يابة…هسة وضحت الصورة كلش، بعد لا برايتنس ولا لايتينگ ولا عذر مال نگول ترى الصورة غير واضحة أو ضبابية ،أو نصير أشوية مثقفين أكثر ونگول منطقة رصاصية. الصورة أوضح من هيچ بعد ما تصير لأن هذي المرة الصورة جت من مصدر يروح ويجي ياخذوله سلام خذ وسلام الأمراء وأحياناً حتى يطوبزون إذا أقتضت الحاجة، وبصراحة، الحاجة تقتضي يا قاضي والكل مطوبزين وحتى الفازالين على حسابنا !
چنا نقدم صورة ونگول شوفوا بهاي الصورة وتعرفون أن القضاء العراقي قضاء سياسي ( وحتى القضاء والقدر بالعراق شغلة سياسة مو عزرائيل)، وچان يجينا الرد منگوعاً بالتفلة كل مرة أن الصورة فوتو شوب وما تمشي خطوة حتى لو بدفرة أربعمائة حصان. بس من تجينا صورة بأدق التفاصيل والألوان وصورة ناطقة شلون ما تعرف بس هي هاي، وبهاي الصورة الواضحة مال أبو الآنا يگول أن القضاء في العراق قضاء سياسي لا شغلة أربعة إرهاب ولا طيز لگ،ن ولا بوگ عشرين مليار دولار مال البطاقة التموينية والكهرباء والدفاع وتالي السوداني فلت وأيهم فلت والشعلان گاعد بطنجة (تعرفون وين صايرة طنجة !) ومشتري منتجع مال گوادة، والقضاء يروح يكمش وحدة عمرها طنعش سنة ويحكم عليها لأن تبيع ماي بنهار رمضان بالكرادة ! طاح حظ البعورة، والبعورة هنا إحنا مو هم ّ …إلى ذلك نسترعي إنتباه الغشمة !
وشكراً للأخ المناضل السيد هاشمي رفسنجاني على هذه الصورة المجانية و الواضحة للقضاء العراقي، هسة ليش هو القلم إللي وقع بيه القاضي على إعدام صدام ملك شخصي لو مُلك لهيئة القضاء العراقي !! وشلون يتصرف القاضي بهذا القلم وينطيه هدية خاصة لرفسنجاني، وشنو المناسبة ! وشنو السبب ؟ غير السبب إن محاكمة صدام (من نعلة على روحه) كانت محاكمة إيرانية مو عراقية، ومن هاي كانت شغلة الدجيل هي إللي إنحكم عليها وإنعدم عليها لأن كلهم كانوا عناصر مخابرات إيرانية إللي شاركوا بيها ، كانت أكو شغلات أكثر المفروض ينحكم على أساسها ، بس لأن إيران رادت هيچ فخوش دجاجة وخوش ديچ. ولا يجيني واحد ويگول مقال طائفي ضد هذا وذاك ترى آني أي طائفة أو حزب أو دين أو عشيرة ما تسوى عندي شي ونعال مگطع أشرف منها كلها، على الأقل النعال المگطع ممكن إعادة تدويره والإستفادة منه.
هسة بعد أكو واحد يگول القضاء العراقي مو سياسي؟؟ والإتهامات مو سياسية ؟؟ هسة تعالوا ونشوف صدام قتل العراقيين أكثر لو الإيرانيين ؟ أي مو من حقنا إحنا نحتفظ بهذا القلم ؟ مو هو دمر الوطن والناس والحضارة ( تتذكرون بلوكات بابل كلها صارت من كونكريت مكتوب عليها ص . ح ؟ أي هاي مو تدمير حضارة؟ ) والبيئة ( تجفيف الأهوار وحرق النخيل والآبار) والفن والشعر والإقتصاد والأخلاق وما أعرف شنو؟ هسة لا خليتونا نحاكمه مثل ما نريد ولا نسأله عن السبب وتالي حتى القلم إللي نريد نحتفظ بيه تاخذوه وتنطوه للأخ المناضل رفسنجاني لويش ؟
وبعدين هذا القلم كان ممكن يصير إستثمار كبير وخاصة بهي الظروف الحامضة، هذا القلم منظمة حماية الحياة البرية تريده وممكن تأخذه منا إيجار وتعرضه في قاعتها بكذا ، لأن صدام كان عدو للبيئة والحياة البرية.. هذا القلم ممكن تاخذه منظمة اليونيسيف وتستأجره لأن صدام كان عدو للأطفال ، ممكن تأخذه منظمة اليونسكو لأن صدام عدو للثقافة، وممكن تاخذه الكويت بالمليارات، ويمكن يأخذه حتى عزرائيل لأن صدام كان شريك اساسي لإستثمارات عزرائيل في العراق طوال فترة حكمه وحتى بعد فترة حكمه لأن كل هذي الخياسة هو سببها، ماكو شي بلا سبب، هاي الخياسة والقتل وحتى داعش من ورا صدام والحملة الإيمانية مالته، وأول مرة الناس تنذبح بالسيف ببغداد كانت بشغلة الگوادة أيام الحملة الإيمانية من دز عدي جماعته لابسين أسود وبالسيف ذبحوا الناس على أساس گواويد وگوادات گدام الناس وحطوا الجثث بالگواني بباب البيت !
