جم دوب نبقى بهيجي فوضى.. يوميه دم يجري وأشلاء متناثره بالكاع.. وجم دوب نبقى أنكول البعث والنقشبنديه والحقد الطائفي.. وين الحكومه وين الدفاع وفرقه الوصخه وين الداخليه ومليشياتها اللي تمشي بالعاصمه ومتخاف من كلشي.. بس كاعدين تحمون المنطقه الخضراء وأولاد الخايبه يجطلون بالشوارع .. أحنه وين رايحين يا عراقيين.. ماكو واحد عاقل أيدلينه دربنه الصحيح.. ما معقوله خمسه وتلاثين مليون عراقي تايهين بوسط مستنقع رملي لا بدايه ولا نهايه واضحه.. معقوله ماكو خير بهذا البلد يحجي للعراقيين شنو كاعد أيصير ويوكف بوجه حكومة المافيات ويكول جلمة حق.. ليش هذا النحر مستمر وليش هاي المصايب جاي أتصير.. أحنه شسوينه يا عالم حتى يوميه ندفع ضريبه سياسيين فاشلين ميعرفون بس شكد صار سعر صرف الدولار وشراء العقارات والقصور في لندن وبيروت ودول الخليج ومليارات العراقيين تطلع بجنط ومن مطار بغداد وبعد ما ننطيها وعبالك العراق ورث اللي خلفوهم .. عمي أنعل أبو الديمقراطيه اللي رجعتنه للخيسه وجابتنه حيوانات شرسه همها شلون تحتقر العراقي وطيح حظه ومتخليه يرفع راسه.. وشكلو مافيات هوايه لتدمير أرادة الانسان العراقي ومحو وطنيته وزرعو الفتنه بيناتنه واللي راح تحرك البشر والحجر والشجر بسبب طركاعات سياسيي الغفله على تقاسم الغنائم..خربو الاقتصاد العراقي بصوره ممنهجه وعن قصد.. الفساد الاجتماعي والتفكك الاسري والتوجه للرذيله والانحطاط بسبب العوز والحاجه.. أنتشار الاوبئه والامراض الفظيعه وترويج المخدرات اللي تجينه من الجاره الاسلاميه وبثها بين الشباب العاطل عن العمل.. الضغط على العراقيين حتى أيقسمو البلد الى أمارات متصارعه وضعيفه..
يا عراقيين ترى الوضع ألامني كلش خطير ويمتد من البصره حتى كركوك ومن ديالى حتى غرب الانبار.. والعاصمه بغداد صارت عاصمه للمافيات والمجاميع المسلحه اللي تفتر بسيارات وتحمل باجات وأسلحه حكوميه وأكو مليشيات تعرفها حكومة نوري المالكي تتهيأ للمشاركه وي الجيش للقيام بأعمال عنف ومذابح في الانبار ونينوى.. وحجي سعدون الدليمي راح أيورط الجيش بمذابح في غرب العراق بحجة ملاحقة مجموعات مسلحه تابعه للقاعده تتخذ من الصحراء الغربيه منطلقا لضرب قطعات الجيش والشرطه..وراح يصير دم للرجاب بين العشاير والجيش.. نواب من العراقيه وصلو جنيف لاطلاع العالم على التدهور الامني اللي وصله البلد جراء غباء ورعونة السياسيين اللي ما عدهم شغل وعمل بس شلون ينهون هذا العراق ويدفنون شعبه .. وأعضاء دولة القولون يستفزون الشعب بتصريحات سخيفه تشعل الوضع وتزيد من أشعال الفتنه اللي صارت على الابواب.. وأمريكا وأيران يتفرجون على خيبتنه وذوله بيدهم الحل بس أيريدونه نحترك بعد أكثر..
تعالو شوفو شوارع بغداد شلون خاليه من الناس اللي كعدت ببيوتها حتى كبل متغيب الشمس وتنتظر الفرج وبس سيارات العصابات تتجول في الدوره والعدل والشرطه الرابعه وحي الجامعه والغزاليه.. والله تعبنه يا عالم.. عشر سنين وكبلها سنين هوايه ما شفنه طعم الراحه والاستقرار..شوفو العالم وين وصل وأحنه بعدنه نفصل البشر هذا شيعي وهذا سني وهذا عربي وهذا كردي.. شايفين ثاني دوله بالعالم تتحكم بالنفط وشعبها عايش بالظلمه وبشرها تسكن المكابر وبيوت التنكات وتشرب مي المجاري ..هاي وين صايره بيا وطن..
وما خفي كان أعظم
