوق حماية الحياة البرية WWF إعلان على الياهو والگوگول عن ” أفضل وظيفة على الأرض” وطلبت سي فيات  CVs من كل أنحاء العالم…الراتب چان خيالي…قريب من ربع مليون دولار بالشهر…والسكن بجزيرة ما يدخلها بشر على گولة كاظم الساهر ..والأكل والشرب ببلاش…ولا إجتماعات ولا مدراء يزعجوك..تسافر بالطيارة ببلاش وين ما تريد…ومقابلات تلفزيونية كل يوم…وظيفة خيالية.
وفاز بالوظيفة  شاب حليو عمره أقل من ثلاثين سنة…وجاب صاحبته يعيشون بهاي الجزيرة لأن هو كلش مؤمن ويعرف أن الجنة بلا ناس ما تنداس…مو مثل گاعنا إللي حلفنا براس العباس ما تنداس في قصيدة حميد سعيد ” لا والله والعباس”…بس إنداست بالنعل والمداس يا عباس.. وهذا الشاب تگدرون تتعرفون عليه هسة أكو برنامج على ناشيونال جيوگرافيك العربي والانگليزي عن The Best Job in the World أو افضل وظيفة في العالم للناطقين باللغة البيشتونية.
وچانت هاي بالفعل أفضل وظيفة حتى إجتنا مفاجأة سعيدة أن في العراق أكو وظيفة أحسن من هاي الوظيفة بقاط ورباط ..المفاجأة جتنا من قصر مجلس النواب العراقي …إللي بكل يوم يفاجئنا هو ورئيسه وأعضائه بمفاجئات سعيدة…والشعب المسكين حتى بالحلم ما يشوف سعادة….ولو تروحون للأسماء العراقية تشوفون أسم سعيد أنقرض من قبل ثلاثين سنة بالعراق…وماكو هسة واحد يسمي أبنه سعيد أو بنته سعاد إلا إذا كان من الذين باگوا وأرتشوا وعلى رواتبهم لا يتوكلون…أولئك على هدى من عقلهم…وأولئك هم السعيدون وينجبون أولاد سعداء وبنات سعيدات في وطن لا يعرف السعادة.
شوان طه..عضو في مجلس النواب العراقي…أعلن عن هاي الوظيفة الأفضل في العالم والموجودة بالعراق..بس إحنا بالعراق أكو 325 شخص وشخصة يشتغلون هاي الوظيفة…يعني مو حصرية مثل وظيفة WWF ..325 عضو و عضوة پرلمانية يشتغلون أفضل وظيفة بالعالم..ربع ساعة بخمسة وأربعين مليون دينار عراقي (أربعين ألف دولار حتى ساعة أعداد هذه المقالة)…وهو راتب كل عضو / عضوة پرلمانية..طه شوان أعلن في برنامج (التاسعة) مال الزميل أنور الحمداني أن الپرلمان العراقي ما داوم غير ربع ساعة خلال هذا الشهر…ربع ساعة…والسبب مثل ما گال شوان أن هناك أيادي خفية تريد عرقلة عمل مجلس النواب…وتعال وأفتهم شلون كردي ويستخدم كلمة عرقلة…والله عفية عليه…أكيد تعلمها لان على وزن (چرغلة) و(دعبلة)..و (حلحلة) والأهم (گلگلة) !
وهذولة إللي ما يداومون بالمجلس…لا أحد يهچهم..ولا إنذار شفهي verbal warning ولا لفت نظر أو توبيخ أو حتى گرصة أذن ..شنو هذولة مو موظفين حكوميين لو شنو؟؟؟ اشو الموظف الحكومي إللي يتأخر عن الدوام نص ساعة بسبب الإزدحام وجهاز كشف الطرشي..أو گول ساعة…يجي له قطع راتب يوم…وإنذار وتوبيخ والمعايشة وي الچلاب بعد ما يدخل عليه المدير ويگول له ” ولك  كلب إبن الكلب لحد إشوكت نتحمل خرابيطك”. هذولة بالمجلس رواتبهم ماشية ورواتب حمايتهم همين وما أدري ليش إذا واحد گاعد ببيته في بلد آمن وآمان يحتاج إلى ثلاثين حماية؟؟ شنو خايف لا تطگ عليه بصلة مخففة لو يطلع له إبريج كاتم بالتواليت؟ او ليش وحدة تحتاج إلى حماية وهي گاعدة ببيت زوجها…أخاف تطگ عليها حفاظة للي عمرها أقل من الخمسين..أو تطگ عليها صينية تشريب لمن فوگ الخمسين وتعتز بعراقيتها وتشريب الباگلا !
هذولة عدهم أفضل وظيفة بالعالم…حماية…سيارات مصفحة…بيوت مستملكة ما يدفعون أيجاراتها…كهرباء 24 ساعة وزيادة…ماي حار وبارد…موطا بالصيف..ونفط بالشتا..ما يداومون…لا توقيع ولا إجازة زمنية…ما عاجبه يداوم ما يروح للمجلس…يروح للمطار والله وياك عبوسي..عنده إجازة ربيعية وخريفية وصيفية وشتوية وي سبات الحيوانات…عنده مخصصات عبادة…مخصصات قاط ورباط.. والأتك واللانگري للعضوات الحارات وخاصة ليلة الخميس… مع صندوق كلينكس لزوم الليلة….هاي الأشياء كلها ماشية وما حد يسال عنها لأن حق مقدس بحسب دستور الملا همام وقانون مجلس النواب إللي جاي بالتفصال عليهم وبالنعال على الوطن…خو المواطن…عاري من الحق في برد الفقر…وحار الحسرة.
ويگولون ليونيل ميسي دا يفكر يحصل على الجنسية العراقية حتى من يعتزل الطوبة لو برشلونة يطردوه يجي للعراق ويشتغل وظيفة (نائب بالپرلمان العراقي) وخاصة بعد خسارة برشلونة وي أي سي ميلان ووي ريال مدريد…يريد يلحگ على نفسه…وهمين يگولون أن السفارة العراقية في واشنطن أستلمت طلب رسمي من آل كلينتون الكرام البررة …يتوسلون بلكن جنسية عراقية للختيارة هيلاري بعد طردها من الخارجية الاميركية بمتثيلية جلطة دماغية خفيفة وصحتها العليلة…إذا وزيرة خارجية أميركا ما مهتمة بصحتها…لعد منو يهتم بصحته…ام الگرگري ! لو أم عامر البصراوية !
ربع ساعة بخمسة وأربعين مليون دينار عراقي (أربعين ألف دولار أميركي) …ومائة وخمسين من هذولة 325 إللي بالمجلس ما عدهم إيميل…لأن ما يعرفون شنو أنترنت ولا شلون يفتحون أيميل !!! يستاهلون…تعبانين على نفسهم…إلى درجة متعبين الوطن وياهم !
بالعافية…عين الحسود بيها عود…كما هو مكتوب على عربانة لبلبي في باب المعظم !
[email protected]