يابة الأيام الصعبة راحت مثل ما تگول الإغنية العراقية :
هانت حبيبي هانت
أيام صعبة چانت
أمورنا حيل عدلة وبعد ماكو داعي للأزنيف..ما ظل عدنا فقير ولا ظلت طسة بأي شارع عراقي، ولا أكو تواليت بأي مدرسة عراقية جامته مكسورة والباب صاير لوحة إعلانات لادباء التواليتات إللي يبدعون لحظات القبض والإمساك وتجيهم إسهال كلماتي، ولا ظلت عدنا ام السمچ تبيع السمچ تفرش عبايتها وتخلي عليها السمچ لأن أسواقنا صارت أسواق مبردة مسقفة وماكو داعي واحدنا يمشي بكل فخر وأعتزاز بنص خياسة سوق بغداد الجديدة أو باب المعظم…لان تلك المشية صارت من تراث الأجداد الله يرحمهم إللي ما لحگوا على عهد الإنجاز الوطني الديمقراطي بإنشاء أسواق متطورة وبعد ماكو داعي أبو المخضر يبيع طماطة على العربانة والشمس تسمط أبو أبوها الطماطة من الساعة ستة الصبح لغاية الثمانية المسا… والسعر نفس السعر لا وأبو العربانة يگول الطماطة بساعة الثمانية المغرب أغلى لأن مستوية وصايرة مرگة من العربانة للماعون بس أشوية ضيف ملح وبهارات حسب الحاجة ! أو قطعة ماجى تمشي الشغل!
خلصت مشاكلنا كلها..لا مشاكل سياسية ولا طائفية ولا حتى مشاكل بالطوبة ما عدنا وي علي عدنان وربعه..ما ظلت غير مشكلة الكهرباء وهاي المشكلة هي مشكلة أزلامية تكفيرية تحريضية إرهابية ، من هاي ما تدخل ضمن صلاحيات أو حتى إهتمامات الحكومة العراقية الباسلة ووزيرها العفطي عفتان أبن عفطان العفطوي..يللا كلكم وياي : طيييييييييييييييييييييط ! الكهرباء مشكلة شعبية ولازم الشعب يحل هاي المشكلة، الحكومة إلها إهتمامات أخرى وحايرة شلون تصرف 112 مليار دولار مضاف إليه 60 مليار دولار كان في صندوق العراق تحت البند السابع ، هيچ مبلغ يحير ولازم كل جهد الدولة الفسادي وهيئة تنظيم الفساد يشتركون في تصريف هذا المبلغ الكبير. الكهرباء ما يحله غير الشعب لأن هو الوحيد إللي مطفي وما يعرف شنو الفلم المعروض في قاعة إجتماعات مجلس الوزراء إللي تصير التخصيصات المالية لمن جاء المالكي بجيب سليم حتى يعبّي المليارات وما توگع بالشارع وتروح لدار حگها مكرمة معززة في بنوك لندنية وسويسرية وبنلك ملي إيران !
وحتى الشعب يحل هاي المشكلة ويترك الحكومة بحالها، راح نعلن عن تأسيس صندوق دعم الكهرباء، تماما مثل صندوق دعم الفقراء في الدول المهتوكة هتك والعياذ بالله إحنا مو من هاي الدول المتخلفة وغير أخلاقية لا أخلاق سياسة ولا إدارة ولا إقتصاد ولا معهد تكنولوجيا أو معهد النفط. صندوق دعم الكهرباء هو صندوق شعبي تطوعي متخصص لدعم الكهرباء وإعادة الحياة للكهرباء لا منية حجي أبو إسراء ولا وزيره العفطي ولا تصريحات أبو البصل الشهرستاني إللي أشكره جدا لأن ثرم إلنا بصل يكفي نسوي كبة طول أيام شهر رمضان …جزاه الله عن أم الجهال خير جزاء…داوم عزيزي في ثرم البصل حسب المنهج الحوزوي المبارك ! لأن عدنا مناسبات جاية هواية ومحتاجين كبة !
