يا جماعه .. ؛ أحكي معاكم يا عراقيين “وأسمعج يا جنتي” ! ..

أبو سليمان , داوود أوغلو , من كركوك يحيّيكم , ومن فوق جُمُوحِهِ العثمانيّ الطائر , ..ويقول لكم :ــ

يا جماعه ؛ يا عراقيين , .. يا ديمقراطيين ؛ .. تره حدودكم كللش تايهه .. وللمرّة المليار ؛ دا إنكللكم وانفهّمكم , تره ماعدكم أي سيادة ! , لأن ؛ “عبد السادة” طلّلك مرته وعاف اولاده بالكرّادة ؛ هوب , طفّيْ !

يا جماعة ؛ تره شوكت ما نريد نحتل العراق نكدر , وبأي لحظة ..هووووووووب ؛ طفّي ..

يا جماعة ؛ تره العراق عثماني “مو فارسي” ! ..هووووووووووب ؛ طفّي ..

يا جماعة ؛ العراق هسّه “بلد أولمبي” ودار استراحه .. هيجي انشوفه إحنه الأتراك ؛ لا آشوري ولا أكدي ولا عربي , ولا , ولا .. ولا بطّيخ , وعله عناد إيران , وفندق من خمس نجوم .. خانجغان نموذجي من خليط لأعراق , ومو بس من حصّة الفُرس ! ..

يا جماعة ؛ يا عراقيين , تره ماعدكم حكومة .. هوب طفّي .. هاي نعرفهه بالله ..

يا جماعة ؛ تره الحكومة التركيّة متشتري حكومتكم العراقيّة “بزبانة” .. لعد مشفتوا شلون بسهولة لهّيتكم بتفجيرات , أنا و”أخواني” بالرضاعة ,الأكراد ـ علمود نغطّي بجرجف أحمر عله جيتي الكركوك ! .. هوب ؛ ؟ .. طفّي ! .. ؟

يا جماعة ؛ تره كركوك أرض تركيّة .. هوووووب ؛ طفّي ..

يا جماعة ؛ أوعدكم جيتي الثانية راح تكون للموصل .. هوب ؛ طفّي ؟ , لأن مشتاق كللش الـ”باب الطوب” .. ولحّد يفكّ حلكه منكم ! ..

وللعلم يا جماعة تره “إحنه” الأتراك , يحق لنا الهبوط , بدون مقدّمات ؛ فوق أيّة بقعة أرض ونعتبرها أرض تركيّة ما دامت قدما تركي وطأتها ..

يا جماعة ؛ وشكد حلوة قلعة كركوك .. أيّيييباااااااخخخخ .. من زمان مشايفهه , بس أسمع عنهه سماعي “جهاركاه” .. هووووووب ؛ طفّي ..

يا جماعة ؛ آني هسّه دا أفتر عله كرايبنه بكركوك واحد واحد ؛ هووووب ؛ طفّي , وبدون فيزة ولا ترانزيت , وأتحدّى أكبر شارب “سياسي” بحكومة بغداد يكدر ينزّلني من فوق جموحي العثماني الطاير .. فلا تضلّون تتفستقون براس شعبكم .. كافي عاد ! ..

يا جماعة ؛ تره أني تيقّنت أرض العراق , جيوبولوتيكيّاً ؛ كلهه “كيش” ..

يا جماعة تدرون ليش ..

لأن”البيش مركه” يا جماعة العراق الحرّ الديمقراطي الشفّاف السلس , صارت أقوى من الجيش! .. هووووووووووووب ؛ طفّي ..

يا جماعة ؛ تره “بابنه العالي” بلّغني وكاللي ؛ أدخل يا إبني للعراق من جميع أبوابها , باب المعظّم باب الشرجي باب الطوب باب الدروازة , وباب الحوايج “عله عناد الفٌرس” و.. هووووب ؛ طفّي! ؛ بسلام آمناً , شوكت ما تريد وشوكت ما يعجبك وشوكت ما تحبّ ..

يا جماعة ؛ يا عراقيين جيّيّتت فوك روسكم بشهر آب اللهّاب علمود أكصكص جذوع النخل بلكن نكدر نخفّف درجة الحرارة عن يافوخ والينه بكركوك ؛ ومنريد رِطَبْ , والعن أبوه للرطب لابو أبوه لـ”الخلال”..

عبد السادة ؟ .. وينك ؟… هوب ؛..دطفّي عاد , يمعوّد .. تره البِعِيره “الفولكا” كام تفوّر .. منين الصوج.. من الحرّ مو ؟! .. لا تكللي حرّ آب هذه علمود يستوي التَمر ؟ .. إذا صدك تحجي فكصّه للنخل ومنريد تَمر ! ..

يا جماعة ؛ تره الباب العالي زعلان جوك جوك عليكم ويكللكم ؛ ليش يا عراقيين ليهسّه ممسوّين “إلمقبرة العثمانيين” نزول خميس على جمعه ! .. كلهه شكم سنة عفناكم ؛ وراح نرجعلكم وراح “يُلقي”أردوغان “الألواح” ويجرجر لحاياكم .. هووووووووب .. طفّي ! ..