وهسة خلي يشوفنا وزارة الثقافة لو السياحة لو الآثار لو ما أعرف بعد شكو من وزارات، خليهم يگدرون يرجعون هذا القلم بإعتباره ملك للعراق، وخلي القضاء العراقي بشخص الحاج غير محمود الذكر يسوي قضية على هذا القاضي الذي أهدى القلم لرفسنجاني…يگدر؟؟؟ طيييييييييييييييييط أبو الريحة، أي هسة مو أنكشفتوا وبصورة واضحة أن أنتو قضاء سياسي؟ أي د نريد شغلة سياسية، هذا القلم مالنا مو مال إيران، وفنكم تتصرفون وتجيبوه، والله وماكو عدكم يمين عليّ، لا إيران تخلي بطيز أي واحد يدعي بهذا القلم درزن اقلام أبو المساحة حتى يمسح كلامه ويسكت.
آويلي
يعني لا خلانا نعيش مثل الآوادم خلال خمسة وثلاثين سنة، ولا خلانا نشوف الدنيا، ولا خلانا نفتهم شي، ولا خلا إلنا وطن ولا فلس حلال، وتالي حتى بموتته يسبب إلنا ألم وحسرة وقهر ، وداعتي الغالية من ساعة ما سمعت الخبر وتصريح الأخ المناضل رفسنجاني أن القلم عنده هدية من القاضي وهو حاطه بمتحف
الرئاسة الإيرانية كرمز لإنتصار إيران وآني گلبي مشلوع شلع، وشوف متى گال التصريح ؟ بذكرى الحرب .
ولكم يا عراقيين ما تبطلون الخيانة، مو دمرتونا، ليش ما إجى واحد إيراني وجاب إلنا الورقة إللي مكتوب بيها أن الآخ المناضل الراحل الإمام روح الله الخميني (………………) – ضع ما تراه مناسبا في الفراغ – شرب السم في قبوله لوقف إطلاق النار؟؟ ليش ما يجينا إيراني وينطينا الماعون إللي چان ياكل بيه الأخ المناضل الراحل الإمام روح الله الخميني الطعام من چان بالعراق؟ لو حتى قبغ البالوعة إللي كان تنزل بيها خريته الشريفة ؟
ليش ماكو إيراني جاب إلنا قطعة من شبكة گول ملعب آزادي ؟؟؟ ذيچ اللعبة ما ينسوها لا أنصار الشاه ولا أنصار الثورة الإسلامية، وليش ما أجانا واحد شايل الطوبة إللي جاب بيها حسين سعيد الگول الرابع ونحتفظ بيها متحف الرياضة العراقية ونگول الكرة العراقية إنتصرت على الكرة الإيرانية، وليش ماكو إيراني يجب إلنا چفوف الگولچي مال منتخب إيران من خسروا بكأس آسيا باستراليا بضربة سلام شاكر فدوة لطوله؟ تعرفون شنو الجواب : الجواب إن إيران دولة عمرها ما بيها خاين ولا واحد خان إنتماءه، وأقروا كل تاريخ إيران والفرس، ماكو فارسي خاين، في حين إحنا تاريخنا مليان خيانة…هذا هو الفرق.
ملخص الكلام : القضاء في العراق قضاء سياسي تتحكم بيه جهات سياسية ودول أقليمية، لا أكو متهم بالعراق ولا هم يحزنون، بس أكو ما يحب هاي الدولة لو ضد من ذاك الحزب … وإذا آني غلطان…خلي القاضي غير محمود الذكر يروح بنفسه ويرجع إلنا القلم…. سدوا خشمكم لأن أكو طيط بالطريق !
طيييييييييييييييييييييييييييييييييييييييييييييييييييييط….كيمياوي .