بهذا الصندوق راح نشترك كلنا، ومن أگول كلنا أقصد الدرجة الثانية من العراقيين من درجة دي لوكس عراقي إللي على گصتهم خمس نجوم ويقال أن على ما أعرف وين أكو تاتو على شكل خمس نجوم للعنصر النسوي من درجة العراقيات دي لوكس فول أوبشن بحسب مصدر حيل مطلع ومصور ، نشترك كلنا ، إللي عنده امبير ما يحاتجه يجيبه ويخليه بهذا الصدنوق، وطبعاً لازم صندوق خشبي حتى لا ينتل، وإللي عنده فولتية ما يحتاجها لأن موديل قديم همين ميخالف نقبل خلي يجيبها ويخليها بالصندوق، وإللي عنده جوزة بعد بيها شغل هم خلف الله عليه خلي يحيبها، وإللي عنده وايرات وكيبلات خلي يجيب، بس ما نريد حماسكم الوطني يوصل إلى درجة تشلعون عامود كهرباء گدام گراج البيت وتجيبونه للصندوق ! صح هسة هذا العامود ما بيه أي فائدة بس اخاف فرد يوم الولد يحتاجون يكتبون موضوع إنشائي عن تراث وادي الرافدين ترى هذا العمود كلش يفيد، نتذكر كنا نگعد جوا أضويته أيام البكالوريا في الحدائق العامة. الحدائق چانت نزهة العوائل لحد منتصف السبعينات…حدائق بيها تنسيق ورود بشكل جميل، وتماثيل . چنا نگعد جوا هاي الأعمدة ونفرش دفاترنا، چنا نسويها قراية وختيلة من أهالينا لأن ندخن براحتنا..فنريد هاي الأعمدة رجاءاً…صح هي هسة بس صايرة خازوق بنص الزقاق، بس من باب الوفاء لذيچ اليام نريدها، وبعدين هي كلش مفيدة من ننطي عنوان، إذا نشلع هاي الأعمدة شلون راح ننطي عنوان البيت لغيرنا !!! ماكو عراقي ما ينطي عنوان بيته إلا يگول يم عامود الكهرباء المطعوج ! (راجع مقالنا عنوان بيتنا) !
وبعد ما ينترس هذا الصندوق بمساهمات الشعب من الامپير والفولت ، نشيل الصندوق إلى رئيس مجلس المحافظة ونگول هذا صندوقنا ينطق بالحق، ما نريد منكم لا جزءاً ولا شكوراً، بس تشيلون أيدكم عنا، وخلوا جماعتكم أهل المولدات إللي أنتو وياهم بالمقسوم نص ونص، عوفونا بحالنا، راح نمشي أمورنا بنفسنا، بس نريد منكم تنطونا الخرابة إللي براس كل شارع نخلي بيه صندوق مثل هذا الصندوق، أي هذا مستوانا ننطلق من الخرابة إلى العالمية ! أقصد إلى الأضواء والكهرباء، كهرباء يجي من الخرابة أحسن من إنتظار عشر سنوات… أنتو خلوكم وي الحكومة حايرين في أمور أهم وخلف الله عليكم خلصتم الوطن من الفقر والجوع والغلاء والامن متوفر حتى صار يجينا وي البطاقة التموينية، نروح لأبو الحصة ينطينا أمن حسب الحاجة، امن غذائي لو أمن معلوماتي لو أمن سياسي، كل واحد بالأسرة عنده حصة أمنية حسب حاجته، خو التعليم ماكو هيچ دلال ولا دلال شمالي، تگعد بالبيت وتدز هدية لسكرتير الدكتور تاخذ شهادة بكالوريوس.. وتگعد بالبيت وتدز هدية للدكتور تاخذ شهادة ماجستير، وتگعد بالبيت وتدز هدية للدكتور وطقم سيت نوم ولانگري لزوجة الدكتور تاخذ دكتوراه مع مرتبة الشرف إلك وللدكتور! بعد شنريد..بطرانين وداعة سيد علي الدباغ إللي ما اعرف وين صار؟؟ ضرب فلوس نزع الألغام وطار، ويقال أنه في مصيف بحمدون في الصيف، وفي برج دبي في الشتاء! وما بينهما أمور مشتبهات ، يعني أشوية لندن، اشوية باريس وأشوية يم الخوال بطهران !
صدنوق دعم الكهرباء هو بداية للمشروع الشعبي في التخلص من آخر المشاكل في العراق، وجزء بسيط جدا من الوفاء لحكومة خلصتنا من كل المشاكل، حتى مشكلة الحياة البائسة، بلاصقة أو حزام ناسف أو مفخخة…وحتى ماكو داعي أهل الميت يحتارون بحفر الگبر…لأن اللشة راح تطشر تماما مثل لشة سيد مطشر !
أول الفعل أمپير…وبعدين نشوف التوالي لو تريدون الربط على التوازي !!! شوفوا أي الطريقتين أقرب إلى تحقيق وعد أبو علي الشيباني…اهوووو..أقصد أبو علي الشهرستاني !
وياااااااااااا مسهل
[email protected]