احلى شي من يطلع مسئول حكومي كشخه بالتيفي ولابس قاط ورباط وبالمؤتمر الصحفي يقول ترى إحنا عدنا (مقومات اللحاق بأوربا وحضارتها) بس ألشغله يراد لها اشويه وقت يعني قصده (صبرا جميلا كالعادة )
لنناقش هذه المقولة العظيمة لسيادته ( أم المقومات التاريخية) ونسال سيادته القاط والرباط وحتى الداخليات مالتك صنع وين ؟ إذا صنع وطني محلي اوكي يعني عدنا جزء ولو صغير من هذه المقومات لان ما بقى بلد بالعالم لا ينتج ولا يصدر هذه الأشياء البسيطة والسهلة … حتى الهنود الحمر عدهم منتجات يصدروها للعالم ؟ زين إحنا شنو صار عدنا من إنتاج وتصدير خلال فترتك ؟
وإذا سؤالنا محرج لا تجاوب سيدي فقط ابتسم وإحنا بالفطرة راح نعرف الجواب لان ابتسامتك بوجه الشعب الصابر صدقه وسوف تأجر وتثاب عليها
ثانيا لنطلع على مقومات سياسينا العظماء لأداره البلد والنهوض بيه نحو مستقبل افظل وكيف ان بمنهجهم السياسي الحالي راح نسبق به أوربا ونذبها صفح ….لنرى هذا المنهج منذ تاريخ استلامهم للحكم ولحد اليوم .
اشو ….
الكهرباء جطل بالمولده لو بالترفك لايت الوطني وأمنيتنا ان نسمع فد يوم اكو مواطن إنتل بالوطنية الكل تنتل بالمولده … والماء جطل بالماطور الكهربائي لو بالبمب اليدوي الهوائي مال البايسكل … والتدريس والتعليم جطل بالخصوصي المنزلي اليومي …. والنجاح المدرسي جطل بالكارتات ابو الخمسه وحلويات ابو عفيف …والزراعه والصناعه جطل بالاستيراد الخارجي ولولا الخارج جان متنى جوع وبقينا امصاليخ …. والتعيين جطل بالرشوه ألدولاريه الصعبة على الفقير الي علمن يوفرها بايع نصف غراض بيته …. والشرطه والجيش جطل بالدمج الحزبي الإسلامي المجاهد وولائهم فقط للجطل الاسلامي الي دمجهم وليس للوطن …. و تشكيل الحكومه جطل بالتهميش والتزوير الانتخابي الشفافي …. والوزير دائما جطل مع قائمته المقدسه ام الخبزه وليس مع المصلحة ألعامه … والدين وتعاليمه جطل بالساده والشيوخ الجدد وبكيفهم يفتون ويقررون والذين يقولون مالا يفعلون …. والميزانيه السنويه الفلكيه والبنك المركزي الخاص بيهم جطل بالتهريب للخارج … والقضاء جطل بالمخبر السري والماده 4 ارهاب وهذه الماده سحريه ترهم على كل الحالات الاجتماعيه والعمريه بدون أستثناء الكبار ينعدمون والصغار يطهرون .. وخرجي الجامعات جطل بالسايبه الصفره الخاليه من اي مواصفات أمان لانها تخرج صاحبها من الدنيا على السريع وبدون ان يلحق يقرا الشهاده …والمليشيات جطل بالكاتم المذهبي … والسياسيين واختلافاتهم جطل بالمفخخات وأساله الدماء ….واي واحد يريد ينتفض عليهم يعتبروه جطل بالبعثيين والجنيين والشياطين … والشعب يعيش يوميا هذا التجطيل والتعطيل
بحيث دماغ المواطن لا يعرف وين ومع من يجطل ؟ لان ماكو هجي حياة تعتمد على التجطيل الدائم بدون حل او صيانه دوريه يعني حتى لو باتري مال طياره جامبو جان وقف عن العمل وجسه …
ولكن سيدي نعطيك مثال به معاني كبيره لنا و ما ادري
الك يفيدك او لا ( لانك قائد والقائد اذا أصاب له جطلان واذا اخطا له جطل واحد) يعني انته حسب الشرع من الصوبين امجطل علينا وعلى إلي خلفونا
مثال :
غاندي رجع من أوربا إلى بلده الهند وجان لابس قاط ورباط أجنبي
ولكن من شاف وضعيه بلده وشعبه وضعيه بائسه وحزينه … نزع القاط وتصلخ وغطى روحه بخركه ونذر نفسه للشعب وهذا المصلخ الوطني بسياسته الحكيمه ابكى الدوله التي لا تغيب عنها الشمس (بريطانيا العظمى) وحكم بلده ووحده رغم القوميات والأديان المتعددة والكثيره في الهند وبقى هذا القائد يدير شؤون بلده وهو مصلخ إلى أن مات .
إحنا سيدي لا نقصد ان تتصلخ (لا سامح الله ) أبقى بقاطك ولكن
استخدم سياسه المصلخ لأداره البلد
وليس سياسه التجطيل والتعطيل
لان هذه السياسة عطلت البلد وخلت الشعب شي امجطل على شي
وأخيرا سيدي ألحجي بيناتنا ترى المقومات أفعال وانجازات مو سوالف وتصفيط لان التجطيل لا يدوم …. يجي يوم ويجسي ألباتري
وبعدها تصير كارثة بالبلد
